Mensahe iti Visiting Teaching, Hulio 2013

Panangisuro ken Panangsursuro iti Ebanghelio

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag. Para iti ad-adu pay nga impormasion, mapan iti reliefsociety.lds.org.

Pammati • Pamilia • Tulong

Ni Jesucristo ti apo a mannursuro. Impakitana ti pagwadan kadatayo bayat ti “panangisurona kadagiti babbai iti kaaduan ken iti tunggal maysa, iti kalsada ken iti igid ti baybay, iti abay ti bubon ken kadagiti pagtaenganda. Impakitana ti naayat nga asi kadakuada ken pinaimbagna ida ken dagiti miembro ti pamiliada.”¹

Sinuruanna da Marta ken Maria ken “inawisna ida nga agbalin a disipulona ken makiranudda iti pannakaisalakan, ‘ti nasayaat a bagi’ [Lucas 10:42] a dinto maikkat kenkuana.”²

Kadagiti nasantuan a kasuratantayo iti ud-udina nga aldaw, binilinnatayo ti Apo nga “isuro iti tunggal maysa ti doktrina ti pagarian” (DkK 88:77). Maipapan iti panangisuro ken panangsursuro iti doktrina, kinuna ni Cheryl A. Esplin, maikadua a mammagbaga iti Primary general presidency, “Ti panagsursuro tapno naan-anay a maawatan dagiti doktrina ti ebanghelio ket maysa a proseso ti panagbiag ken sumangbay nga ‘ibinsabinsa, bilin iti bilin, sangkabassit ditoy ken sangkabassit idiay’ (2 Nephi 28:30).”³

Bayat ti panagsursuro, panagadal, ken panagkararagtayo, mangisurotayo nga addaan iti bileg ti Espiritu Santo, a mangidanonto iti mensahetayo “iti puso dagiti annak dagiti [lallaki ken babbai]” (2 Nephi 33:1).

Manipud kadagiti Nasantuan a Kasuratan

Alma 17:2–3; 31:5; Doktrina ken Katulagan 42:12–13; 84:85

Manipud iti Pakasaritaantayo

Impalagip kadatayo dagiti napalabas a propetatayo kas babbai nga addaantayo iti napateg nga akem kas mannursuro iti pagtaengan ken iti Simbaan. Idi Septiembre 1979, indawat ni Presidente Spencer W. Kimball (1895–1985) nga agbalin a “sister scriptorians.” Agbalinkayo nga iskolar wenno nalaing kadagiti nasantuan a kasuratan—a saan a tapno mangibaba kadagiti dadduma, ngem ketdi mangitag-ay kadakuada! Iti baet ti amin, asino ti addaan iti ania man a nain-indaklan a tulong tapno ‘ipateg’ dagiti kinapudno ti ebanghelio (a mabalin nga awaganda kadagiti kanito ti panagkasapulanda) no di dagiti babbai ken inna nga agar-aramid iti ad-adu a panangaywan ken panagisuro?”⁴

Mannursuro ken agsursurotayo amin. No mangisurotayo manipud kadagiti nasantuan a kasuratan ken kadagiti balikas dagiti sibibiag a propetatayo, matulongantayo dagiti dadduma pay nga umasideg ken ni Cristo. No makiramantayo iti proseso ti panagsursuro babaen dagiti napnuan kaipapanan a salsaludsod ken kalpasanna panangdengngeg, masarakantayo dagiti sungbat a mangipaay kadagiti personal a kasapulantayo.

Ania ti Maaramidko?

Kasano a makapagsaganaak tapno agbalinak a nalalaing a mannursuro?
Iburburayko kadi ti pammaneknekko kadagiti kabsat a babbai nga ay-aywanak?

© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti Visiting Teaching Message, July 2013. Ilokano.10667 864