Mulwol ko Bin Somm’on e Presidency, August 2013
Guy, Sulaen’um, min Pinning e Magaer
Got e ma ning ngodad ni ngad pinninged e magaer Ngak ni fan ko urngin e tawath nike pii’ ngodad. Ma rib moem ni ngad maelmael gaed ko pi meybil rodad ko magaer, ni ngad rogned pi thin ni t’abrogon ma gathi nu dakaen e pangiy nib sug ko magaer rok gumircha’dad ngak Got. Thingar da “pii’ed e magaer … udakaen e Kan Thothup” (D&C 46:32) ni nge yoeg e magaer nib yul’yul’ ngodad ko tin ke pii’ Got ngodad.
Ma uragon ni ngad sulaen’dad ko bang ko pin’en ke rin’ Got ni fan dad? Fare Apostle ni John e ke yoloey e tin ni ke fil rogon Somoel ngodad marnga’agen e tawath ni sulaen’uy nra yib udakaen e tawath ko Kan Thothup: “Ma en ni bay i ayuwegmed e aram fare Kan Nthothup, ni en ni Chitamangiy e bayi l’oeg nge yib ni owcheg, ma bayi fil urngin ban’en ngomed, me ayuwegmed nge mit ngomed urngin e tin kug weliy ngomed” (John 14:26).
Kan Thothup e ma sulaen’dad ko pin’en ke fil rogon Got ngodad. Ma reb rogon ni Got ma sensey nagdad e u dakaen e pi tawath rok; ma ere, f’anre ngad michaen’ daed, fare Kan Thothuop era sul ko tin bugol rok Got nga laniyaen’dad.
Rayog ngam sikeng nag e ren’ey ko pi meybil rom e daba’. Ku rayog ni ngam fol re motochiyel “Gur ngam oge magaer ngak Somole ni Got rom ni fan gubin pin’en” (D&C 59:7).
President Ezra Taft Benson (1899–1994) ke weliy ni pi meybil rodad e rayog nag fan e pin’ey. Ni ga’ar: “Fare Profet ni Joseph ke yoeg faram ni reb e denen nib tagan ko picha’ ni Gidii’en Got ko Tin Tomur e Rran e dar oged e magaer rorad. Gu lemnag ni dab kug lemniged riy ni piney e denen nib ga’ fab tagan. Yalen rodad e bingyal’ ngad ninged Somoel u fithik pi meybil rodad ni fan ko pi tawath nib yo’or. Machane boch ngiyal guma lemnag ni thingar da fal’eg bang ko pi maybil rodad ni ngad pinninged e magaer ni ngad rogned e falflan’ rodad ni fan ko pi tawath ni bay rodad e chiney. Bay yo’or e tawath rodad.”1
Rayog rom t’abrogon e falflan’ ney ko tawath ko Kan Thothup e daba’. Rayog ni ngam tabab e meybil ni yigo’ gur ko pi magaer rom. Rayog ni ngam thiyeg e pi tawath rom mag soen ngam lemnag marnga’agen boech ngiyal’. F’anre mu michaen’um, rok e tawath ko Kan Thothup, ram pirieg ni bayo’r e tawath nikan pii’ ngom era sulaen’um. F’anre mu tabab ni ngam oge magaer ko urgin e pin’em, meybil rom e ra mang nib n’uw ko meybil ni game pii’. Rayib e pug’uran’, ma ka arragon e oge magaer riy.
Rayog ni ngam ngongoliy nib t’ab rogon u dakaen e pi journal rom. Kan Thothup e ke ayuweg e gidii’ ni ngar puguran gad amrogon chiney mada’ ko kakrom. Be sulaen’ um ni babyor ni Moses e ga’ar, “Ma bay e chep nu magaer e kan yoloey, ni kan yoloy nga dakaen, u thin rok Adam, ya kan pii’ ngak picha’ ni kar meybil gad ngak Got mar yoloyed u dakaen e yalen ni yi’iy” (Moses 6:5).
President Spencer W. Kimball (1895–1985) e key weliy fan e yalen ni yi’iy ko yoley: “Picha’an nibe yoloyed e ti rorad u babyor e t’ab rogon ko picha’an nibe sulaen’rad Somoel nga lan pi yafos rorad. Pi journal e rebe rogon nib fel’ ni ngad thiyeg e pi tawath rodad min weliyed fan e pi tawath ney ngak pifak dad nga m’on.”2
Napan gabe yoloey, mangil ni ngam lemniged ni, “Uragon ke tawath Got nigeg e daba’ nge picha’ nib t’uf rog?” F’anre mu rin ni amrogon nu fithik e michaen’ rom, ram pirieg ni ke sulaen’ um ko pi tawath rom. Ma bingyal’ ra sulaen’ um ko pi tawath ni dab kum lemnag riy napan nike buch machane chirofen nem ram nang ni pin’en e pow u pa’ Got ko yafos rom.
Gube meybil ni rayog ni ngad yul’yul’ gad ni ngad guyed, sulaen’dad ngay’, min pinning e magaer ko tin Chitimangdad nu Tharimy nge Somoel e kar rin’ed ni fan dad ni ngar binged e kanawo’ ni ngad suled Ngorow.
© 2013 ko Intellectual Reserve, Inc. Gubin ni mat’won ma bay. Kan yoloey u Merika. Kan micheg nag ko thin nu Ngalis: 6/13. Micheg nag i pilyeg: 6/13. Ni pilyeg ko First Presidency Message, August 2013. Yapese. 10668 905
Rogon ni ngan Fil ko Biney e Mulwol
Ko mulwol rok, President Eyring ma pinning dad ni ngad sulaen’dad ko pi bugol rok Chitimangdad nu Tharmiy ko pi meybil rodad. Mu pirieg ned ko picha’an nibe sensey nag ni uragon e pi meybil kan sug ko magaer e ra ayuwegdad ni ngad guyed pa’ Got ko yafos rodad. Mu lemnag ni ngam rugbug nga but’ ko picha’an nibe sensey nag min ning ko cha’ nibe pi’ e meybil ni ngan meybil kemus ko tin ni magaer rok.
Ma ku rayog ni ngam fil rogon ni mang fan ba fel’ e magaer nu dakaen e pi verse ney ma pi verse nike pii’ President Eyring: Psalm 100; Mosiah 2:19–22; Alma 26:8; 34:38; Doctrine and Covenants 59:21; 78:19; 136:28.