Feia apî
Arata‘ihia e te Faaroo
Te ora ra te taata papa‘i i Caroline apatoeraa, no te mau Hau Amui no Marite
Eita roa e mo‘ehia ia’u i te ori-haere-raa na te tuhaa oire no Winter Quarters, Nebraska, no te mau Hau Amui no Marite, i reira te mau pionie i te oraraa e rave rahi matahiti i ma‘iri. E au ra e mea mo‘a te fenua, fatata roa mai te mea ra te haere ra vau na roto i hoê hiero i rapae au.
Ua î to’u mata i te roimata, ma te haamohimohi i to’u hi‘oraa. Ua ite atu vau i te hoê tii, aita râ e taa-maitai-hia te hoho‘a taata. I to’u tamâroraa i to’u roimata, ua ite atu vau i te hoê tane e hoê vahine tei î te hoho‘a mata i te mauiui. A hi‘o fatata ai au, ua ite atu vau i te hoho‘a mata o te hoê aiû e tarava ra i roto i te hoê menema i te pae o to raua avae.
Ua faaî teie hoho‘a ia’u i te aehuehu rahi : te oto, te riri, te mauruuru e te oaoa. Ua hinaaro vau e haamo‘e te mauiui ta teie mau feia mo‘a i farii, tera râ ua mauruuru atoa râ vau no ta ratou faatusiaraa no te evanelia.
Ua tauturu to’u iteraa i Winter Quarters ia’u ia ite mau e ua horo‘a te Metua i te Ao ra i te evanelia i Ta’na mau tamarii e ua vaiiho ia ratou te ti‘amâraa ia rave mai ta ratou e hinaaro. E nehenehe i na metua o teie aiû e ma‘iti e rave i te hoê haerea ohie. Te peeraa i te peropheta e te oraraa i te evanelia i titauhia i teie mau pionie no te haere i mua noa’tu e te auraa o te reira, o te hunaraa ïa i ta ratou mau tamarii i roto i te menema. Ua ma‘iti râ ratou ia rave i te evanelia i roto i to ratou oraraa e ia farii i to ratou tamataraa. Ua haapii mai au e te itoito o te feia mo‘a no te evanelia e to ratou onoono ia haere i mua ua arata‘ihia e te faaroo e te ti‘aturi – te ti‘aturi no te hoê ananahi anaana e te faaroo e ua matau maitai te Fatu ia ratou e e tamaruhia to ratou mauiui.