Mensahe sang Unang Panguluhan, Agosto 2013
Kilalahon, Dumdumon, kag Pasalamatan
Ang Dios nagapangayo nga pasalamatan naton Sia sa bisan ano nga bugay nga ginabaton naton halin sa Iya. Mahapos para sa aton nga mangin hapaw ang aton mga pangamuyo sang pagpasalamat, nga ginasulit-sulit ang amo man gihapon nga mga tinaga pero wala sang tuyo nga magpasalamat bilang isa ka halad sang tagipusuon sa Dios. Dapat kita magpasalamat sa Espiritu (tan-awa sa D&C 46:32) agud makabatyag kita sang matuod-tuod nga pagpasalamat para sa mga ginahatag sang Dios sa aton.
Paano naton madumduman ang bisan kabahin lang sang tanan nga ginbuhat sang Dios para sa aton? Ang Apostoles nga si Juan nagrekord sang gintudlo sa aton sang Manluluwas parte sa isa ka regalo sang pagdumdom nga nagaabot paagi sa regalo sang Balaan nga Espiritu: “Apang ang Mananabang, ang Espiritu Santo, nga ipadala sang Amay sa akon ngalan, magatudlo sia sa inyo sang tanan nga butang, kag magapahanumdum sa inyo sang tanan nga akon ginsiling sa inyo” (Juan 14:26).
Ang Balaan nga Espiritu nagapadumdom sa aton sang kon ano ang gintudlo sang Dios sa aton. Kag isa sa mga paagi nga nagatudlo ang Dios sa aton amo ang paagi sa Iya mga bugay; kag gani, kon pilion naton nga magpakita sang pagtuo, ang Balaan nga Espiritu magapadumdom sa aton sang mga kaayo sang Dios.
Sarang ninyo ina matilawan sa pagpangamuyo sini nga adlaw. Sarang ninyo sundon ang kasuguan nga nagasiling nga dapat ninyo pasalamatan ang Ginuo nga inyo Dios sa tanan nga butang (tan-awa sa D&C59:7).
Si Pangulong Ezra Taft Benson (1899–1994) nagpanugyan nga ang pagpangamuyo nagapatigayon sang tion nga mahimo ina. Siling niya: “Si Propetang Joseph sa isa ka tion nagsiling nga isa sa pinakadako nga sala nga mahimo mangin salabton sang mga Santos sa Ulihing mga Adlaw amo ang sala sang pagkainggrato. Ginahaum-haom ko nga laban sa aton wala nagapensar sina bilang isa ka dako nga sala. Laban-laban gid nga sa aton pagpangamuyo kag sa aton mga pag-ampo sa Ginuo nagapangayo kita sang dugang pa nga mga grasya. Pero kon kaisa pamatyagan ko kinahanglan hatagan naton sang mas dako nga tion sa aton pagpangamuyo ang pagpasalamat kag pagdayaw para sa mga bugay nga nabaton na. Madamo na kita kaayo sing nabaton.”1
Sarang kamo makaangkon sing pareho sini nga eksperiyensya paagi sa regalo sang Balaan nga Espiritu sa sini nga adlaw. Mahimo kamo magsugod sang isa ka personal nga pangamuyo nga may pagpasalamat. Mahimo kamo magsugod sa pag-isip sang inyo mga bugay kag dayon magpundo sing makadali. Kon may pagtuo kamo, upod ang regalo sang Balaan nga Espiritu, matukiban ninyo nga madumduman ninyo ang iban pa gid nga mga bugay. Kon pasalamatan ninyo ang tagsa sini sa ila, basi ang inyo pangamuyo mangin mas malawig sangsa kinaandan. Ang panumduman magabalik, kag amo man ang pagpasalamat.
Pwede nyo man himuon ang amo nga butang samtang nagasulat kamo sa inyo journal. Ang Balaan nga Espiritu nagabulig sa mga tawo sa sina nga butang halin sang pagsugod sang kalibutan. Sa libro ni Moses ginasiling nga may isa ka libro sang handumanan nga gintipigan sa lenggwahe ni Adan kag sa sina nga libro narekord nga ang bisan sin-o nga tawo nga nagatawag sa Dios para magsulat paagi sa espiritu sang pagpadasig gintugotan sa ila ginpangayo (tan-awa sa Moses 6:5).
Si Pangulong Spencer W. Kimball (1895–1985) naglaragway sinang proseso sang inspirado nga pagsulat: “Yadtong mga nagatipig sang libro sang handumanan laban-laban nga magadumdom sang Ginuo sa adlaw-adlaw nila nga pagpangabuhi. Ang mga journal isa ka paagi sa pag-isip sang aton mga bugay kag sa pagbilin sang isa ka listahan sining mga bugay para sa aton mga kaliwatan.”2
Sa inyo pagsulat, sarang ninyo pamangkuton ang inyo kaugalingon, “Paano bala ako kag ang akon mga pinalangga ginbugayan sang Dios sini nga adlaw?” Kon himuon ninyo ina pirme kag may pagtuo, mas madumduman ninyo ang inyo mga bugay. Kag kon kaisa madumduman pa ninyo ang mga bugay nga wala ninyo matalupangdan sina nga adlaw kag dira ninyo mahibal-an ang impluwensya sang Dios sa inyo kabuhi.
Kabay nga magpadayon kita sa pagtinguha nga may pagtuo nga kilalahon, dumdumon kag pasalamatan ang aton Amay nga Langitnon kag ang aton Manluluwas sa ila ginhimo kag ginahimo agud buksan ang dalan pabalik sa Ila.
© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/12. Petsa sang pagtugot sa paglubad: 6/12. Paglubad sang First Presidency Message, August 2013. Hiligaynon. 10668 861
Pagtudlo gikan sa Sining Mensahe
Sa iya mensahe, si Pangulong Eyring nagaagda sa aton nga dumdumon ang mga kaayo sang Amay nga Langitnon sa aton mga pangamuyo. Hambali upod sa inyo mga ginatudloan kon paano ang pagpangamuyo nga may pagpasalamat sarang magbulig aton nga makilala ang impluwensya sang Dios sa aton mga kabuhi. Binag-binaga ang magluhod sa pagpangamuyo upod sang inyo ginatudloan kag ipanugyan sa kon sin-o ang magpangamuyo nga magpasalamat lamang.
Mahimo man ninyo tun-an ang importansya sang pagpasalamat paagi sa pagbasa sining mga bersikulo bilang dugang sa mga bersikulo nga ginhinambit ni Pangulong Eyring: Salmo 100; Mosias 2:19–22; Alma 26:8; 34:38; Doctrine and Covenants 59:21; 78:19; 136:28.