Mulwol ko Bin Somm’on e Presidency, July 2013
Fare Fayleng e B’tuf boch e Pioneer Rok e Chiney
Ba yo’or e gidii, e lemnag ni fare milekag ko fapi pioneer ko 1847 e dani tabab u Nauvoo, Kirtland, Far West, fa New York machane u England ni fana palog, Scotland, Scandinavia, fa Germany. Bitir nib achichig ea daniyog ni nge nangfan gelngin e mich ni pi’ e athamgil ko galilabthir rorad ni ngar digeyed ea tabinaew rorad, pi fagaer, falag laniyaen’, nge paer ni dariy’ e magawon riy’.
Reb e bitir e sana ra fith, “Nina’, mongfan ni ngad digeyed ea tabinaew rodad? Nga dared ngan?”
“Moy nga dared, bitir nib t’uf; nga dared nga Zion, fare binaw ko fare Got rodad.”
Ma luk’ngun fare tabinaew rodad ni dariy’ e magawon riy’ nge fare michmicheg rok Zion ea bay fare daey nib gel e mad’ad riy’ fare daey ko Atlantic nib gaa’. Mini e rayog ni nge yog gelngin ea tomdag ni tay gumir’cha’en e girdii riy’ u nap’an ni ngan tha’ab nga barba? Fapi pining’ngaen ko fapi kathkath ko fare Kan ni Thothup, nge ayuw ko mich nib mom nibe paer, pi pioneer ni Gidii’en Got ea ri pagaen’gad ngak Got miyad yan ko milekag rorad.
Ere kar thap’gad nga Nauvoo ni kemus ni ngar sabliyed boch e magawon ko kanawo rorad. Malang nifan e yam nikan tay ea sage nge malang nga daken ea bay u n’umning e kanawo rorad u Nauvoo ngayan I taw nga Salt Lake City. Ireram pulwon ni pi’ boch e pioneers. Downgin rad ea kan ke’yag u fithik e gapas, machane fithngan rad ea be paer ni dariy’ numngin nap’an.
Garbaw ea kiri magaf, taya’ ko wagon ea be chobchob, pum’on nima athamgil ea murwel, nibe chob e drum ko mael’, mabe yan laman e coyotes. Machane fare mich-nima pining’ngaen nge yoko’nibe wawliy rad fapi pioneers ea kiyad be pi’ nga m’on. Yo’or yay niyad be yon’:
M’bad, m’bad, pi Girdii’en Got, dam tamdagad ko magawon fa murwel nib gel;
Machane mmared u fithik ea falfalaen’.
Dariy’ fan nib mo’maw ya’an e bineye milekag,
Garathia ea ra n’angin nge mangil me moem. …
Mangil e gubin! Mangil e gubin!1
Tineye pioneers e pug’uran’rad ko fapi thin ko fare Somoel nap’an ni yog ni fapi gidii Rok ea ran sikeng nagrad u gubin banen, ya ngayog ni ngar gamangad ni ngar feked boch e rir’ nibay Rok ni fan ngorad, ka arragon fare rir’ ku Zion.2
Fare rran nike thimur ea be nangin dad ngad pagtilined mabe n’ag e magaer rodad ko pi cha’en nikar ranoed ko fapi milekag nib gafgow, niybe digey u tomur boch e malang ko yam’ ni dariy’ fithngey riy’. Machane uw rogon ko pi magawon ea daba’? Ya dariy’ boch e kanawo nib momaw, fa birey nib tolang ni ngan gararaw ngay, fa ba loew ni ngan tha’ab nga barba’, fa wo’ ni ngan tomilang nag, fa bpa’ I lul’ ni ngan tha’ab nga barba’? Ya ribe t’uf e chiney fare ya’el ko pioneer ni nge wawliy dad nga wuru ea magawon nira yog ni nge liyegdad me wawliy dad ngareb e Zion nib pagan’uy riy’?
