Ennaan eo an Būreejtōnji eo Kein Kajuōn, Juļae 2013
Laļ in Eaikuji Paineer ro Rainin
N̄an elōn̄, iaļ eo an paineer ilo 1847 eaar jab ijjino ilo Nauvoo, Kirtland, Far West, ak New York ak ijjelo̧kin eaar ijjino ilo England, Scotland, Scandinavia, ak Germany. Ajri ro reddik remaron̄ kar jab lukkuun meļeļe tōmak in eļap eo eaar kareel ro jineer im jemāer n̄an likūt baam̧le eo, ro jerāer, aenōm̧m̧an eo, im kōjparok eo.
Juon eo edik emaron̄ kar ba, “M̧am̧a, etke jej em̧m̧akūt jān m̧weo im̧ōd? Ia eo jej etal n̄ane?”
“Itok ippa tok, nin̄nin̄ eo eaiboojoj; jej etal n̄an Zaion, bukwōn eo an ad Anij.”
Ikōtaan kōjparok eo m̧weo im jikin kalim̧m̧ur Zaion eaar jutak ioļaļap dān ko rekauwōtata im reļļap an Atlantic. Wōn emaron̄ bar kwaļo̧k mijak eo eaar kalimotak būruwōn armej ro ilo tōre in kijone ko rekauwōtata? Raar im̧we jen unoojdikdik ko an Jetōb eo, rejtake jen juon tōmak eo eaar pād ippāer, paineer Rikwojarjar ro raar lōke Anij im jerakļo̧k ilo iaļ eo aer.
Raar āliktata tōparļo̧k Nauvoo wōt n̄an bar jino jelm̧ae eppen ilo iaļ eo. Lōb ko an rimāletlet ro etto im dōkā ko raar kōkkaļeik aolepān iaļ eo jān Nauvoo n̄an Salt Lake City. Ekar baj oņāān eo me paineer ro jet raar bōke. Ānbwin ko aer raar kallib ilo aenōm̧m̧an, ak etāer raar mour m̧aanļo̧k wōt.
Kau ko remōk, neen waikōn ko retōn̄tōn̄, em̧m̧aan ro remōk, jilel in tariņae ko raar jilel, im kaio̧ti ko raar lamōj. Ak tōmak eo eim̧we im lan̄ eo ekajoor ļan̄in paineer ro kar wōnm̧aanļo̧k wōt. Jet iien raar al:
Armej, ro, Rekwojarjar, wōnm̧anļo̧k iben mōnōnō;
Bōlen ial eo ebin kiō.
Ak kom naj bōk An jouj,
Emanlok n̄ōn kij bwe jen jerbal wōt …
Aolep men naj emman! Aolep men naj emman!1
Paineer rein raar keememej naan ko an Irooj: Eaar ba bwe aolep armej ro An rej aikuj kajjieon̄ ilo men otemjej, bwe ren maron̄ m̧aanjebpopo n̄an bōk aiboojoj eo ewōr Ippān n̄an er, aaet aiboojoj eo an Zaion.2
M̧ōttan eo an tōre eo ej katinaad ememļo̧kjeņ ko ad im kadilo̧k ad kam̧oolol kōn aolep ro raar etetal ilo iaļ in metak, em̧m̧akūt jen juon kōkkaļe ejitōn bōro an lōb ko ejjeļo̧k ātaer. Ta apan̄ ko rainin? Ewōr ke iaļ ko redōkāke n̄an etetal, toļ ko redōkāke n̄an tallōn̄, ron̄ ko n̄an kijooni, iaļ ko rebwil, reba ko n̄an kijooni? Ak ewōr ke juon menin aikuj n̄an jetōb an paineer ro ej tōl ļo̧k kōj jān kauwōtata ko me rej kaam̧jak n̄an jakōļe kōj im tōl ļo̧k kōj n̄an juon kōjparok an Zaion?
Ium̧win jon̄oul iiō ko jen jem̧ļo̧kin Pata eo an Laļ in Kein Karuo, jon̄ok ko kōn erreo em̧ōj aer ettāļo̧k bar juon im bar juon. Oran jorrāān ko em̧ōj an ļapļo̧k; armej in jukjukinpād ko eļapļo̧k aer kaam̧jak doon. Elōn̄ armej rej pukōt jorrāān ko routiej im ko rettā ilo mour. Pukōt kam̧ōņōņō ko an jidik wōt iien. Ilo tōre in rej kaarmejete lan̄lōn̄ ko an indeeo. Wāween in jej joļo̧k aenōm̧m̧an.
