Mensahe ti Umuna a Panguluen, Agosto 2013
Bigbigen, Laglagipen, ken Pagyamanan
Kidkiddawen ti Dios nga agyamantayo Kenkuana kadagiti ania man a parabur nga aw-awatentayo manipud Kenkuana. Nalaka kadatayo a dagdagullitentayo kadagiti kararagtayo ti panagyaman, masansan nga ulit-ulitentayo dagiti isu met la a balikas ngem awan ti panggeptayo nga agyaman a kas naimpusuan a sagut iti Dios. Nasken nga “agyamantayo … iti Espiritu” (DkK 46:32) tapno mariknatayo ti pudno a panagyaman iti naitednan kadatayo.
Kasano a malagiptayo uray ti maysa a kapaset laeng ti amin nga inaramidnan para kadatayo? Insurat ni Apostol Juan no ania ti insuro ti Mangisalakan kadatayo maipapan ti maysa a sagut ti pananglaglagip a sumangbay babaen ti sagut ti Espiritu Santo: “Ngem ti Mangliwliwa, ti Espiritu Santo, nga ibaonto ni Ama iti naganko, isu isuronanto kadakayo dagiti amin a banag, ket ipalagipnanto kadakayo dagiti isu amin a banag, nga imbagak kadakayo” (Juan 14:26).
Ti Espiritu Santo ti mangipalpalagip kadatayo iti no ania ti insuron ti Dios kadatayo. Ket maysa kadagiti wagas nga isursuro ti Dios kadatayo ket adda kadagiti paraburna; ket ngarud, no pilientayo ti mamati, ipalagipto ti Espiritu Santo dagiti kinasayaat ken kinaimbag ti Dios.
Mabalinyo a padasen dayta iti kararag ita nga aldaw. Mabalinyo a suroten ti bilin nga “Agyamankayo iti Apo a Diosyo iti amin a banag” (DkK 59:7).
Insingasing ni Presidente Ezra Taft Benson (1899–1994) a ti kararag ket mangparnuay iti oras a panangaramid iti dayta. Kinunana: “Kinuna ni Propeta Joseph Smith iti maysa a gundaway a maysa kadagiti kadagsenan a basol a pagbasolan dagiti Santo iti Ud-udina nga aldaw ket ti basol ti kinainggrata wenno kinaawan panagyaman. Mamatiak a kaaduanna kadatayo ti saan a mangipagarup iti dayta a kas maysa a nadagsen a basol. Adda dakkel nga ayo para kadatayo kadagiti kararagtayo ken kadagiti ararawtayo iti Apo nga agkiddaw kadagiti nayon pay a parabur. Ngem no dadduma mariknak a kasapulantayo ti agkararag iti ad-adu pay a pangipeksaantayo iti panangbigbig iti pateg ken panagyaman kadagiti parabur a naawattayon. Nakaad-adu dagiti paraburtayo.”1
Mabalin a maaddaankayo met iti kasta a padas ita babaen ti Espiritu Santo. Mabalinyo a rugian ti kararagyo nga agmaymaysa babaen iti panagyaman. Mabalinyo a rugian a bilangen dagiti paraburyo ket kalpasanna agsardengkayo iti apagkanito. No usarenyo ti pammatiyo, babaen ti sagut ti Espiritu Santo, matakuatanyonto a mapnonto ti panunotyo kadagiti lagip maipapan kadagiti dadduma pay a parabur. No rugianyo nga ipeksa ti panagyaman para iti tunggal maysa kadagitoy a parabur, mabalin a napapaut pay bassit ti kararagyo ngem iti gagangay. Addanto pananglagip, ken kasta met nga addanto panagyaman.
Mabalinyo a padasen met ti kastoy no agsuratkayo iti journalyo. Tinulonganen ti Espiritu Santo dagiti tao iti dayta manipud pay iti punganay ti panawen. Malagipyo a kuna ti libro ni Moises, “Ket naidulin ti libro a pakalaglagipan, a nakaisuratan, iti pagsasao ni Adan, ta naited kadagiti amin a nagkiddaw iti Dios babaen ti espiritu ti pammaregta” (Moises 6:5).
Inlawlawag ni Presidente Spencer W. Kimball (1895–1985) dayta a proseso ti naparegta a sinurat: “Dagiti agim-imet iti libro a pakalaglagipan ket ad-adda a manglaglagip iti Apo iti inaldaw a panagbiagda. Dagiti journal ket maysa a wagas a pangbilangan kadagiti paraburtayo ken pangibatian iti maysa a pakasaritaan maipapan kadagitoy a parabur tapno basaen dagiti kapuonantayo.”2
Bayat ti panangrugiyo nga agsurat, mabalinyo a saludsoden ti bagiyo, “Kasano a pinaraburannak ti Dios ken dagiti ipatpategko ita nga aldaw?” No masansan nga aramidenyo dayta ken addaan iti pammati, matakuatanyonto mismo a malaglagipyon dagiti parabur. Ket no dadduma malagipyonto dagiti sagut a saanyo nadlaw kabayatan ti aldaw ngem kalpasanna maammuanyonto a dagitoy ti impluensia ti Dios iti biagyo.
Sapay koma ta agtultuloy nga ikarigatantayo a sipapammati ti mangbigbig, maglaglagip, ken pagyamanan no ania ti inaramiden ken ar-aramiden ti Nailangitan nga Amatayo ken ti Mangisalakantayo a manglukat iti dalan nga agsubli Kadakuada.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti First Presidency Message, August 2013. Ilokano. 10668 864
Panangisuro manipud iti daytoy a Mensahe
Iti mensahena, aw-awisennatayo ni Presidente Eyring a manglagip kadagiti kinasayaat ken kinaimbag ti Nailangitan nga Ama kadagiti kararagtayo. Ilawlawagyo kadagiti sursuruanyo no kasano a makatulong kadatayo a mangbigbig iti impluensia ti Dios iti biagtayo ti panagkararag nga addaan panagyaman. Ibilangyo ti panagparintumeng a makipagkararag kadagiti sursuruanyo ket isingasingyo iti mangisao iti kararag nga ipeksana laeng ti agyaman.
Mabalinyo pay nga adalen ti kinapateg ti panagyaman babaen ti panangbasa kadagitoy a bersikulo kas pangnayon kadagiti bersikulo a dinakamat ni Presidente Eyring: Salmo 100; Mosiah 2:19–22; Alma 26:8; 34:38; Doktrina ken Katulagan 59:21; 78:19; 136:28.