Mensahe ti Umuna a Panguluen, Septiembre 2013
Dagiti Santo para iti Amin a Tiempo ti Panawen
Nalagipko idi ubingak maipapan iti maysa a paset ti lubong a mabalin nga agpaay kas maysa a ladawan ti postcard para kadagiti agbaliwbaliw a tiempo ti tawen. Nagloriaan ken nakaskasdaaw ti tunggal aglabas a bulan. Kabayatan ti naan-anay nga aldaw ti lam-ek, linakuban ti katintinnag a niebe dagiti bantay ken kalsada ti siudad. Ti panagsusulbod ti nangdalus iti amin a banag ken nangpabukar, nangpabulong ken nangpasabong kadagiti kaykayo ken mulmula. Nagsingising ti naraniag nga init iti natalinaay, asul a tangatang ti kalgaw. Ti panawen ti panagreregreg iti bulong ket namagbalbaliw iti nakaparsuaan kadagiti nalawag a maris kahel, amarilio, ken nalabaga. Idi ubingak, pagay-ayatko ti tunggal tiempo ti panawen, ken agingga itoy nga aldaw, pagay-ayatko ti kababalin ken ti kinaidumduma ti tunggal maysa.
Addaantayo met kadagiti tiempo ti panawen iti panagbiagtayo. Adda dagiti nabara ken makaay-ayo. Adda met dagiti saan. Sumagmamano kadagiti aldaw iti biagtayo ti saan a kas iti kinapintas dagiti ladawan iti maysa a kalendario. Ngem adda met dagiti aldaw ken pasamak a mangigapu iti sakit ti nakem ken mabalin a mangyeg iti biagtayo iti nalaus a rikna ti pannakapaay, panagbabawi, ken kinapait.
Siguradoak nga iti maysa a panawen wenno sabali pay napanunottayo amin a nasayaat no agbiagtayo iti maysa a daga a napnuan laeng kadagiti aldaw dagiti naan-anay a tiempo ti panawen ket liklikan dagiti saan a makay-ay-ayo a panawen iti nagbaetan.
Ngem saan a mabalin daytoy. Wenno saan a makaay-ayo daytoy.
No panunotek ti bukodko a biag, nalawag nga adu kadagiti panawen a dimteng ti kadakkelan a panagdur-asko kabayatan ti panagbiagko a naglasatak kadagiti narigat a padas.
Ammo ti kasiriban iti amin a Nailangitan nga Amatayo a tapno dumur-as dagiti annakna iti kita ti tao a nakaisangratanda a pagbalinan, kasapulanda ti mangpadas kadagiti tiempo ti panawen ti rigat kabayatan ti panagdaliasatda iti mortalidad. Kinuna ni propeta Lehi iti Libro ni Mormon, a no awan ti pagsusupadian, “saan a maipatungpal ti kinalinteg” (2 Nephi 2:11). Kinapudnona, daytoy ti kinapait ti biag a mangpalugod kadatayo a mangilasin, mangipadis, ken mangbigbig iti pateg ti kinasam-it daytoy (kitaen iti DkK 29:39; Moises 6:55).
Impeksa daytoy ni Presidente Brigham Young iti kastoy a balikas: “Amin a nasaririt a tao a nabalangatan kadagiti balangat ti gloria, imortalidad, ken agnanayon a biag ket nasken a lasatenda ti tunggal pannubok a naituding a lasaten dagiti nasaririt a tao, tapno magun-odda ti gloria ken pannakaitan-okda. Tunggal kalamidad a sumangbay kadagiti mortal a tao ket masagabanto … tapno maisagana ida a mangnanam ti sidong ti Apo. … Tunggal pannubok ken padas a linasatmo ket kasapulan para iti pannakaisalakanmo.”1
Ti saludsod ket saan a no kasano a malasattayo dagiti panawen ti rigat ngem ketdi no kasano a maandurantayo dagiti rigat. Ti dakkel a gundawaytayo bayat dagiti agbaliwbaliw a panawen ti biag ket kumpet a naimbag iti napudno a balikas ti Dios, gapu ta ti balakadna ket saan laeng a naisangrat a mangtulong kadatayo a mangibtur kadagiti naririgat a padas ti panagbiag ngem mangtarabay pay kadatayo kalpasan dagitoy. Inted ti Nailangitan nga Amatayo ti balikasna babaen dagiti propetana—napateg a pannakaammo a naisangrat a mangiturong kadatayo iti baet dagiti pannubok dagiti narigat a panawen iti saan a mayebkas a rag-o ken naraniag a lawag ti agnanayon a biag. Daytoy ket napateg a paset ti padas ti biagtayo tapno dumur-as ti pigsa, tured, ken integridad a kumpet a naimbag iti kinapudno ken kinalinteg iti baet dagiti rigat a mabalin a sagabaentayo.
