iVaqa ni Veisiko, Okosita 2013

Welefea

Vulica ena masumasu na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na marama oqo me yaco na iSoqosoqo ni Veivukei me dua na tiki bulabula ni nomu bula vakai iko. Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Na inaki ni welefea ni Lotu oya me vukei ira na lewenilotu mera bula rawati ira, me vukei ira na dravudravua kei na vakaloloma, ka mera na dauveiqaravi. Na welefea e sa muataki donu ki na cakacaka ni iSoqosoqo ni Veivukei. E vakavulica o Peresitedi Henry B. Eyring, na iMatai ni Daunivakasala ni Mataveiliutaki Taumada:

“[Na Turaga] sa vakarautaka na veisala mai na itekivu ni gauna vei ira na nona tisaipeli mera na dauveivukei. Sa sureti ira tu na Luvena mera solia na nodra gauna, na ka era taukena, kei ira vakaiira mera tomani Koya ena nodra vukei na tani. …

“Sa sureti ka vakaroti keda o Koya meda vakaitavi ena Nona cakacaka ni vueti cake o ira na vakaloloma. Eda cakava e dua na veiyalayalati ni da na vakayacora oya ena wai ni veipapitaisotaki vakakina ena valetabu ni Kalou. Eda vakavouia na yalayala oqori ena Sigatabu ni da vakayagataka na sakaramede.”¹

Ena ruku ni veiliutaki ni bisopi se peresitedi ni tabana, era sa na veivuketaka tiko na iliuliu na veivakaukauwataki vakayalo kei na kena vakayago. Na madigi ni veiqaravi e dau tekivu sara ga vei ira na dausiko vuvale ka dau vaqara na veivakauqeti mera kila kina na iwalewale ni kena sotavi na gagadre ni marama yadua era sikova.

Mai na iVolanikalou

Luke 10:25–37; Jemesa 1:27; Mosaia 4:26; 18:8–11; Vunau kei na Veiyalayalati 104:18

Mai na Keda iTukutuku Makawa

Ena ika 9 ni June, 1842, a bolei ira kina na marama ena iSoqosoqo ni Veivukei na Parofita o Josefa Simici mera “vukei ira na dravudravua” ka “vakabula na yalo.”² Na lalawa ka oqo e se tiko ga ena uto ni iSoqosoqo ni Veivukei ka sa dau vakatakilai tu ena noda ibole, “Sa Sega ni Mudu na Loloma” (1 Korinica 13:8).

Ena 1913, ratou a tavoca kina o Emmeline B. Wells, na noda ikalima ni peresitedi raraba ni iSoqosoqo ni Veivukei, kei rau na nona daunivakasala na ibole oqo me ivakananumi ni noda ivakavuvuli tauyavu: “Eda sa vakaraitaka me noda inaki ni … [taura] matua na ivakavuvuli veivakauqeti nei Parofita Josefa Simici ena nona vakatakila na ituvatuva e rawa ni ra na doudou kina na marama mai na veikacivi ni matabete mera na cokotivata vakaisoqosoqo veiganiti ena inaki ni nodra vakacegui na tauvimate, vukei na vakaloloma, vakalomavinakataki na qasecake, vakasalataki na gogo, kei na nodra vukei na luveniyali.”³

Nikua era sa roboti vuravura na iSoqosoqo ni Veivukei ena nodra sa dodoliga na marama mera veivuke ena loloma dina va-Karisito kivei ira na wekadra (raica na Moronai 7:46–47).

Na Cava e Rawa Niu Cakava?

Meu na qaravi au vakacava kei na noqu matavuvale ena neitou bula vakayalo kei na bula vakayago?
Meu muria vakacava na ivakaraitaki ni iVakabula ena noqu veivuke tiko ni sotava na gagadre ni marama au qaravi ira tiko.