Seia Tatou Toe Feiloai
Faatuatua o Tagata o Atumotu
I se malaga lata mai mai le Iunaite Setete i le Atu Maresala ma Toga, sa faateia ai a’u i le faatuatua mama o i latou sa ou feiloai i ai. O le mea masani lava, sa foliga mai ia te a’u, o lo latou faatuatua e le faataapeapeina lava i le faauigaga femoumoua’i a le itulagi i Sisifo o amioga lelei ma le upumoni. O le faatuatua o tagata o atumotu e loloto, e pei ona faamatalaina e le sa avea muamua ma peresitene o le misiona a Toga o Elder John H. Groberg (o le Fitugafulu, 1976–2005). E mauaa i le Togiola ma le ata o le faaolataga. O le faatuatua faapena ua le toe fesiligia ai mea sa aoaoina e ala mai i le Agaga.
I nisi o itu, o le olaga i Motu o le Pasefika e matele ina minoi i se faiga faifaimalie nai lo le mea sa ou masani ai. E ui ina mafai e tagata o atumotu ona maua taavale ma televise, tifaga ma le Initoneti, taaloga ma le tele o isi gaoioiga, o mea faapena e foliga mai e itiiti se faalavelave nai lo le tele o aganuu, e aofia ai le Iunaite Setete.
Ioe, e feagai foi tagata o atumotu ma o latou lava foi luitau. E pei o a’u, e ao ona latou suea ni auala e maua ai ni meaai ma malutaga faapea foi ma le tausiga e puipui ai a latou molimau. Ae ua tele ma tele taimi, sa ou molimauina ai le faatuatua o i latou o e sa le’i faavaivai i lalo o le tele o luitau pe faalavelaveina e le pisi po o mea faalavefau. Nai lo lena, o loo latou nofouta i le aao o le Alii i o latou olaga. E pei ona faamatala mai e Elder David S. Baxter o le Fitugafulu (ma le sa avea muamua ma Peresitene o le Eria a le Pasefika), “Latou te talitonu i vavega, latou te faamoemoe e mauaina, ma latou te mauaina lava.”
A o o’u foi atu i le fale mai lo’u aafiaga i le Pasefika i Saute, sa ou mafaufau loloto i nai fesili: Aisea e tumau mausali ai nisi o tagata i lo latou faatuatua, ae o isi e faatagaina fesili po o le masalosalo e faalavefau i o latou manatu? Aisea la e faataga ai e nisi, faatasi ai ma se molimau sa maua, le faavaivaia pe faasolovi i lalo [o lena molimau]? Aisea la e faateia ai nisi pe a latou molimauina le aao o le Alii i o latou olaga?
Atonu o le tali e taoto lea i le ituaiga o naunautaiga e tuu ai e le tagata lona loto i luga o le fatafaitaulaga a le Alii. Mo tagata o atumotu sa ou feiloai i ai, o le faaiuga e le o se faaiuga e foliga mai latou te faia ma toe saga faia soo. O le faavaeina o lo latou faatuatua i luga o le Papa o lo latou Togiola, o le faavae mautinoa, o le toatele ua le toe fesili; ua latou mumusu e faataga a latou molimau ina ia luluina. Ua latou talia le mea ua latou iloa e moni ae tuu masalosaloga ia mou ese.
O se uiga auaumama lena ou te manao ia faaatoatoa. A tulai mai luitau i o’u talitonuga, ou te manao ia mafai ona ou faia le mea sa ta’u atu e le Alii ia Oliva Kaotui e fai: “Liliu ane lou mafaufau i le po na e tagi mai ai ia te a’u i lou loto, ina ia mafai ona e iloa e uiga i le moni o nei mea. Ou te le’i tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua mai lo lena mai le Atua?” (MF&F 6:22–23). O lena manatuaina e taitai atu ai i le faatuatua e le maluelue.
O lenei ituaiga o faatuatua e mama ma e saoloto mai mea faalavefau. E tuuto ma taliaina. E faamautu ai: “Ua ou iloa lenei mea. Ou te le tau toe fesiligia.”
O le faaaogaina o lenei ituaiga o faatuatua i lo tatou Tama Faalelagi ma Lana fuafuaga e mafai ai e Lona mana ona galue i o tatou olaga. E le gauai atu i osofaiga i o tatou talitonuga, i mea faavaivai, pe i mea e le mailoa. E mafai ai ona tatou faapea atu, “O loo soifua o Ia!” Ma o lena mea, ia te a’u, ua lava lava lea.
Ata na pueina e Joshua J. Perkey