Agtutubo
Kinabaelak ti Nangiliweng iti Ladingitko
Naggapu ti awtor iti Taiwan.
Idi nabuniagan dagiti gayyemko a da Brother Chen ken ti asawana iti wardmi, kasta unay ti ragsakko. Makatawen kalpasan ti panagbuniagda, nailantipda iti templo, ken ti anakna a lalaki a pimmusay sakbay a kimmappengda iti Simbaan ket nailantip kadakuada. Nagragsaken a makita a dimmur-as iti ebanghelio ti pamilia Chen.
Kalpasanna natay ni Brother Chen iti aksidente ti lugan iti sumuno a tawen. Kalpasan ti aksidente, kasla kanayon nga adda iti panunotko ti ipapatayna ken masansan a matagtagainepko. Nakariingak nga agsangsangit ken inulitko a sinaludsod manen, “Apay? Apay nga ipalubos ti Dios a mapasamak daytoy a kita ti trahedia? Apay a mapasamak ti kasta a banag iti daytoy nasayaat a pamilia?” Maysa nga aldaw, idi pampanunotek dagitoy a saludsod, nangalaak iti maysa a a libro ti adalen ket binasak dagitoy a balikas manipud ken ni Presidente Spencer W. Kimball (1895–1985):
“No panunotentayo a daytoy a mortalidad a paset laeng ti panagbiagtayo, agbalin ngarud a nakaay-ay-ay a rigat ti saem, pannakaupay, ken ababa a biag. Ngem no ibilangtayo ti panagbiag kas agnanayon a banag nga iramantayo ti napalabas a biag sakbay ti pannakayanak agingga iti agnanayon a masakbayan kalpasan ti ipapatay, iti kasta mayurnos ti amin a pasamak iti umno a pannirigan. …
“Saantayo kadi a maipasango kadagiti pannulisog a mangsubok iti pigsatayo, maipasango iti panagsakit tapno masursurotayo ti panaganus, makapadas iti ipapatay tapno agbalintayo nga imortal ken maitan-ok?”1
Iti dayta a kanito, inkeddengko ti mangiliweng iti ladingitko ket pinanunotko ti naikari ken masinunuo a masakbayan. Nakitak iti panunotko a naitipon manen ni Brother Chen iti pamiliana. Dayta a buya ti nangisangbay kaniak iti talna. Ammok nga ikkannatayonto ti Nailangitan nga Ama iti sirib ken tured a mangsango kadagiti rigrigattayo.