Mensahe sa Visiting Teaching, Agosto 2013

Welfare

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita. Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi. Para sa dugang nga impormasyon, mag-log on sa reliefsociety.lds.org.

Pagtuo, Pamilya, Bulig

Ang mga katuyuan sang welfare sang Simbahan amo nga buligan ang mga miyembro nga magsandig-sa-kaugalingon, mag-atipan sang mga imol kag nagakinahanglan, kag mag-alagad. Ang welfare sentro sa buluhaton sang Relief Society. Si Pangulong Henry B. Eyring, Unang Manuglaygay sa Unang Panguluhan, nagtudlo:

“[Ang Ginuo] gikan sa pagsugod sang kalibutan naghatag sang mga paagi agud ang Iya mga disipulo makabulig. Gin-agda Niya ang Iya mga anak sa pagkonsagrar sang ila tinion, ila mga ikasarang, kag ila mga kaugalingon sa pag-upod sa Iya sa pag-alagad sa iban. …

“Nag-agda Sia kag nagmando sa aton sa pagpartisipar sa Iya buluhaton agud itib-ong yadtong mga nagakinahanglan. Nagahimo kita sang kasugtanan nga himuon ina sa mga tubig sang pagbunyag kag sa balaan nga mga templo sang Dios. Ginabag-o naton ang kasugtanan kon Domingo kon mag-ambit kita sang sakramento.”¹

Sa idalom sang direksyon sang bishop ukon branch president, ang lokal nga mga lider nagabulig sa espirituhanon kag temporal nga ikaayo. Ang mga oportunidad sa pag-alagad masami nga nagasugod sa mga visiting teachers nga nagapangayo sang inspirasyon agud mahibaloan kon paano masabat ang mga panginahanglan sang tagsa ka sister nga ila ginabisita.

Gikan sa Balaan nga mga Kasulatan

Lucas 10:25–37; Santiago 1:27; Mosias 4:26; 18:8–11; Doctrine and Covenants 104:18

Gikan sa Aton Kasaysayan

Sang Hunyo 9, 1842, si Propetang Joseph Smith nagsugo sang mga sisters sang Relief Society nga “paumpawan ang imol” kag “luwason ang mga kalag.”² Ining mga katuyuan sa gihapon sentro sang Relief Society kag ginapahayag sa aton motto, “Ang gugma wala nagauntat” (1 Mga Taga-Corinto 13:8).

Ang aton ika-lima nga general president sa Relief Society, nga si Emmeline B. Wells, kag ang iya mga manuglaygay nagsugod sining motto sang 1913 bilang isa ka pahanumdom sang aton ginsuguran nga mga prinsipyo: “Ginapahayag namon nga amon katuyuan ang … [magkapyot] sing hugot sa inspirado nga mga pinanudlo sang Propetang si Joseph Smith sang iya ginpahayag ang plano sa diin ang kababayin-an pagahatagan sing gahum paagi sa direksyon sang priesthood nga grupuhon sa nagakabagay nga mga organisasyon para sa katuyuan nga mag-alagad sa nagamasakit, magbulig sa nagakinahanglan, magpaumpaw sang mga tigulang, magpaandam sa indi mahinalungon, kag suportahon ang mga ilo.”³

Sa karon ang Relief Society may impluwensya sa bug-os kalibutan samtang ang mga sisters nagatanyag sang gugma, ang putli nga gugma ni Cristo, sa ila mga kaingod (tan-awa sa Moroni 7:46–47).

Ano ang Sarang Ko Mahimo?

Paano bala ako nagahanda sa pag-atipan sang akon kaugalingon kag sang akon pamilya sa espirituhanon kag temporal?
Paano ko bala sundon ang halimbawa sang Manluluwas samtang ginabuligan ko nga masabat ang mga panginahanglan sang mga sisters nga akon ginabantayan?