iTukutuku ni MataveiliutakiTaumada, Okosita 2013
Kidava, Nanuma, ka Vakavinavinakataka
Na Kalou ena vinakata meda dau vakavinavinakataka na veivakalougatataki cava ga eda ciqoma mai Vua. Dau rawarawa tu na noda veimoiyaka na vakacabo masu ni vakavinavinaka, ka qai tokaruataka wasoma na vosa vataga ia ka sega na kauwai meda vakaraitaka kina na vakavinavinaka ni lomada me isolisoli vua na Kalou. Meda “vakavinavinaka” … vaka-Yalo” (V&V 46:32) meda na vakila vakaidina ena vakavinavinaka na veika sa solia vei keda na Kalou.
Meda na nanuma vakacava na veika lalai kece e sa cakava vei keda na Kalou? Na iApositolo o Joni a vola na ka e vakavulica vei keda na iVakabula me baleta na isolisoli ni veivakananumi ka lako mai ena isolisoli ni Yalo Tabu: “Ia, na Dauveivakacegui na Yalo Tabu, ko koya ena tala mai ko Tamaqu ena yacaqu, ena vakavulici kemudou ena ka kecega kau a vosataka vei kemudou” (Joni 14:26).
Ena kauta lesu mai na Yalo Tabu ena noda vakasama na veika sa vakavulica vei keda na Kalou. Dua na sala e vakavulici keda kina na Kalou o ya mai na Nona veivakalougatataki; ka sa ikoya, kevaka eda digitaka meda cakacakataka na vakabauta, ena vakauta lesu mai na Yalo Tabu ki na noda vakanananu na yalololoma ni Kalou.
Ena rawa ni ko vakatovolea ena masu nikua. Sa rawa ni o muria na ivakasala “Mo vakavinavinakataka vua na Turaga na nomu Kalou na nona isolisoli kecega” (V&V 59:7).
A vakatura o Peresitedi Ezra Taft Benson (1899–1994) ni masu ena vakavuna na caka ni ka o ya. Kaya o koya: “E a kaya na Parofita o Josefa ena dua na gauna ni dua na cala levu era na vakacalai kina na Yalododonu Edaidai sa ikoya na cala ni sega ni vakavinavinaka. Au siqema ni levu sara vei keda e nanuma tiko ni o ya e sega ni cala levu. Sa vaka me ivakarau tudei tu meda dau kere ikuri ni veivakalougatataki ena noda masumasu kei na vakatakekere vua na Turaga. Ia, ena so na gauna au kila ni na ganita me na dolei vakalevu cake na noda masu ena ivakaraitaki ni vakavinavinaka kei na vakamuduo ena vuku ni veivakalougatataki eda sa ciqoma oti. Sa levu sara na ka eda marautaka.”1
Sa rawa ni o sotava na veika vakaoya ena isolisoli ni Yalo Tabu nikua. Sa rawa ni o tekivutaka e dua na masu ni vakavinavinaka. Sa rawa ni o tekivu vakawilika na nomu kalougata, ka qai cegu vakalailai. Kevaka o cakacakataka na vakabauta, vata kei na isolisoli ni Yalo Tabu, ko na raica na ivakananumi ni veivakalougatataki tale eso ni na vakadrodroi ki na nomu vakasama. Kevaka mo tekivu vakavinavinakataki ira yadua, ena viavia balavu vakalailai na nomu masu. Ena lesu mai na vakanananu, ka vakakina na vakavinavinaka.
Sa rawa ni o vakatovolea na ka vataga oya ena nomu vola e dua na ivakamacala ena nomu ivolaniveisiga. Sa dau veivuke tu mai na Yalo Tabu vei ira na tamata mai na ivakatekivu ni gauna. Ko na nanuma ni ivola i Mosese e kaya, “A sa maroroi tu e dua na ivola ni vakananumi; ia sa volai kina ena vosa i Atama na veika kecega sa vakatakila na Kalou ena yalo ni parofisai vei ira era sa qaravi koya” (Mosese 6:5).
O Peresitedi Spencer W. Kimball (1895–1985) a vakamacalataka na icakacaka ni volavola veivakauqeti oya: “O ira era dau maroroya na ivola ni vakananumi, ena levu cake na nodra dau vakananuma na Turaga ena veisiga ni nodra bula. Na maroroi ni itukutuku sa dua na sala ni kena wiliki tiko na noda veivakalougatataki kei na biu toka mai ni dua na itukutuku vakarautaki ni veivakalougatataki oqo me baleti ira na noda kawa.”2
Ni ko sa tekivu volavola, sa na rawa ni ko tarogi iko tiko, “E vakalougatataki au vakacava na Turaga kei ira au taleitaka nikua.” Kevaka o na cakava wasoma vaka o ya ena vakabauta, o na raica ni ko na nanuma e levu sara na veivakalougatataki. Ena so na gauna ena kau mai vakavoleka ki na nomu vakasama e so na isolisoli ka o sega ni a raica ena siga o ya, ka ko sa na qai kila ena nomu vakila na liga ni Kalou ni sa tarai iko.
Au masulaka ni da na sasagataka ena vakabauta meda kidava, nanuma, ka vakavinavinakataka na veika erau sa cakava oti ka cakava tiko na Tamada Vakalomalagi kei na noda iVakabula, me rau tadolava na sala ni lesu i vale kivei Rau.
© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12 Vakadonui me vakadewa: 6/12 Vakadewa ni First Presidency Message, August 2013. Fijian 10668 858
Veivakavulici mai na iTukutuku oqo
E sureti keda o Peresitedi Eyring ena nona itukutuku, meda nanuma na yalovinaka ni Tamada Vakalomalagi ena noda masu. Veitalanoataka vata kei ira o vakavulica na iwalewale e rawa ni vukea na masu ni vakavinavinaka me vakilai kina na liga ni Kalou ena noda bula. Vakasamataka mo na dau tekiduru ena masumasu vata kei ira o vakavulica ka vakatututaka vei koya ena masu me masu ga ni vakavinavinaka.
Sa rawa talega mo vulica na bibi ni vakavinavinaka ena kena wiliki na veitikina oqo me ikuri ni veitikina sa wasea o Peresitedi Eyring: Same 100; Mosaia 2:19-22; Alama 26:8; 34:38; Vunau kei na Veiyalayalati 59:21; 78:19; 136:28.