Roronrikirake
I A Kona ni Katoka Nanokawakiu
Te tia kororongorongo bon mai Taiwan.
I rang ni kimwareirei ngke a bwabetitoaki raou aika te Tari Chen ao kaainabana n ara uote. Teuana te ririki i mwin te bwabetito, a kabaeaki n te tembora, ma natiia naba te mwaane are mate i mwaain kaainakin te Ekaretia irouia. E kakukurei noran rikiraken te utu n Chens i nanon te euangkerio.
N te ririki are i mwina e mate te Tari Chen ni kabuanibwain te ka. I mwin te kabuanibwai anne, e aki toki uriuringakin te kabuanibwai irou ao angiin te tai I miakinna. I uti n tang ao n titiraki ma n titiraki riki, “Bukin tera? Bukin tera e kariaia te Uea reken te kabuanibwai ae aron aei? Bukin tera bwa tebaei e riai n reke nakon te utu ae tamaroa aei?” N tebongina, ngke I iangoi nanon titiraki aikai, I tabekarake teuana te boki n reirei ao ni wareki taeka aikai mai iroun Beretitenti Spencer W. Kimball (1895–1985):
“Ngkana ti iangoia bwa te maiu ae mamate aei ti ngaia tabwanin karikakira, ngkanne te maraki, te nanokawaki, te konaaki, ao te maiu ae kimototo bon te karawawata ae kananokawaki. Ma ngkana ti iangoa te maiu bwa te bwai ae akea tokina n rereitinako kiraroa nako nanon te maiu n tamnei ngkoa ao nako nanon mwin te mate are akea tokina n te tai are e na roko, ngkanne a kona ni baireaki raoi bwai ni kabane n te taratara. …
“Bwa ti aki kaubwaaki nakon kariiri ni katai korakorara, te aoraki bwa ti aonga n reirei te taotaonakinnano, te mate bwa ti aonga n aki kamamateaki ao ni kamimitongiaki?”1
N te tai anne, I baireia ni katoka nanokawakiu ao n tara te tai are e na roko are e beritanaki. I noria n au iango bwa e kukurei te Tari Chen n inono ma ana utu. Ataakin anne irou e anganai te rau. I ataia bwa Tamara are i Karawa E na anganira te wanawana ao te ninikoria ni kaaitarai kaangaanga.