Agtutubo
Pinaregta ti Pammati
Agnaed ti nagsurat iti North Carolina, USA.
Diak kaano man malipatan ti pannagnak kadagiti arubayan ti Winter Quarters, Nebraska, USA, a nagnaedan dagiti nagkauna a kameng adun a tawen ti napalabas. Sagrado ti arubayan, dumani kasla sumarsarungkarak iti templo iti ruar.
Napno dagiti matak iti lua, a nagpalidem iti panagkitak. Nakitak ti maysa nga estatua ngem diak unay makita a nalawag dagiti pigura. Idi napunaskon dagiti luak, nakitak ti maysa a lalaki ken babai a nakalidliday unay dagiti rupada. Idi umasidegak, nakitak ti pigura ti maysa a maladaga a naipaidda iti tanem iti sakaananda.
Daytoy nga imatang ti nangpunno kaniak iti adu nga emosion: liday, gura, panagyaman, ken rag-o. Kinayatko nga ikkaten ti saem a narikna dagita a Santo, ngem nagyamanak iti dayta met la a gundaway iti insakripisiodan para iti ebanghelio.
Ti padasko iti Winter Quarters ti nakatulong kaniak a makaamiris nga ited ti Nailangitan nga Ama ti ebanghelio kadagiti annakna ken ipalugodna kadakuada ti kinawaya a panangaramidda iti daytoy kas iti pagayatanda. Nakapagpili koma dagiti nagannak ti maladaga a nangala iti nalaklaka a banag. Ti panangsurot iti propeta ken panagbiag iti ebanghelio ket naidawat a kasapulan kadagitoy a nagkauna a kameng nga agtultuloyda uray no kaipapanan ti panangitanem iti anakda. Ngem pinilida nga innala ti ebanghelio iti biagda ken inawatda dagiti pannubokda. Nasursurok a ti dedikasion dagiti Santo iti ebanghelio ken ti determinasionda nga agtultuloy ket pinaregta ti pammati ken namnama—namnama para iti naraniag a masakbayan ken pammati nga am-ammo ida ti Apo ken mapaep-epna ti saemda.