Jemļo̧kļo̧k ekōjkan an RiGreek im RiRome kar waļo̧k ilo juon laļ enana im ekōjkan an wāween in epen kar jem̧ļo̧k—ekōjkan an juon m̧wil ejowan im emōjņo̧ āliktata anjo̧ ioer jān kakkure eo aer. Ilo jem̧ļo̧kin, eļapļo̧k jān aer kar kōņaan anemkwoj, raar kōņaan kōjparok im juon mour eainōm̧m̧an; im raar luuji aolepān—kaenōm̧m̧an im kōjparok im anemkwoj.
Jab leļo̧k maron̄ eo n̄an kapo an Satan; ijjelo̧kin, jutak pen kōn m̧ool. Jab polel ilo kōņaan an jetōb eo jamin naaj tōpar juon jem̧ļo̧kin kijejeto eo ekije n̄an lan̄lōn̄ ilubwilijin en̄jake ko reļļap an m̧ōņōņō im m̧wil emōjņo̧. M̧wil em̧ōjņo̧ ej jamin tōlļo̧k n̄an wānōk. Kōjdat ej jamin kareel iakwe. M̧wil in kakkure ej jamin letok peran. Pere ej jamin im̧we tōmak.
Jet rej lo pen n̄an jutak ņae kajjirere im kōnono ko rejjab em̧m̧an an juon eo ebwebwe kōm̧m̧an eo ettoon, m̧ool, im pokake n̄an kien ko an Anij. Ak laļ in em̧ōj an kōjaorōke pokake n̄an pedped ko. Ke Noa ekar bōk kōmeļeļe n̄an kalōk ark eo, armej eo ebwebwe ar reilōn̄ļo̧k n̄an mejatoto eo ejjab ekkōdo̧do im kōnono im kajjirere—m̧ae iien wōt eo eaar wōtlo̧k.
Eaikuj ke bwe jen ekkatak katak ko rekobwe ālij im bar ālij? Iien ej oktak, ak m̧ool eo ej wōnm̧aanļo̧k wōt. N̄e jej likjab n̄an bōk jeram̧m̧an jān en̄jake ko m̧okta, em̧ōj ad likjab n̄an bar kōm̧m̧ani kōn aolep metak in bar, en̄taan, im limō. Ejjeļo̧k ke ad jeļāļo̧kjeņ n̄an pokake E eo eaar jeļā jān jinoin n̄an jem̧ļo̧kin—ad Irooj, eo eaar kōm̧anm̧an karōk in lo̧mo̧o̧r eo—ijjeļo̧kin rikarejar eo, eo eaar jab iakwe aiboojoj eo an?
Juon tikjinede ej kōmeļeļeik juon paineer āinwōt “juon armej ej etal im̧aan n̄an kōpooj ak kōppeļļo̧k iaļ n̄an ro jet n̄an ļoore.”3 Jemaron̄ ke ilo jet wāween rōjan̄ peran im dim kōn jibadbad eo eaar kwaļo̧k kadkad in paineer ro an kar juon epepen? Emaron̄ ke kwe im n̄a, ilo m̧ool, erom paineer ro?
Ijeļā bwe jemaron̄ erom. O, ekōjkan an laļ in eaikuji Paineer ro Rainin!
© 2013 jen Intellectual Reserve, Inc. Aolep Jim̧we ko rej pād ippān. Jeje ilo USA. Kōmālim ilo kajin Pālle: 6/12. Kōmālim an ukook: 6/12. Ukook eo an First Presidency Message, July 2013. Marshallese. 10667 874
Katakin jān Ennaan In
Jeje ko rekwojarjar rej kōmeļeļeik bwe rūkaki in loļo̧k m̧ōko ro rej kakkōl, kwaļo̧k, rōjan̄, im katakin, im kūr aolep n̄an itok n̄an Kraist (Lale D&C 20:59). Ļōmņak in kwaļo̧k bwe kakkōļ ko im kūr ko rej kitbuuj ilo ennaan eo an Būreejtōn Monson n̄an kom̧ ro rej loļo̧k. Kwomaron̄ in kōnono ippāer kōn wāween ko n̄an kile im ļoor waanjon̄ok ko rejim̧we, kōjekdoon naan ko rej jab m̧ool, im ekkatak jān bōd ko an ro jet. Kajjitōk ippān ro kwoj katakin ekōjkan aer maron̄ erom paineer ro rainin.