Mensahe ti Umuna a Panguluen, Hulio 2013
Kasapulan ti Lubong Dagiti Nagkauna a Kameng Iti Agdama
Para iti kaaduan, ti panagdaliasat dagiti nagkauna a kameng ti 1847 ket saan a nangrugi iti Nauvoo, Kirtland, Far West, wenno New York no di ket iti adayo nga England, Scotland, Scandinavia, wenno Germany. Saan a naan-anay a maawatan dagiti babassit nga ubbing ti natibker a pammati a nangguyugoy kadagiti nagannakda tapno panawanda ti pamilia, gagayyem, gin-awa, ken seguridad.
Mabalin a saludsoden ti maysa a bassit nga ubing, “Inang, apay a pumanawtayo? Sadino ti papanantayo?”
“Sumurotka patpatgek nga anak; intayo iti Zion, ti siudad ti Diostayo.”
Iti baet ti kinatalged ti pagtaengan ken ti kari ti Zion adda ti naranggas ken napeggad a danum ti nadawel nga Atlantic. Asino ti makailadawan iti buteng a nangpekkel iti puso ti tao kabayatan dagiti makapeggad a panagballasiw? Naparegtada kadagiti naulimek nga arasaas ti Espiritu, natulonganda iti simple ngem natibker a pammati, nagtalek iti Dios dagiti nagkauna a Santo ket naglayagda iti panagdaliasatda.
Iti kamaudiananna nakadanonda iti Nauvoo tapno laeng maipasangoda manen kadagiti rigat iti panagbaniagada. Dagiti lapida ti nangmarka kadagiti tanem iti intero a dalan manipud iti Nauvoo a mapan iti Salt Lake City. Kasta ti pateg a binayadan ti sumagmamano a nagkauna a kameng. Naitanem dagiti bangkayda a sitatalna, ngem nagtalinaed dagiti naganda iti manayon.
Nabuntog dagiti nabannogen a baka, rumanitrit dagiti ligay ti karison, nagbannog dagiti natured a lallaki, napaguni dagiti tambor, ken nagungor dagiti lobo. Ngem nagtultuloy dagiti naparegta ti pammatina ken pimmanaw a nagkauna a kameng. Masansan a kinantada ti:
‘Maykay’ Sasanto; awan pagbutnganyo;
Agrag-o ‘ti dalanyo.
Narigat man ‘toy panagdaliasatyo,
Parabur supapakyo. …
Nas’yaat! Nas’yaat!1
Nalagip dagitoy a nagkauna a kameng dagiti balikas ti Apo: “Nasken a masubok dagiti taok iti amin a banag, tapno maisaganada nga umawat iti gloria nga insaganak a para kadakuada nga isu ti gloria ti Zion.”2
Ti panaglabas ti panawen ti mamaglipat ken mangpabassit iti panangbigbigtayo iti pateg dagiti nakapadas iti nasaem a panagdaliasat, a nangpanaw iti naluaan a dalan dagiti awan nagnaganna a tanem. Ngem kasano dagiti karit iti agdama? Awan kadi dagiti nabato a kalsada a pagdaliasatan, awan kadi dagiti narusanger a bantay nga ulien, awan kadi dagiti teppang a daliasaten, awan kadi dagiti dalan a parnuayen, awan kadi dagiti karayan a ballasiwen? Wenno adda kadi pudno a kasapulan para iti dayta nga espiritu ti nagkauna a kinakameng a mangtarabay a mangyadayo kadatayo manipud kadagiti peggad a mangsalsallukob kadatayo ken mangiturong kadatayo iti kinatalged ti Zion?
Kadagiti dekada manipud pay iti gibus ti Gubat ti Lubong II, bimmaba a bimmaba manen dagiti pagrukodan ti kinadalus ti dayaw. Nagtultuloy nga immadu dagiti krimen; saan a disente ti pannakilangen dagiti tao ti kagimongan. Adu a tattao ti agkalikagum a mangdadael iti panagngato ken panagbaba ti biag, nga agkalkalikagum iti di agpaut a ragragsak bayat ti panangisakripisio kadagiti rag-o ti kinaagnanayon. Iti kasta mapukawtayo ti talna.
