Fas Presidensi Mesej, Julae 2013
Wol I Nidim Ol Paeonia Tedei
Long plante, rod blong ol paeonia long 1847 i no stat long Nauvu, Ketlan, Fa Wes, o Niu Yok be long Inglan, Skotlan, Skandinavia, o Jemani. Ol smol pikinini oli no save andastanem fulwan strong fet we i bin pusum papa mo mama blong olgeta blong livim biaen ol famle, ol fren, kamfot, mo sekuriti.
Wan smol wan bae i save askem, “?Mami, from wanem yumi mas livim hom? ?Bae yumi stap go wea?”
“Kam, ol gudgudfala wan; bae yumi go long Saeon, siti blong God blong yumi.”
Long medel blong sefti blong ol hom mo promes blong Saeon i gat ol strong mo rafraf wota blong Atlantik. ?Hu bae i save tingbaot ol fraet we i stap long hat blong man long hadtaem ia blong go kros? Taem oli stap folem ol kwaet toktok blong Spirit, kasem paoa tru long ol simpol be strong fet, ol paeonia Sent ia oli putum tras long God mo statem rod blong olgeta.
Oli kasem Nauvu mo stat blong fesem ol hadtaem bakeken long rod. Ol ston i makemaot ol gref long rod long Nauvu kasem Sol Lek Siti. Hemia wan praes we ol paeonia i pem. Ol bodi blong olgeta, oli berem long pis, be ol nem blong olgeta i stap blong oltaem.
Ol buluk we oli taedem oli wokbaot sloslo, ol wil blong hankat oli mekem noes, ol strong man oli wokhad, oli kilkilim dram blong wo, mo ol wael dog oli singaot. Be ol paeonia we oli gat fet mo oli mas muv i go from ol hadtaem, oli bin gohed. Plante taem, oli stap singsing:
Kam, kam, ol Sent, yu no mas fraet long wok;
Yumi glad, yumi go.
Nomata yu luk se rod hem i had,
God i givim sapot. …
Evri samting i gud!1
Ol paeonia ia oli tingbaot ol toktok blong Lod taem Hem i bin talem se ol pipol blong Hem, bae Hem i mas testem olgeta long saed blong evri samting, blong mekem se oli rere blong kasem glori ia we Hem i gat i stap blong olgeta, we i glori blong Saeon.2
Taem we i stap go, i mekem yumi fogetem mo i nomo gat tumas tangkyu from olgeta ia we oli wokbaot long rod we i had, we oli livim biaen wan rod wetem ol gref we i no gat nem. Be ?olsem wanem nao long ol jalenj blong tedei? ?I gat eni rod blong travel we i fulap long ol ston, i no gat eni rafraf hil blong klaem, i no gat eni krik blong krosem, i no gat reva blong krosem? ?O i gat eni nid naoia blong gat spirit blong ol paeonia ia blong lidim yumi longwe long ol denja we i stap blong solemdaon yumi mo blong lidim yumi i go long sefples long saeon?
Long ol yia afta long Wol Wo 2, ol standet blong gud fasin i bin godaon bakegen mo bakegen. Ol kraem i go antap bigwan; fasin blong gat respek i godaon. Plante oli stap muv olsem paoa blong hariken we i stap saksakem olgeta i go antap mo i kamdaon, mo stap lukaotem ol harem gud blong smol taem mo sakrifaesem ol harem gud we i no save finis. Hemia i mekem yumi lusum pis.
Yumi foget olsem wanem nao ol man Grik mo ol man Rom oli bin stap rul long nogud wol ia mo olsem wanem nao bigfala win blong olgeta ia i en, mo olsem wanem wan fasin blong les mo fasin we i no strong i kam kavremap olgeta gogo kasem oli lus tru. Long en, plante oli wantem fridom, oli wantem stap sef mo wan gudfala laef; mo oli lusum evri samting—kamfot mo sekuriti mo fridom.
No mekem folem ol trik blong Setan; be, stanap strong from trutok. Neva bae wan glad we i kam long ol strong filing mo sin bae i stretem wanem we sol i wantem tumas. Sin i neva lidim wan long klin fasin. Fasin blong no stap laekem nating wan samting o man bae i neva mekem lav i kam. Fasin blong no save stanap from samting bae i neva givim strong paoa long tingting. Fasin blong gat tu tingting bae i neva bildimap fet.
Sam oli faenem i had blong stanap agens ol fasin blong stap jik mo rabis toktok blong ol krangke man we i daonem fasin blong stap klin long saed blong seks, fasin blong stap ones, mo blong stap obei long ol komanmen blong God. Be wol i stap daonem fasin blong wantem stap folem ol prinsipol. Taem Noa i bin kasem instraksen blong bildim wan sip, ol krangke man oli lukluk long skae we i no gat saen blong ren, mo laflaf mo jik gogo kasem taem we ren i kam.
?Olsem wanem? ?Bae yumi mas stap lanem plante moa lesen we i had tumas bakegen mo bakeken? Taem i stap jenis, be trutok i stap. Taem yumi fel blong lanem samting aot long ol eksperiens blong taem we i pas, nao bae yumi mas ripitim nomo ol semfala samting bakegen wetem hed i soa, stap safa, mo trabol long tingting. ?Bae yumi no gat waes tingting blong obei long Hem we i save ol samting stat kasem en—Lod blong yumi we i mekem plan ia blong fasin blong sevem man—be i no snek ia we i no laekem naesfala plan ia?
Wan diksenari i eksplenem se wan paeonia i olsem “wan we i go fastaem blong mekem rere o openem rod long ol narawan blong folem.”3 ?Bae yumi save putum tugeta ol strong paoa long tingting mo fasin blong stap strong from wan samting, we i bin fasin blong ol paeonia blong ol jeneresen we oli pas? ?Bae yu mo mi, long ril laef, i save kam wan paeonia?
Mi save se yumi save kam ol paeonia ia. !O yes, wol i nidim bigwan ol paeonia tedei!
© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/12. Oli letem translesen: 6/12. Translesen blong First Presidency Message, July 2013. Bislama 10667 852
Yusum Mesej Ia blong Tij
Skripja i eksplenem se ol hom tija oli blong “givim woning, eksplenem, askem strong, mo tijim, mo invaetem evriwan blong kam long kraes”(luk long D&C 20:59). Traem poenemaot ol woning mo invitesen we i stap long mesej blong Presiden Monson long olgeta we yu stap visitim. Yu bae yu wantem tu blong toktok raon wetem olgeta, ol wei blong kam luksave mo folem ol stret mo gud eksampol, fasin blong stap longwe long fasin blong giaman, mo lanem samting aot long ol mistek blong ol narawan. Askem olgeta we yu tijim olsem wanem oli save stap wan paeonia tedei.