Poraus seni ewe Aewin Presetensi, September 2013
Souneng ren Fansoun Meinisin
Ua chechemeni seni nekukuni eu kinikinin ewe fonufan minne epwe tongeni sasingin ekkesiwinin atun ewe ier. Iteitan maram a no mi ningoch me amwarar. Fan eu ranoch non atun fou, snow a pungutiw won ekkewe chuuk me anen ewe tenenimw. Atun ras a efisata pungutiwen ran me chommong ira mi anuen fetin. Poraus fan nang non atun pwichikar mi ningoch fan iten saramen ewe akkar. Me pwan atun epwene fou mi ekkesiwini iran fonufan ngeni anuen niram, on, me parapar. Nekukuni, ua tongei eu me eu atun, me tori ikenai, ua tongei sokkofesenin eu me eu.
A wor ekkoch atun non manauach pwan. Ekkoch mi kinamwe me pwich. Ekkoch rese kinamwe. Ekkoch ranin manauach mi ning usun sasingin echo kalentar. Iwe nge mi wor ekkoch ran me fansoun mi efisi netipechou me ra efisi memmefin riaffou, song, me oput.
Ennet ua sinei pwe non eu ran sia fen ekieki pwe epwe och pwe sipwe nonnom won eu fonu mi chok wor ranoch me sipwe touau seni fansoun mi ngaw nefinen ranoch.
Nge ese tufich. Me ese apwapwa.
Nupwen ua nenengeni manauei, mi pwa pwe chommong ekkewe fansoun ua marita mi feito ngeniei nupwen ua weri osukosuk.
Semach won Nang a sinei pwe ika noun kewe semirit repwe mamarita ngeni met a kokkot fan iter, epwe namwot pwe repwe weri atun osukosuk non manauer. Ewe soufos Liai seni Puken Mormon a apasa pwe ika esap wor sossot, wenechar ese tongeni fis (Nengeni 2 Nifai 2:11). Ennet, kipwinin manau a atufichi ngenikich ne esinna, me kinisou fan iten fansoun a ngarangar (nengeni D&C 29:39; Moses 6:55).
Preseten Brigham Young a apasa: “Meinisin aramas ra feiochun ning, me manau ese much repwe weri meinisin sokkun osukosuk minne aramas repwe weri, ina pwe repwe angei feiochun ning me manau ese much. Osukosuk meinisin mi tongeni fis ngeni aramas epwe fis … ne ammonerata pwe repwe pwapwaiti manauer fan mesen ewe Samon. … Sossot meinisin ka weri mi namwot fan iten om feita non manau ese much.”1
Kapas eis esap ika sipwe weri atun osukosuk nge ifa usun sipwe tongeni pworacho ngeni ekkewe osukosuk. Ach tufich non ekkewe atun manau ina ne komochannuk ngeni ewe kapasen Kot, pun An kapasen aurour epwe anisikich ne pworacho ngeni ekkewe osukosuken manau me pwan emwenikich pwe sipwe feino senir. Semach won Nang a ngenikich An kapas seni Noun kewe soufos—mirit mi auchea mi for ne emwenikich seni ekkewe weiresin manau ngeni manau ese much mi saramaram me pwapwa chapur. Mi eu kinikinin manauach mi auchea pwe sipwe kaeo pochokun, pwara, me ennet pwe sipwe komochannuk ngeni ennet me wenechar ina mo met sokkun sossot sia weri.
Ekkewe ir ra tonong non konikin papatais me ra epinano ngeni ewe Ngun mi Fel ra isetta pecher kewe won ewe anen chon kuno me ra wisen tapweno ewe Chon Amanau non wenechar me nuku.
Ewe Chon Amanau a aiti pwe ewe akkar a etinatiw an saram “won aramas mi ngaw o aramas mi och anonno chok o, …a pungatiw ut won ekkewe mi fofforch o ekkewe mi fofforungaw” (Matthew 5:45). Fan ekkoch sise tongeni weweiti pwata mettoch mi weires, me ngaw, ra fis non manauach. Nge kich chon tapweno Kraist, sia epinukunuk pwe ika sia kukutta, ikiotek iteitan, me nuku, … mettoch meinisin epwe fis fan iten met mi och rech, ika sipwe wenechareno (Nengeni D&C 90:24; esisin mi pachenong).
Kich chon An Mwichefen, Souneng, sia angang fan pwapwa me fan ach mochen non sokkopaten poraus fan nang me non atun meinisin. Me nupwen sia fori iei usun, netipach repwe uren nuku mi pin, epinukunuk mi chikar, me tong ennet seni nang.
Iwe, mi namwot pwe sipwe pworacho ngeni atun meinisin—ir mi apwapwa me ir mi weires. Nge ese nifinifin ewe atun, pwe kich chon tapweno Jises ewe Kraist, sipwe isetta ach epinukunuk won I nupwen sia fetan ngeni An saram.
Iwe, kich noun Kot kewe Souneng, mi achocho ne kaeo seni I, ne tongei I, me tongei chon oruch. Kich sia chon akkomw won ewe anen chon kuno, me sipwe wenechar ne fetan ngeni neniach me won nang.
Iwe, sipwe Souneng non atun ras, pwichikar, atun epwene fou, me atun fou. Sipwe Souneng non atun meinisin.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun First Presidency Message, September 2013. Chuukese 10669 901
Afanafan seni Ei Poraus
Ewe Aewin Presetensi a aiti, “Ekkoch afanafan mi och mi akkafanafana seni konfel” (Hymns, ix). Nupwen ka aporausa ei poraus, kopwe ekiekin kon fengen echo kon ren ekkewe ir ka aiti usun engino non sossot: “Mi Pochokun ewe Nongonong” (nampa 4); “The Lord Is My Shepherd” (nampa 108); are “Sipwe Nikitu” (nampa 10). Ika ka mefi pwarata, kopwe aporausa eu fansoun nupwen eu atun weires non manauom a winiti eu feioch.