2013
Kev Vam Tau Yus tus Kheej
September 2013

Cov Mus Saib Xyuas Tom Tsev tsab Xov, Cuaj Hlis Ntuj 2013

Kev Vam Tau Yus tus Kheej

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej. Kom tau ntaub ntawv xov xwm ntxiv, cia li txuas rau reliefsociety.lds.org.

Daim Duab
lub cim rau lub Koom Haum Niam Tsev

Kev Ntseeg, Tsev Neeg, Kev Pab

Kev vam tau yus tus kheej yog kev muaj peev xwm, kev cog lus thiab kev sib zog kom muab tau tej yam ntawm sab ntsuj plig thiab sab nqaij daim tawv rau peb tus kheej thiab peb tsev neeg.1

Thaum peb kawm thiab nruab tej ntsiab cai ntawm kev vam tau yus tus kheej nyob hauv peb tsev thiab zej zog, peb yuav muaj cib fim saib xyuas cov pluag thiab cov neeg txom nyem thiab pab lwm tus vam tau lawv tus kheej lawv thiaj nyiaj tau tej lub sij hawm thaum lawv raug xwm txheej.

Peb muaj cib fim thiab lub luag hauj lwm siv peb txoj kev ywj siab kom vam tau peb tus kheej ntawm sab ntsuj plig thiab sab nqaij daim tawv. Thaum nws hais txog kev vam tau yus tus kheej ntawm sab ntsuj plig thiab qhov uas peb yuav tsum muaj Leej Txiv Saum Ntuj Ceeb Tsheej txoj kev pab, Txwj Laug Robert Hales ntawm Pawg Kaum Ob tug Thwj Tim qhia hais tias: “Peb hloov siab los ntseeg thiab pab peb tus kheej ntawm sab ntsuj plig thaum peb thov Vajtswv thiab ua neej raws li peb tej kev khi lus—los ntawm kev ua neeg tsim nyog txais lub cim nco txog, ua neeg tsim nyog muaj ib daim ntawv tso cai nkag tuam tsev, thiab ua kev txi kom pab lwm tus.”2

Txwj Laug Hales ntuas kom peb vam tau peb tus kheej ntawm sab nqaij daim tawv, “uas yog kev kawm ntaub kawm ntawv qib siab los yog kev kawm ua hauj lwm, thiab siv nyiaj raws li yus muaj xwb. Thaum peb tsis tiv nuj nqis thiab tseg nyiaj cia tas sim no, ces peb thiaj npaj ua hauj lwm hauv lub Koom Txoos thaum yav tom ntej. Lub ntsiab ntawm kev vam tau yus tus kheej ntawm sab ntsuj plig thiab sab nqaij daim tawv yog kom pab peb nyob qhov chaw siab peb thiaj muaj peev xwm nqa tau lwm tus uas xav tau kev pab.”3

Los ntawm cov Vaj Lug Kub

Mathais 25:1–13; 1 Timautes 5:8; Amas 34:27–28; Lus Qhuab Qhia thiab Kev Khi Lus 44:6; 58:26–29; 88:118

Los ntawm Peb zaj Keeb Kwm

Tom qab Haiv Neeg Ntseeg tau sib sau ua ke hauv lub Hav Salt Lake, uas yog tiaj suab puam, Thawj Tswj Hwm Brigham Young tau xav kom lawv vam meej thiab muaj vaj muaj tsev nyob ntawd. Qhov no txhais hais tias Haiv Neeg Ntseeg yuav tsum kawm tej txuj ci uas yuav ua rau lawv pab tau lawv tus kheej. Kom ua hauj lwm li no, Thawj Tswj Hwm Young vam khom rau cov poj niam tej txuj ci, kev muaj peev xwm, kev rau siab thiab kev txaus siab, thiab nws yaum kom lawv ua lawv tej luag hauj lwm ntawm sab cev nqaij daim tawv. Txawm lub Koom Haum Niam Tsev cov viv ncaus tej luag hauj lwm tsis zoo li yav tas los, tej ntsiab cai no yeej zoo ib yam li qub:

  1. Cia li kawm ua hauj lwm thiab txhob tub nkeeg.

  2. Cia li muaj siab pub ntawm yus tus kheej.

  3. Cia li lees hais tias koj yog tus uas lav ris kev muaj zog ntawm sab ntsuj plig, kev noj qab nyob zoo, kev kawm ntawv, kev ua hauj lwm, kev muaj nyiaj txiag, zaub mov thiab lwm yam uas txhawb nqa koj lub neej.

  4. Cia li thov Vajtswv kom muaj kev ntseeg thiab ua siab loj kov yeej tej kev cov nyom.

  5. Txhawb nqa lwm tus uas xav tau kev pab.4

© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/13. Pub txhais ua lus Hmoob: 6/13. Kev txhais lus Visiting Teaching Message, September 2013. Hmong. 10666 295

Lus Cim

  1. Saib Handbook 2: Administering the Church (2010), 6.1.1.

  2. Robert D. Hales, “Coming to Ourselves: The Sacrament, the Temple, and Sacrifice in Service,” Liahona thiab Ensign, Tsib Hlis Ntuj 2012, 34.

  3. Robert D. Hales, “Coming to Ourselves,” 36.

  4. Saib Daughters in My Kingdom: The History and Work of Relief Society (2011), 51.

Kuv Yuav Pab Li Cas?

  1. Kuv ua li cas pab tau cov viv ncaus uas kuv saib xyuas nrhiav tau tej kev kho teeb meem ntawm sab nqaij daim tawv thiab sab ntsuj plig?

  2. Kuv puas tab tom haj yam vam tau kuv tus kheej ntawm sab ntsuj plig thaum kuv npaj siab los noj lub cim nco thiab txi ntau kom thiaj ua tau hauj lwm pab lwm tus?

Luam