Etop eke First Presidency, ofiong Usukkiet isua 2013
Mme Ndisana Owo ke Kpukpru Ini
Ami mmeti awak ke ini uyen mi kabanga ebiet ke ererimbot emi ekemede ndinwam nte ndide ndise ukpebnkpo ono edikpuho mme ini ke isua kiet. Kpukpru ofiong kiet ekebede ama esinem onyung ofon. Ke ata usen okposong ini etuep kiet, snow ama oduo ofuk mme obot ye mme efak obio. Ini nsehe ikong ono edim edep eyet ndien awawa-ikong uwem ofioro oyoho. Ifu ikpaenyong ke ini ndaeyo anwam ndino ediye ndise eke uyama unwana utin. Ndien anana adanga ini ukwo edim edikpuhore uduot obot esin ke uyama mme ini nkim eke osokoro, utouto, ye ndatndat. Nte eyenowong, Ami mmama ini kiet kiet, ndien tutu edisim usen mfin emi, Ami mmema ido ye idaha ini emi kiet kiet.
Nnyin imenyene mme ini ke uwem nnyin nko. Ubak emem onyung enem. Ubak idige ntre. Ubak mme usen ke uwem nnyin eye nte mme ndise ke calendar. Ndien nko odu mme usen ye ndaha eke esinde ubiak ke esit ndien ekeme ndida okposong ekikere unana idorenyin, utok ye iyaresit nsin ke uwem nnyin.
Ami mmenim nte ke ini kiet mme eken kpukpru nnyin imesikere ete ke okpofon nnyin ndikidung ke ebiet emi oyohode ye usen eke oyoho ata eti mme ini nyung mbe mme idiok unana inem ini ekesidude ke ufot ini oro.
Edi emi idikemke ndidi ntre. Nko inyung iwutke owo.
Nte Ami mfiakde nse uwem mi; edi inwang-inwang ete ata ediwak ini eke akwa nkori ese edisim mi kini mbede mkpong mme ini okposong oyobio.
Enyene ofuri-ifiok Ete nnyin ke Heaven ama ofiok ete ke ndito Esie ndikori man edi oruk owo emi ekenimde mmo ndikabare ndi; mmo eyene ndibo ukpep eke mme ini idomo ke isang uwem mmo ke isong. Lehi, prophet eke Nwed Mormon okodoho ete ke mfanga miduhe, “edinen ido ikpekemeke ndidi” (2 Nepli 21:11). Ke akpaniko, edi mme nkpo ubiak ke emi edinwam nnyin ndidiongo, ndomo, nyung mma ininge eke odude ke uwem (kese DxC 29:39; Mose 6:55).
President Brigham Young emen oro owut ke usung emi: “Kpukpru mme ofiok nkpo owo emi ekeyatde mmo ye anyanya ubong, ikpokidem emi midikpaha, ye nsinsi uwem enyene ndibe ofuri okposong idomo emi ekenimde eno mme enyene ofiok nkpo owo ndibe, man enyene ubong ye nsinsi nkori mmo. Ofuri unomo idomo eke ekpetibede ono owo ke isong emi owo enyene ndiyoyo… man ebenge mmo enim ono idara ke iso Abasi. …Ofuri idomo ye ukpeb nkpo emi mbufo ekeyomde enyene ufon ono eriyanga mbufo.”1
Mbume idige mme nnyin iyekut mme ini idomo edi ebup ebanga usung nte nnyin idiyode mme idomo emi. Ata akamba eti ufang ke ufot mme ini uwem ekesikpuhore mi edi ndiyire mum iko Abasi nkama ye mbuotidem, koro item Esie idige ndinwam nnyin iyo mme idomo eke uwem kpot edi eyeteme nnyin usung ndibe mme idomo emi. Ete nnyin ke Heaven ama ono iko Esie oto mme prophet Esie—nsongurua ifiok emi ekenimde ndinwam nnyin ke mme mfina eke mme okposong ini man ikobo idara ye ediye unwana eke nsinsi uwem emi owo midikemeke nditing mbanga. Edi akpan nkpo ke uwem ukpeb nnyin emi ndikori ke odudu, uko ye ido man iyiri imum akpaniko ye edinen ido ekpedi ke mfiomo emi nnyin idikutsde.
Mbio emi ema ekena baptism enyung ebo eno eke Edisana Spirit ema etongo isang mmo ke mkpafaha usung nte mbet ndien ema ewuk mmo nditiene sung-sung ye mbuotidem ke mme ikpat isang eke Andiyanga nnyin.
Andiyanga ekekpeb ete ke utin asaisaha “ono mme idiok owo ye nti owo, ye…edim (edidep) ono ndinen owo ye mme anam ukwang ido” (Matthew 5:45). Ubiak ini nnyin idikemeke ndifiok ntak emi okposong, mme nkpo eke minenke, esitibede ke uwem. Edi nte mme anditiene Christ, nnyin imenim ke akpaniko ete edieke nnyin “itimde idungo, ibong akam kpukpru ini inyung inyene mbuotidem, …akpaimo nkpo eyediana otokiet anam ufon ono (nnyin), edieke [nnyin] inamde sifon” (D&C 90:24; eitm edian akpan nkpo)
Nte mbio ufok Abasi Esie, nte mme Ndisana Owo, nnyin imedara inyung inyime inwam ke kpukpru ndaha ye ke kpukpru ini. Ndien nte nnyin inamde oro, esit nnyin akabare oyoho ye eti mbuotidem, idorenyin edikok, ye ata ima eke heaven.
Ntre, nnyin inyene ndiyo kpukpru ini uwem—ke ini inemesit odude ye ke ini ubiak odude. Edi ini eke ekpededi, nte mme anditiene Jesus emi edide Christ, nnyin iyekong idorenyin nnyin ke Enye nte nnyin isangake ibine unwana Esie.
Ke ibio-ibio, nnyin idi Ndisana Owo Abasi, emi ikebiereke ndikpeb nto Enye, ndima Enye, ye ndima owo efen. Nyyin idi mme asanga isang ke eti usung nte mbet, ndien nnyin iyesongo ida isanga ibine heaven nnyin ke akpatre.
Ke ntre, yak nnyin idi Nisana Owo ke ini editongo nseheikong, ke ini ndaeyo, ke ini ukwo edim, ye ke ini okposong etuep. Yak nnyin idi Ndisana Owo ke kpukpru ini.
© 2013 eke Intellectual Reserve, Inc. Emenim kpukpru unen. Ekeming ke USA. Enyimme eming ke Iko Mbakara: 6/13. Enyimme Ndikabare: 6/13 Ndikabare eke First Presidency Message, September 2013. Efik. 10669 553
Ukpeb nkpo eketode Etop Emi
First presidency ema ekpeb, “eno ata nti ukworo iko Abasi ke ndikwo mme ikwo” (Ikwo, ix). Nte mbufo ememede etop emi kere banga ndikwo kiet ikwo kiet ke otu emi mme ikwo efen kabanga ndiyo idomo ye mbio emi mbufo ekepebde nkpo: “Itiat Idak Isong Mbufo Osongo Didie” (no. 85); “Jehovah Edi Andikpeme Mi” (no. 108); ye “Yak Kpukpru Nnyin Ika Iso Isin Ifik” (no. 243). Nte spirit onode ndausung, buana ini kiet emi ekedide ini oyobio idomo ke uwem mbufo akakabare edi ini edidiong.