Malipatantayo no kasano a nagtalinaed a naindaklan dagiti Griego ken Romano iti naulpit a lubong ken no kasano a naggibus dayta a balligi—kasano a rinimbawan ida ti kinasadut ken kinakapsut iti pannakadadaelda iti kamaudiananna. Iti kamaudiananna, malaksid iti panagtarigagayda iti wayawaya, tinarigagayanda pay ti seguridad ken nagin-awa a panagbiag; napukawda ti amin—a gin-awa ken suguridad ken wayawaya.
Saankayo a sumuko kadagiti pangguyugoy ni Satanas, ketdi, agtalinaedkayo a natibker para iti kinapudno. Dagiti saan a makapnek a tarigagay ti kararua ket saanto a mapatgan babaen ti di pulos aggibus a panagsapsapul iti rag-o iti baet dagiti ragsak ti panagrikna ken panagbisio. Ti bisio saan a kaano man agbanag iti naimbag nga ugali. Ti gura saan a kaano man mangitandudo iti ayat. Ti kinatakrot saan a kaano man mangted iti tured. Ti panagduadua saan a kaano man mangparegta iti pammati.
Adda dagiti marigatan a makadaer iti pannakauy-uyaw ken makainsulto a sao dagiti maag a tattao a mangkatkatawa iti kinadalus ti dayaw, kinapudno, ken panagtungpal kadagiti bilin ti Dios. Ngem kanayon nga imbilangen ti lubong a saan a napateg ti panagtungpal iti pagbatayan. Idi nabilin ni Noe a mangbangon iti bapor, timmangad dagiti maag nga agindeg iti awan ulepna a tangatang ket kalpasanna nagkakatawada ken pinagsasaritaanda maipapan kadagiti napudno—agingga a dimteng ti tudo.
Nasken kadi nga adalentayo manen a kanayon dagiti kasta a napapateg a leksion? Agbalbaliw dagiti panawen, ngem agtalinaed ti kinapudno. No saantayo a masursuruan manipud kadagiti padas ti napalabas, ulitentayo manen dagitoy a buyogan ti amin a sakit ti puso, panagsagaba, ken nalaus a gurada. Addaantayo kadi iti sirib nga agtungpal Kenkuana a makaammo iti pangrugian manipud iti paggibusan—ti Apotayo, a nangisangrat iti plano ti pannakaisalakan—imbes a dayta serpiento, a manguyaw iti kinangayed daytoy?
Ti diksionario ilawlawagna ti kayat a sawen ti pioneer wenno nagkauna a kameng a kas “maysa a nga immun-una a mangisagana wenno manglukat iti dalan a suroten dagiti dadduma pay.”3 Maparegtatayo kadi uray no kaskasano ti bagbagitayo ti kinatured ken kinatibker ti panggep a nangiladawan iti kababalin wenno kinatao dagiti nagkauna a kameng ti immun-una a kaputotan? Iti aktual a kinapudno, makapagbalinkayo wenno makapagbalinak kadi a pioneer wenno nagkauna a kameng?
Ammok a makapagbalintayo. O, kasapulan ti lubong dagiti pioneer wenno nagkauna a kameng iti agdama!
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti First Presidency Message, July 2013. Ilokano.10667 864
Panangisuro manipud iti Daytoy a Mensahe
Ilawlawag dagiti nasantuan a kasuratan a dagiti home teacher ket nasken a “mangballaag, mangilawlawag, mangigunamgunam, ken mangisuro, ken mangawis iti amin nga umasideg ken ni Cristo” (DkK 20:59). Ibilangyo ti mangilawlawag kadagiti ballaag ken awis a linaon ti menssahe ni Presidente Monson kadagiti sarungkaranyo. Mabalin a kayatyo nga ilawlawag kadakuada dagiti wagas a mangilasin ken mangsurot kadagiti nalinteg a pagwadan, mangliklik kadagiti pangallilaw, ken masursuruan manipud kadagiti biddut dagiti dadduma. Saludsodenyo kadagiti sursuruanyo no kasano a makapagbalinda a pioneer iti agdama.