Mensahe iti Visiting Teaching, Agosto 2013

Welfare

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset ti bukodyo a biag. Para iti ad-adu pay nga impormasion, mapan iti reliefsociety.lds.org.

Pammati • Pamilia • Tulong

Dagiti panggep ti welfare ti Simbaan ket tumulong kadagiti miembro nga agpannuray iti bukodda a kabaelan, agaywan kadagiti marigrigat ken agkasapulan, ken mangted iti serbisio. Ti welfare ket maisentro iti aramid ti Relief Society. Insuro ni President Henry B. Eyring, Umuna a Mamagbaga iti Umuna a Panguluen:

“Nangipaayen [ti Apo] manipud pay idi punganay ti panawen kadagiti wagas a pakatulongan dagiti disipulona. Inawisna dagiti annakna a mangted-pateg wenno mangkonsagrar iti panawenda, iti kinabaknangda, ken iti bagbagida tapno makikaysa Kenkuana iti panagserbi kadagiti dadduma. …

Inawis ken binilinnatayo a makiraman iti aramidna a mangitag-ay kadagiti agkasapulan. Agaramidtayo iti katulagan nga aramidentayo dayta kadagiti danum ti panagbuniag ken kadagiti nasantuan a templo ti Dios. Pabaruentayo ti katulagan kadagiti Domingo no makiranudtayo iti sakramento.”¹

Babaen ti panangiturong ti bishop wenno branch president, tumulong dagiti lokal a dadaulo iti naespirituan ken naindagaan a pagimbagan. Dagiti gundaway a pakapagserbian iti masansan ket mangrugi kadagiti visiting teacher nga agkalikagum iti pammaregta tapno maammuan no kasano a sungbatan dagiti kasapulan ti tunggal babai a sarungkaranda.

Manipud kadagiti Nasantuan a Kasuratan

Lucas 10:25–37; Santiago 1:27; Mosiah 4:26; 18:8–11; Doktrina ken Katulagan 104:18

Manipud iti Pakasaritaantayo

Idi Hunio 9, 1842, binilin ni Propeta Joseph Smith dagiti kakabsatna a babbai iti Relief Society a “mangpagin-awa kadagiti napanglaw” ken “mangisalakan kadagiti kararua.”² Dagitoy a panggep a tun-oyen ket adda pay laeng iti sentro ti Relief Society ken maipeksa iti pagsasaotayo a “Ti ayat saan a maibus uray kaano” (1 Taga Corinto 13:8).

Ti maikalima a sapasap a presidente ti Relief Society, ni Emmeline B. Wells, ken dagiti mamagbagana ti nangirugi iti daytoy a pagsasao iti 1913 kas palagip kadagiti pangbangon a pagbatayan: “Ipakdaarmi daytoy ti panggepmi a … [mangpetpet] a naimbag kadagiti naparegta a pannursuro ni Propeta Joseph Smith idi impalgakna ti plano a pakabilgan dagiti babbai babaen ti panangawag iti priesthood a magrupogrupo kadagiti mayannatup nga organisasion para iti panggep ti panagserbi kadagiti masakit, panagtulong kadagiti agkasapulan, panangliwliwa kadagiti babbaket ken lallakay, panangballaag kadagiti awan annadna, ken panangtulong kadagiti ulila.”³

Iti agdama addaan ti Relief Society iti sapasap nga impluensia kabayatan ti panangiburay dagiti kabsat a babbai iti ayat wenno asi, ti natarnaw nga ayat ni Cristo, kadagiti padada a tao (kitaen itiMoroni 7:46–47).

Ania ti Maaramidko?

Kasano nga agsagsaganaak a mangaywan iti bagik ken iti pamiliak a naespirituan ken naindagaan?
Kasano a masurotko ti pagwadan ti Mangisalakan bayat ti panangtulongko a mangipaay iti kasapulan dagiti kabsat a babbai nga ay-aywanak?