Poraus seni ewe Aewin Presetensi, August 2013
Esinna, Chechemeni, me Pwarata Kinisou
Kot a tingoreikich ach sipwe pwarata kinisou ngeni I ren ekkewe feioch meinisin sia angei me ren I. Mi mecheres ach sipwe chok epini sefani ekkewe kapasen ach kewe iotekin kinisou, nge ese fen fiti ennetin netipach ne pwarata ach kinisou pwe eu niffangen netipach ngeni Kot. Mi namwot ach sipwe pwarata kinisou non ewe Ngun (D&C 46:32) pwe sia tongeni mefi ennetin kinisou faniten met Kot a ngeni kich.
Ifa usun sia tongeni chechemeni mwo ekkis chok met Kot a fori fan itach? Ewe Aposel John a makketiw met ewe Chon Amanau a aiti kich usun eu niffangen achechem a feito seni ewe niffangen ewe Ngun mi Fel: “Ewe Ngunupin, Ewe Chon Anisi, i ewe Sam epwe tinato fan itei, epwe aiti ngeni kemi mettoch meinisin o epwe achechema ngeni kemi mettoch meinisin minne ua fen ereni kemi” (John 14:26).
Ewe Ngun mi Fel a wisen awora achechemen met Kot a fen aiti kich. Me eu napanapen an Kot osukun ngenikich a feito ren An kewe feioch; iwe, ika sia finata ach sipwe anganga ach nuku, ewe Ngun mi Fel epwe esenipato achechemen an Kot kirokiroch ngeni kich.
Ka tongeni pwisin sotuni non om iotek ikenai. Ka tongeni tapweno ewe annuk minne a apasa pwe kopwe pwarata kinisou ngeni ewe Samon om Kot ren mettoch meinisin (D&C 59:7).
Preseten Ezra Taft Benson (1899–1994) a apasa pwe iotek a awora fansoun ach sipwe pwarata kinisou. A apasa: “Eu fansoun ewe Soufos Joseph Smith a era pwe eu nein ekkewe tipis watte minne ekkewe Aramas mi Pin non Fansoun Soponon repwe fori ena ewe tipisin ese wor kinisou. Ai nuku chommong neich sise fen ekieki pwe ena eu tipis watte. Napengeni non ach kewe iotek ngeni ewe Samon sia chok kan tingor an epwe ngeni kich pwan ekkoch feioch. Nge fan ekkoch ua mefi pwe mi namwot ach sipwe fen awatteno ach iotekin kinisou faniten ekkewe feioch sia fen angei. Sia kan pwapwaiti chommong mettoch.”1
A tongeni fis ngonuk ei sokkun mettoch ikenai ren ewe niffangen Ngun mi Fel. Ka tongeni poputani om iotek non monomon ren kapasen kinisou. Ka tongeni poputa ne anneani om kewe feioch mwirin kopwe chok anchang. Ika ka anganga om nuku, ren ewe niffangen Ngun mi Fel, kopwe kuna pwe achechemen chommong feioch repwe amasoua tupuwom. Ika ka poputa ne pwarata kinisou ren eu me eu feioch, meni om iotek epwe ekkis nangatam. Achechem epwe feito, fitifengen me kinisou.
Ka tongeni sotuni ei sokkun nupwen ka makketiw och mettoch non noum we puken achechem. Ewe Ngun mi Fel a anisi aramas ren ei sokkun seni chok nepoputan fansoun. Non ewe puken Moses a apasa pwe echo puken achechem a mak non fosun Adam me non ena puk a apasa pwe ika emon aramas a kokkori iten Kot an epwe mak me ren ewe ngunun pwarata an tingor mi chok pwonueta (nengeni Moses 6:5).
Preseten Spencer W. Kimball (1895–1985) a awewe usun ena angangen mamak fan pwarata: “Ekkewe ir ra mamak non echo puken achechem repwe pwan chechemeni ewe Samon non manauer ran me ran. Sia tongeni anneani ach kewe feioch me non nouch kewe puken achechem pwe sipwe ettetenatiw ach kewe feioch faniten mwirimwirich kewe.”2
Nupwen ka poputa ne mamak, ka tongeni pwisin eisinuk, “Ifa usun Kot a efeiochuei me ekkewe ir ua tongei ikenai?” Ika ka foffori iei chok usun fiti nuku, kopwe kuna pwe ka chechemeni om kewe feioch. Iwe fan ekkoch epwe wor ekkoch niffang mi achechemeto ngonuk en mi tumunungaw ne esinna non ewe ran nge mwirin kopwe sinei pwe ewe poun Kot mi ku manauom.
Ua iotek pwe sipwe soposopweino ach achocho non nuku ne esinna, chechemeni, me pwarata kinisou faniten met Semach won Nang me ach Chon Amanau ra fen fori o ra sopweino ne fori ne suki ewe an epwe eniwinitikich ngeni Ir.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun First Presidency Message, August 2013. Chuukese. 10668 901
Afanafan seni ei Poraus
Non an poraus, Preseten Eyring a tingorei kich ach sipwe chechemeni an Semach won Nang kirokiroch non ach kewe iotek. Kopwe poporaus fengen ren ekkewe ka aitir won ifa usun iotek fiti kinisou epwe anisi kich ne esinna ewe poun Kot non manauach. Ekieki ika mi och om kopwe fotupukutiw ne iotek ren ekkewe ka aitir iwe kopwe tingorei ewe emon epwe iotek an epwe chok pwarata kinisou.
Ka pwan tongeni statini ewe auchean kinisou ren om kopwe anneani ekkei wokisin kapach fengen ren ekkewe Preseten Eyring a kapas usun: Konupin 100; Mosaia 2:19–22; Alma 26:8; 34:38; Doctrine and Covenants 59:21; 78:19; 136:28.