U lan bukum e duw nga tomren fare World War II, ma fapi standard ko paer ko yafos ea be sobut’ biyay nge biyay. Tagan ea be yo’or; ma tin nib mangil e be buch’uw. Yo’or e bay u reb e yafos niybe gaey e tin nib kireb nib gaa’ fa ba achichig ko magawon, niybe gay ea falfalaen nifan e chiney ma yibe maligach nag e tin nib falfalaen nifan e yafos ni dariy’ num’ngin nap’an. Ere gidad be n’ag e gapas.
Kad pagtilined rogon ni monog fapi Greeks nge Romans nib mangil rogon ko bangiyal ko fayleng nib momaw e paer nge rogon ni m’ay ea raney — rogon ni kireb nagrad e mal’mal’ nge mo’waer. Mayan I tomur, nib gel ko adag rorad ko paer nib puf rogon, e yad be athpeg ni ngan aywegrad nge yafos nib mangil; miyad n’ag ni gubin — paer nib mangil nge ayuw ngorad nge paer nib puf rogon.
Dammu pagem ko pi lumel rok Satan; machane, mu sakiy ni gab dugil u but nifan ko tin riy’ul. Pi ar’ar ko yael ea dabiyog ni ngan gamaneg ko ngiyal niybe gaey ea falfalaen’ u fithik ea denen. Denen ea darma fekey ko macholbog. Fananikan ea darma yognag e tu’feg. Murus e darma pi e athap. Maer’waer ea darma pining’ngaen e mich.
Boch e ma patag nib momaw ni ngan monog u fithik e moning nge nonnon ko gidii nib meechiyang e kiybe moning nag falan e dowef, yul’yul’, nge mafol ko pi motochiyel rok Got. Machane fare fayleng ea gubin ngiyal nima dariy’ fan nage liyor ko tin nib gaa’ fan. Nap’an nikan yog ngak Noah ni nge toy fare arke, urgin fapi gidii nib meechiyang ea ri sapgad ko lang ni dariy’ e ba magulang riy’ miyad moning —ngayan I taw ko ngiyal nike taw e n’uw.
Rib t’uf rodad ni ngad filed boch e lowan nib gaa’ pulwon biyay nge biyay? Tayim e ma thil, machane riy’ul e ma monog. Nap’an ni gidad ra mul’ ni dabdi filed ko pinen nike buch kakrom, mar dabisiy ni gidad ra sul u daken u fithik gubin e amith ko gumir’cha’, gafgow, nge amith ko yael. Dariy’ a ganop rodad ni ngad folgad Rok ni ir e manang tabolngin ko tungun —Somoel rodad, ni ire ngongliy fare tunom ko tanom ko fas ko yam’—ko bin ni fare porchoyog, nibe fananikan fal’ngin.
Reb e dictionary e beyog fan e pioneer ni “bee nima yan u m’on ni nge falag rogon fa bing e kanawo ni fan ngak boch e gidii ni ngar laked.”3 Rayog ni ngad monog niged e athpeg nge dugil u wun’dad nibay fan niwad pangin reb fapi pioneers koreb e mfen? Rayog ni gur nge gag, ea ra riy’ul, ni gidad reb e pioneer?
Gumnang ni rayog rodad. O, fare fayleng e ke t’uf ea pioneer rok e daba!
© 2013 ko Intellectual Reserve, Inc. Gubin ni mat’won ma bay. Kan yoloey u Merika Kan micheg nag ko thin nu Ngalis: 6/13. Micheg nag i pilyeg: 6/13. Ni pilyeg ko First Presidency Message, July 2013. Yapese. 10667 905
Rogon ni ngan Fil ko Biney e Mulwol
Fapi chep nib thothup ea beyog ni fapi sensey ko tobnaw are ngar “ta’magaran, yogfan, ngan ta’lignin, man fil, man pining gubin ni ngar boed ngak Kristus” (D&C 20:59). Mu lemnag ni ngam yip fan fapi ta’magaran nge pong ni bay ko mulwol rok President Monson ngak ko picha’en ni gabe yan munang farad. Sana gara adag ni ngam weliy ngorad boch wo’en ni ngan poy man fol ko pi pow nib mat’aw, palog ko tin nib baen’, man fil ko kireb ko boch e gidii’. Mu fith e picha ni gabe fil ngorad rogon ni rayog ni ngan mang reb e pioneer e daba’.