Etop eke First Presidency, eke Ofiong Itiaba ke isua 2013
Ererimbot Eyom Mme Andibem iso Mfin Emi
Isang ediwak mme andikibem iso ke isua 1847 iketongoke ke Nauvoo, ye Far West, ye New York edi okotongo ke ayan ebiet nte England ye Scotland ye Scandinavia ye Germany. Mme nkpri ndito ikefiokke uto mbuotidem emi ekemende mme Ete ye Eka mmo okpong ufok idung, mme ufan, idongesit, ye ukpeme mmo.
Ekpri eyen ekeme ndibup Eka esie nte, “Eka Mi, ntak emi nnyin ikpongde ufok? Nnyin ika mmong?
“Tienne di, Ediye eyen, nnyin ika Zion, obio emi Abasi odude.”
Ke ufot ifure emi ikenyenede ke ufok nnyin ye enwongo nnyin ndiduk ke Zion, nkpo emi ekedide ubiongo ekedi akamba inyang ibom emi eke Atlantic. Anie ekeme nditing uto ndik emi ekemumde owo ke ndikanga inyang oro? Nte spirit onode mmo ndausung ye nte mbuotidem mmo ekemumde mmo akama, mme Ndisana andikibem iso emi ema eyene mbuotidem ke Abasi, ndien mmo etongo isang.
Ke mmo ema ekedisim Nauvoo ke akpatre, mmo ema efiak etongo isang enyung ekut ukut ke usung isang emi. Usung emi mmo ekesangade eto Nauvoo eka Obio Salt Lake okoyoho ye udi mme ofiok nkpo owo. Oruk nnaneyen emi ekesim mme andikibem iso emi. Okposuk edi nte ema ekebuk ikpokidem mmo ke emem, edi enying mmo eyedu ke nsinsi.
Idem otongo ndimem enang, ikpat wagon enam uyom, mme uko eren owo ebo ufen, ibit ekong osioro uyo, ebua ikot enyung efiori mkpo. Edi mme andikibem iso emi ema enyene mbuotidem ke ndisin ifik nka iso. Ediwak ini mmo ema ekwo:
Edi, edi, mme Ndisana owo, ekukop ndik ye utom ufen;
Edi ka usung mbufo ke inemesit.
Okposuk edi nte isang emi osongde,
Mfon eyeyoho usen mbufo. …
Kpukpru ofon ama! Kpukpru ofon ama!1
Mme andikibem iso emi ikefreke iko emi Jehovah eketingde: “Enyene ndidomo ikot Mi ke kpukpru nkpo man mmo ekeme ndibo ubong emi nkenimde nno mmo, kpa ubong eke Zion.”2
Nte ini ebede, nnyin ifiokke nditi nyung nkom mmo emi ekesangade usung emi okoyohode ye ubiak enyung, ekpong usung emi ye mmong eyet ye mme udi eke minyeneke enying. Edi mfina nnyin ke idahaemi etie didie? Nte usung itiat ndisanga iduhe, ikpo obot iduhe ndidok, usung ndisiak ye inyang ndifro inyung iduhe? Edi nte ufon iduhe mfin emi nnyin ediyak ukem spirit mme andikibem iso emi ndida nnyin mkpong usung mme idomo emi eyomde ndisobo nnyin nyung nda nnyin nsin ke ifure eke Zion?
Tongo ke mme isua emi ekenwanade World War II, mme Idiongo mfara ke idem ama aka iso ndibiara. Ubiat mbet otongo ndikpon; eti edu uwem aka iso ndisuhore. Ediwak mmo ke edori ke ukpat-nkpo nsobo enyung eyom usop-usop inemesit ke adanga nte mmo ebiatde nsinsi inemesit mmo. Usung ntem ke iduok emem nnyin.
Nnyin imefre nte mme Greek ye Romans ekesongde odudu edikara ererimbot eset ye usung emi ukara mmo ekekutde mbiara—ye nte mkpri ye ndimem nkpo ekekande owuri mmo ke akpatre, ke akpatre, ke itie eyenisong emi mmo ekeyomde, mmo ekeyom ukpeme ye eti inem uwem; ndien mmo ema enana kpukpru oro—idongesit ye ukpeme ye itie eyenisong.
Ekuyak idem eno ntabi eke Andidiok; edi, esongo eda eno akpaniko. Udong ukpong ikemeke ndikop uyuho ke ndiyom inemesit ke mbubiam ido ye idiok itong. Idioknkpo ikemeke ndida owo nka nti ido. Usua ikemeke ndino ima. Nyengidem ikemeke ndino uko. Eyihe ikemeke ndino mbuotidem.
Osong mme ubak owo ndikop nte mme ndisime esakde mmo nsahi enyung etingde idiok iko ebanga mfara ke idem, akpaniko, ye ndinim mbet Abasi. Edi edisanga ke eti usung edi nkpo eke ererimbot esede ke ndek. Kini ekedohode Noah ete obop ubom mme ndisime owo ewuk eyen ese afia ikpa enyong etongo ndisak nyung nting idiok iko—tutu edim otongo ndidep.
Ikafang ke nnyin inyene ndibo oruk ukpeb emi? Ini okpuhore, edi akpaniko ada ke itie esie. Kini nnyin isinde ndibo ukpeb oto ke nkpo-ntibe usen edem, nnyin iyefiak inam ukem ndudue eke edinode nnyin nkong ibuot, ukut, ye nnaneyen. Nte nnyin inyeneke ikike ndikop uyo nno Enye emi ofiokde utit ke ntongo —Obong nnyin emi akanamde ekekire eriyanga ukpong—nyung ntre ndikop uyo nno andidiok, emi asuade eti ekikere emi?
Dictionary anam anwanga ete ke andibem iso edi “owo eke asangade ke iso,ndinengere usung nnim man mbon efen ekeme nditiene enye.”3 Nnyin imikeme ndinyene uko ye nsongonda emi mme andikibem iso emi ekenyenede ke emana oko? Nte Ami ye mbufo ke akpaniko imekeme ndidi mme andibem iso?
Mmofiok nte nnyin imekeme ndidi. Oh, se nte ererimbot eyomde mme andibem iso mfin emi!
© 2013 eketode Intellectual Reserve, Inc. Ekpeme kpukpru mme unen. Ekeming ke USA. Enyimme eming ke Iko Mbakara: 6/13. Enyimme Ndikabare: 6/13. Ndikabare Etop eke First Presidency Message, July 2013. Efik. 10667 553
Ukpeb nkpo eketode Etop Emi
Nwed Abasi eting ete home teachers enyene “ndikpan, ndinam anwanga, ye ndikpeb, nyung nkot kpukpru owo edi etiene Christ.” (D&C 20:59). Kere banga ndisio item ye ebenge emi odude ke Etop eke President Monson nwut mmo emi mbufo ekade ndise. Mbufo emekeme ndinyene nneme ye mmo mbanga usung emi ekemeke ndifiok nyung ntiene eti uwutnkpo, ekpong nkari, enyung eda ukpeb ke ndudue mbon efen. Ebup mmo emi mbufo ekpebde usung emi mmo ekemeke ndidi mme andibem iso mfin emi.
Nkpri ndito ekeme ndikpeb mbanga mme andikibem iso emi ke ndikot nwed ekotde “Ke Usung Isang” oyoho ikpa 62 eke nwed emi.