Yut
Bilif I Lidim Olgeta
Man we i raet i stap laef long Not Karolaena, YSA.
Bae mi neva fogetem we mi wokbaot long graon long Winta Kota, Nebraska, YSA, long ples we ol paeonia oli bin laef long hem sam yia i pas. Mi filim olsem se graon ia i tabu, semmak olsem we mi stap visitim aotsaed long tempol.
Ae blong mi i fulap long wota blong ae, i mekem mi no save lukluk gud samting. Mi luk wan aedol be mi no save luk gud se huia. Taem mi wapemaot wota blong ae blong mi, mi luk wan man mo wan woman we fes blong tufala i fulap long sore. Taem mi lukluk moa klosap, mi luk wan smol bebi i stap ledaon long leg blong tufala long gref.
Hemi fulumap mi wetem plante filing: harem nogud, kros, fasin blong talem tangkyu, mo glad. Mi wantem blong tekemaot ol soa we ol Sent ia oli bin filim, be mi glad long semtaem long wanem oli bin sakrifaes from gospel.
Eksperiens blong Winta Kota i helpem mi blong luksave we Papa long Heven i givim gospel long ol pikinini blong hem mo givim olgeta fridom blong joes mo mekem wanem oli wantem wetem. Papa mo mama blong bebi ia, ating oli save jusum blong tekem wan rod we i isi moa. Blong folem profet mo laef folem gospel, i nidim blong ol paeonia ia oli mas go fored, iven sapos hem i minim blong oli berem pikinini blong olgeta. Be oli jusum blong tekem gospel long laef blong olgeta mo akseptem ol jalenj. Mi lanem se ful taem mo paoa we ol Sent ia oli givim long gospel mo strong tingting blong go fored i bin muv wetem fet mo hop—hop from wan gudfala fiuja mo fet se bae Lod i save olgeta mo mekem ol soa blong bodi blong olgeta i go daon.