Cov Hluas

Kuv Tau Muaj Peev Xwm Tso Kuv txoj Kev Tu Siab Tseg

Los ntawm Juan Zhu

Tus uas sau zaj no los ntawm Taiwan.

Thaum kuv ob tug phooj ywg Tij Laug Chen thiab nws tus poj niam ua kev cai raus dej nyob hauv peb pawg ntseeg, kuv xyiv fab heev. Ib xyoos tom qab nkawd ua kev cai raus dej, nkawd ua kev cai sib khi hauv lub tuam tsev, thiab tau muab nkawd tus tub uas tau tso lub ntiaj teb no tseg ua ntej nkawd koom lub Koom Txoos khi rau nkawd. Yog ib qho zoo kawg pom ob tug xeem Chen no loj hlob nyob hauv txoj moo zoo.

Ces xyoo tom qab ntawd Tij Laug Chen tuag thaum nws ua tsheb sib tsoo. Tom qab muaj xwm txheej no, ua rau kuv pheej xav txog nws txoj kev tuag thiab ua rau kuv ua npau suav txog qhov no. Kuv tsim los los kua muag thiab pheej nug ntau zaus hais tias, “Vim li cas? Vim li cas tus Tswv yuav cia yus raug txom nyem li no? Vim li cas ib tse neeg zoo heev yuav raug xwm txheej li no?” Muaj ib hnub thaum kuv xav txog tej lus nug no, kuv khaws ib phau ntawv qhia thiab nyeem tej lus no los ntawm Thawj Tswj Hwm Spencer W. Kimball (1895-1985):

“Yog tias peb xav tias peb lub neej hauv lub ntiaj teb no yog peb lub neej tag nrho, ces ntshe kev mob kev nkees, kev nyuaj siab, kev swb, thiab ib lub neej tsis ntev yog kev txom nyem loj kawg. Tiam sis yog peb pom hais tias peb lub neej yuav nyob mus ib txhis uas pib puag thaum peb lub neej ua ntej yug los thiab yuav ntev nyob mus ib txhis, ces peb thiaj saib tau txhua yam uas tshwm sim raws li qhov yog. …

“Puas yog peb raug kev dag kev ntxias kom sim seb peb muaj zog npaum li cas; peb raug kev mob kev nkees kom peb kawm tau kev ua siab ntev, thiab raug tuag kom peb thiaj yuav nyob mus ib txhis thiab tau yeeb koob?”¹

Thaum lub sij hawm ntawd, kuv txiav txim siab tso kuv txoj kev tu siab tseg thiab saib yav tom ntej uas tau cog lus tseg lawm. Kuv xav hauv kuv lub siab pom Tij Laug Chen zoo siab koom nrog nws tsev neeg. Qhov kev xav li ntawd ua rau kuv nyob kaj siab lug. Kuv paub tias Leej Txiv Saum Ntuj Ceeb Tsheej yuav muab tswv yim thiab kev ua siab loj rau peb kom peb kov yeej tau tej kev cov nyom.