Iwaad
Ami Mmakeme Ndifre Mbanga Mfuho Mi.
Andiwet oto Taiwan
Kini mme ufan mi Brother Chen ye nnwan esie ekenade baptism eduk ward nnyin, Ami mma dara eti eti. Isua kiet ekebe tongo nte mmo ekena bptism, mmo ema ekenam sealing ke temple nko ema eseal eyen eren mmo emi ama akakpa mbemiso mmo ediduk ufok Abasi edian mmo. Ekedi inem nkpo ndikut nte mme Chens ekoride ke iko Abasi.
Ekem Brother Chen ama akpa oto ke unomo moto ke isua emi eketienede do. Ke unomo oro ama ekebe, ebiet nte mkpa esie esidu ke ekikere mi kpukpru ini ndien esiwak nditimere mme ndap mi. Ami mma nsidemere ye mmong eyet nyung nsiwak ndibup nte, “Ntak emi otibede? Nsidi ntak emi Jehovah ayakde oruk ndiokiso emi ada itie? Nsidi ntak emi oruk nkpo ntibe ntem editibede on ediye ufokidung emi? Usen kiet, kini Ami nkerede ye mme mbume emi, Ami mma nda nwed ukpeb mkpo kiet nyung nkot mme iko eke President Spencer W. Kimball (1895–1985):
“Edieke nnyin idade uwem isong nte kedi ofuri ntak emi owo odude uwem, ndien ubiak, mfuho, iduo ye ibio ini uwem eyekabare edi unomo nsobo. Edi edieke nnyin idade uwem isong nte kedi nsinsi nkpo emi odukde oyom aka uwem emi nnyin ikotode idi ndien akaka iso ke nsinsi ekesim mkpa ke ini iso, do ekeme ndida ofuri mme nkpo ntibe nsin ke eti ekikere. …
“Nte mme idomo isimke nnyin man odomo nsongo nda nnyin ese, nte udongo isimke nnyin man nnyin inyene ime, nte mkpa isimke nnyin man oto do nnyin ikpenyene ikpokidem emi ididuakke ndikpa aba inyung ibo ubong?”1
Ke ata ini oro, Ami mma mbiere ndifre mbanga mme mfuho mi nyung nwuk enyin nse eti ini iso emi ekenwongode eno mi. Ami ndikut ke enyin ekikere mi nte Brother Chen afiakde adiana otokiet ye ufok idung esie ye inemesit. Ndise ekikere oro ama ada emem osok mi. Ami mmediongo nte ke Ete ke Heaven eyeno nnyin ifiok ye uko ndiyo mme idomo.