Serafo
Ua Tufichin Nikitano Ai Netipechou
Ewe chon mak mi feito seni Taiwan.
Nupwen chienei kewe Brother Chen me punuan ra papatais me non am wart, ua fakkun pwapwa. Eu ier mwirin ar papatais, ra ririfegen me non ewe tempel, me nour we at minne a mano me mwen ra choni ewe Mwichefen a tufichin ririfengen ngenir. A fakkun apwapwa ne kuna ekkan ruemon chon Chen ne mamarita non ewe kapas allim.
Brother Chen a mano non eu aksiten non ewe ier mwirin. Mwirin ewe aksiten, ua ekieki fan chommong usun an mano me fan ekkoch a tori ai kewe tan. Ua neno fan ai kechiw me ua pwisin eisiniei fan chommong, “Pwata? Pwata ewe Samon a mut ngeni ei sokkun osukosuk pwe epwe fis? Pwata ei sokkun mettoch epwe fis ngeni ei famini mi murrino?” Fan eu ran, nupwen ua riaffouni ekkei kapas eis, ua anneani ekkei kapas seni eu puken afanfan seni Preseten Spencer W. Kimball (1895–1985):
“Ika sia nengeni ach manau iei pwe unusen ach manau, iwe metek, netipechou, turutiw, me manau mochomoch epwe fakkun ngaw. Nge ika sia nengeni ach manau pwe minen fansoun ese much seni manau me mwen ei fonufan tori fansoun ese much mwirin mano, iwe sia tongeni nengeni mettoch meinisin ren ekiek mi pung. …
“Mi pung pwe sia weri sossot pwe testin ach pochokun, samau pwe sipwe kaeo tipetekison, mano pwe sipwe manausefan me ningochuno?”1
Non ena fansoun, ua finata pwe upwe nikitano ai netipechou me nenengeni fansoun mwach minen pwon me tufich. Non ai ekiek ua kuna Brother Chen a pwapwa ne chusefan fengen ren chon an famini. Ena ekiek a awora kinamwe ngeniei. Ua sinei pwe Semach won Nang epwe ngenikich ewe mirit me pwara ne weri sossot.