Mensahe iti Visiting Teaching, Septiembre 2013

Panagpannuray iti Bukod a Kabaelan

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset ti bukodyo a biag. Para iti ad-adu pay nga impormasion, mapan iti reliefsociety.lds.org.

Selio ti Relief Society

Pammati, Pamilia, Tulong

Ti panagpannuray iti bukod a kabaelan ket ti abilidad, panagkumit, ken panangikarigatan a mangipaay iti naespirituan ken naindagaan a pagimbagan ti bagitayo ken ti pamiliatayo.¹

Bayat ti panagsursuro ken panangyaplikartayo kadagiti pagbatayan ti panagtalek iti bukod a kabaelan kadagiti pagtaengan ken kumunidadtayo, addaantayo kadagiti gundaway a mangaywan kadagiti nakurapay ken agkasapulan ken makatulong kadagiti dadduma pay nga agbalinda a managpannuray iti bukod a kabaelan tapno makapagibturda kadagiti panawen ti rigat.

Addaantayo iti pribilehio ken pagrebbengan a mangusar iti kinawayatayo a mangpili iti panagbalin nga agpannuray iti bukod a kabaelan a mainaig iti kinaespirituan ken mainaig iti temporal. No maipanggep iti naespirituan a panagtalek iti bukod a kabaelan ken ti panagpannuraytayo iti Nailangitan nga Ama, insuro ni Elder Robert D. Hales ti Korum dagiti Sangapulo-ket-dua nga Apostol: “Agbalintayo a napasurot ken naespirituan a managtalek iti bagi no sikakararagtayo nga agtungpal kadagiti katulagantayo—babaen ti pannakaikari a makiranud iti sakramento, panagbalin a maikari iti temple recommend, ken panagsakripisio tapno agserbi kadagiti dadduma.²

Imbalakad ni Elder Hales kadatayo nga agbalintayo a managpannuray iti bukod a kabaelan a mainaig iti temporal, “a pakairamanan ti pananggun-od iti nayon nga adal kalpasan ti haiskul wenno vocational training, panagsursuro nga agtrabaho, ken panagbiag a nasalimetmet wenno panagbusbos iti basbassit ngem iti matgedantayo. Babaen ti panaglikliktayo nga umutang ken panagurnongtayo iti kuarta itan, nakasaganatayo para iti full-time a serbisio iti Simbaan kadagiti masungad a tawen. Ti panggep ti panagpannuray iti bukod a kabaelan a mainaig iti temporal ken naespirituan ket pannangted seguridad iti bagbagitayo tapno makatulongtayo kadagiti dadduma pay nga agkasapulan.³

Manipud kadagiti Nasantuan a Kasuratan

Mateo 25:1–13; 1 Timoteo 5:8; Alma 34:27–28; Doktrina ken Katulagan 44:6; 58:26–29; 88:118

Manipud iti Pakasaritaantayo

Kalpasan a nagguummong dagiti Santo iti Ud-udina nga Aldaw iti Salt Lake Valley, a maysa a nailasin a disierto, tinarigagayan ni President Brigham Young nga agballigida ken mangipasdekda kadagiti manayon a pagtaenganda. Kayatna a sawen a kasapulan dagiti Santo ti agsursuro kadagiti paglaingan a mangpalugod kadakuada nga agbalin a mapagpannuray iti bukodda a kabaelan. Iti daytoy nga aramid, dakkel ti panagtalek ni Presidente Young kadagiti kabaelan, talento, kinapudno, ken kinatallugod dagiti babbai, ket inallukoyna ida kadagiti masinunuo a pagrebbengan a temporal. Idinto ta masansan nga agsabasabali dagiti masinunuo a pagrebbengan ti Relief Society iti agdama, agtalinaed a di agbalbaliw dagiti pagbatayan:

1. Sursuruen nga ipateg ti trabaho ken liklikan ti kinasadut.

2. Kalikaguman a gun-oden ti kinatallugod a mangisakripisio iti bagi.

3. Awaten ti bukod a pagrebbengan para iti naespirituan a pigsa, salun-at, edukasion, panagtrabaho, pakaseknan iti kuarta, taraon, ken dadduma pay a kasapulan a makatulong iti panagbiag.

4. Agkararag para iti pammati ken tured a mangsango kadagiti karit.

5. Papigsaen dagiti dadduma nga agkasapulan iti tulong.⁴

© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannaakaipatarus ti Visiting Teaching Message, September 2013. Ilokano. 10669 864

Dagiti Nagadawan

1. Kitaen iti Handbook 2: Administering the Church (2010), 6.1.1.

2. Robert D. Hales, “Coming to Ourselves: The Sacrament, the Temple, and Sacrifice in Service,” Liahona ken Ensign, Mayo 2012, 34.

3. Robert D. Hales, “Coming to Ourselves,” 36.

4. Kitaen iti Daughters in My Kingdom: The History and Work of Relief Society (2011), 51.

Ania ti Maaramidko?

1. Kasano a tultulongak dagiti kakabsat a babbai nga ay-aywanak a mangsapul kadagiti pangrisut kadagiti temporal ken naespirituan a kasapulanda?

2. Padpadakkelek kadi ti naespirituan a panagtalekko iti bukodko a kabaelan babaen ti panagsaganak para iti sakramento ken panagsakripisiok nga agserbi?