Dagiti nabuniagan ken immawaten iti sagut ti Espiritu Santo ket nangyaddangen iti sakada iti dalan ti kinadisipulo ken nabilinan a mangsurot a sititibker ken sipupudno kadagiti addang ti Mangisalakan.
Insuro ti Mangisalakan nga agsingising ti init “kadagiti dakes ken kadagiti naimbag, ket … pagtuduenna kadagiti nalinteg ken kadagiti nakillo” (Mateo 5:45). No dadduma ditayo maawatan no apay a narigat, uray pay saan a nainkalintegan, a mapasamak dagiti banag iti panagbiag. Ngem kas pasurot ni Cristo, agtalektayo a no “agsukisok[tayo] a sireregta, agkararag[tayo] a kanayon, ken mamati[tayo], agkaykaysa ti amin a banag para iti pagimbagan[tayo], no magna[tayo] a sililinteg” (DkK 90:24; nainayon ti panangyunay-unay).
Kas miembro ti Simbaanna, kas Sasanto, agserbitayo a sirarag-o ken sitatallugod iti amin a tiempo ken iti amin a tiempo ti panawen. Ket no aramidentayo ti kasta, mapno ti puspusotayo iti nadayaw a pammati, pangpaimbag a namnama, ken nailangitan a panangngaasi.
Ngem, nasken pay a daliasatentayo ti amin a tiempo ti panawen—agpada a nasayaat ken nasaem. Ngem ania man ti tiempo ti panawen, kas pasurot ni Jesus a Cristo, sititibker nga ipagpannuraytayo ti namnamatayo Kenkuana bayat ti pannagnatayo nga agturong iti silawna.
Iti ababa a pannao, datayo dagiti Santo ti Dios, a nangikeddeng nga agsursuro maipapan Kenkuana, ken mangipateg iti padatayo a tao. Kaslatayo dagiti agbambaniaga a mangmagna iti nasantuan a dalan a sursuroten dagiti disipulo nga agsubli iti Dios, kabayatan ti pannagnatayo a sititibker nga agturong iti nailangitan a panggeptayo a tun-oyen.
Ngarud, agbalintayo koma a Sasanto iti panawen ti panagsusulbod, kalgaw, panagreregreg ti bulong, ken panawen ti lam-ek. Agbalintayo koma a Sasanto para iti amin a tiempo ti panawen.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannakaipatarus ti First Presidency Message, September 2013. Ilokano. 10669 864
Panangisuro manipud iti Daytoy a Mensahe
Insuro ti Umuna a Panguluen, “Sumagmamano kadagiti kaindaklan a sermon ti maikasaba babaen ti panangkanta kadagiti himno” (Hymns, ix). Bayat ti panangilawlawagyo iti daytoy a mensahe, ibilang ti panangkantayo a kaduayo dagiti sursuruanyo ti maysa kadagitoy a himno wenno sabali pay a kanta maipapan iti panagibtur iti rigat: “How Firm a Foundtion” (no. 85); “The Lord Is My Shepherd” (no. 108); wenno “Let Us All Press On” (no. 243). No maparegtakayo, iburayyo ti maysa a tiempo ti panawen idi nagbalin a maysa a parabur ti maysa a panawen ti rigat iti biagyo.