Parau poro‘i no te hahaereraa a te mau tuahine, Tiurai 2013
Haapiiraa’tu e te haapiiraa mai i te evanelia
A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa. No te mau haamaramaramaraa hau atu, a haere i ni‘a i te reliefsociety.lds.org..
Te Faaroo, Te Utuafare, Te Totauturu
Ua riro na Iesu Mesia ei hoê orometua haapii rahi. Ua horo‘a Oia i te hi‘oraa maitai no tatou a « haapii ai Oia i te mau vahine e rave rahi e i te vahine tata‘itahi, i ni‘a i te puromu e i te pae tatahi, i te apoo pape e i to ratou mau nohoraa. Ua faaite oia i te here e te hamani maitai ia ratou e ua faaora ia ratou e te mau melo o to ratou mau utuafare.1
Ua haapii Oia ia Mareta e ia Maria e « ua ani ia raua ia riro ei pĭpĭ Na’na e ia ô atu no te faaoraraa, ‘taua mea ti‘a ra’ (Luka 10:42) e ore roa hoi ta’na e riro ê ».2
I roto i ta tatou mau papa‘iraa mo‘a no te mau mahana hopea nei, ua faaue te Fatu ia tatou ia « haapii atu te tahi i te tahi ra i te haapiiraa evanelia no te basileia ». (PH&PF 88:77) No te haapiiraa’tu e te haapiiraa mai i te haapiiraa tumu, ua parau o Cheryl A. Esplin, tauturu piti i roto i te Peresideniraa rahi o te Paraimere e, « te haapiiraa mai ia ite papû roa i te mau haapiiraa tumu o te evanelia o te hoê ïa ohipa no te hoê oraraa taatoa e tae mai ïa na ‘nia iho i te faaue, ua a‘o, e ua na nia iho i te a‘o, te tahi vahi iti i ŏ nei, e mai reira hoi ei ŏ te tahi vahi iti’ (2 Nephi 28:30) ».3
A haapii mai ai tatou, a tuatapapa ai, e a pure ai, e haapii atu ia tatou na roto i te mana o te Varua Maitai, o te faatae atu i ta tatou parau poro‘i « i roto i te aau o te tamarii a te taata nei [e mau vahine] » (2 Nephi 33:1)
No roto mai i te mau papa‘iraa mo‘a
Alama 17:2–3 ; 31:5 ; Te Parau Haapiiraa e te Mau Parau Fafau 42:12–13 ; 84:85
No roto mai i to tatou aamu
Ua faahaamana‘o mai to tatou mau peropheta tahito ia tatou ei mau vahine e te vai ra to tatou hoê ti‘araa faufaa roa ei mau orometua haapii i roto i te fare e te Ekalesia. I te ava setepa 1979, ua ani mai te peresideni Spencer W. Kimball (1895–1985) ia tatou ia riro mai « ei mau tuahine aravihi i roto i te mau papa‘iraa mo‘a ». Ua parau oia : « Ia riro outou ei feia aivanaa no te mau papa‘iraa mo‘a – eiaha no te haafaufaa ore ia vetahi ê, no te faateitei râ ia ratou ! O vai ho‘i te vahine e hinaaro rahi nei i te ‘tape‘a maite’ i te mau parau no te evanelia (o ta ratou ho‘i e nehenehe e hi‘o atu i te mau taime hinaarohia) maori râ te mau vahine e te mau metua vahine o te aupuru e te haapii rahi nei ? »4
E mau orometua haapii tatou paatoa e e mau piahi. Ia haapii ana‘e tatou na roto mai i te mau papa‘iraa mo‘a e te mau parau a to tatou mau peropheta ora, e nehenehe tatou e tauturu ia vetahi ê ia haere mai i te Mesia ra. Ia faaô ana‘e tatou ia tatou i roto i te ohipa no te haapiiraa mai na roto i te uiraa i te mau uiraa maramarama e te faarooraa, e itehia mai ia tatou te mau pahonoraa o te pahono i to tatou iho mau hinaaro.
Eaha ta’u e nehenehe e rave?
-
Nahea vau ia faaineine ia riro ei hoê orometua haapii maitai a‘e.
-
E ti‘a anei ia’u ia faaite i to’u iteraa papû i te mau tuahine ta’u e haapa‘o nei ?
© 2013 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/12. Parau faati‘a no te iritiraa : 6/12. Iritiraa no Visiting Teaching Message, July 2013. Tahitian. 10667 895