Rongorongo man te Moan Beretitentii, Tebetembwa 2013
Aomata aika Itiaki ibukin Tai ni Kabane
Iai au uriuring n ataei n teuana mwakoron te aonaaba are e rang n tikaua ni katoa kakateuana te tai n te ririki. Ni katoa namwakaina ake a nako a mimitong ao a kamimi. N tetaina ni bongin te winta teuana are tamaroaroa, a rabunaki maunga ma kawain te kaawa n te tino ae boou. E kaitiaki bwai ni kabane ao e kabwebwei ma ni kauei ao ni kariki ban aroka te kakarau n te tiburing. E ota taai ae katekemata i karawa ae mawawa ma n itiaki. Ao te otom ae tikiraoi e biti taraan aroka nakon taraaraoiia n aoranti, ni babobo, ao n uraura. Ngke I ataei, I tangiri tai ni kabane, ao n te tai aei, I tangiri aroia ma kakaokoroia ni kakateuana.
Iai naba iroura tai ni maiura. Tabeua a kabuebue ao a kakukurei. Tabeua a aki. Tabebong ni maiura a titikiraoi kanga tamnei i aon te karenta n tamnei. Ao ngaia iai bong ma aroaro ake a kamarakiatu ao a kona ni karin i nanon maiura namakin ni bwarannano aika korakora, te kairiribai, ao te ikakaiwi.
I koaua bwa n tetaina ke tebongina a reke ara iango ni bane bwa e tamaroa te maeka n te aba teuana are e kaonaki n ti bongin tai n tamnei aika tamaroaroa ao ni kararoai tain kakukurei i marenantai.
Ma e aki kona n reke aei. E aki naba tangiraki.
Ngke I iangoa taekan oin maiu, e ota bwa mwaitin tai n rikirake n tamnei ake a rang ni korakora a reke irou n te tai are I rinanon tai ni kaangaanga.
Tamara are i Karawa e wanawana ni bwai nako E ataia bwa ibukiia Natina bwa a na rikirake bwa aomata n aroia ake a karaoaki iai, a na tangiria n rinanon tai ni kaaitara n tain motirawaia n te maiu are mamate. E taku Riaai are ana burabeti Ana Boki Moomon bwa n akean te kaaitara, “e na bon aki kona n ataaki te raoiroi” (2 Nibwai 2:11). E koaua, bon maon te maiu are e anganira kinaakin, kataunarian, ao butimwaean karewerewena (taraa D&C 29:39; Mote 6:55).
E taekinna Beretitenti Brigham Young n aron aei: “Ni kabane aomata aika wanawana aika baunaki ni bau aika mimitong, aki mamate, ao a maiu n akea tokiia a riai n rinanon kaangaanga ni kabane ake a baireaki ibukiia ake a wanawana n rinanoi, ni karekei mimitongiia ao karietatakiia. Ni kabane kabuanibwai ake a kona ni bwakari aoia aomata ake a mamate a na maraki … ni katauraoiia ni kimwareirei ni kaotin te Uea i buakoia … Ni kabane kakatai ao waki ake ko a tia n rinanoi a riai ibukin te kamaiu ibukim.”1
Te titiraki tiaki are ti na nori tai ni kaaitara ma ti na kanga ni karaoi taekan ara kaangaanga. Ara anga ae nakoraoi iai n tain aki tokin bibitakin tai n te maiu bwa ti na taumatoa nakon Ana taeka te Atua ae kakaonimaki, bwa Ana reirei e karaoaki bwa e na aki ti buokira n teimatoa ni kaangaangan wakin te maiu ma E na kairira nako mai iai. E a tia Tamara are i Karawa n anga Ana taeka rinanoiia Ana burabeti---te wanawana ae kakawaki e karaoaki bwa e na kairiira rinanon kakaewenako n tai ake a kaangaanga nakon te kimwareirei ae akea n arona ao te ota ae tikiraoi n te maiu are akea tokina. E kakawaki ni mwakoron wakin maiura karikirakean te korakora, te ninikoria, ao te kokoaua n taumatoai nakon te koaua ao te tamaroa e ngae ma karawawata ake ti na nori.
Aomata ake a tia ni bwabetitoaki ao ni karekea ana bwaintangira te Tamnei are Raoiroi a toua kawain te aroaro n abotoro ao ni kaetaki n ira mwanekan ara Tia Kamaiu ni waki nako ma te kakaonimaki.
E reirei te Tia Kamaiu bwa e oti taai “i aoia akana a buakaka ma akana raoiroi, ao … te karau [bwaka] i aoia akana atataiaomata ma akana babakanikawai” (Mataio 5:45). N tai tabetai ti aki kona n ota bwa bukin tera a matoatoa, aki boraoi, bwai aika riki n te maiu. Ma ngaira aika taan tia ririmwin Kristo, ti onimaki bwa ngkana ti “marurung ni kakaae, ti tataro n aki toki, ao ti onimaki, … a na bane n ikotaki bwai ni mwakuri ibukin [ara] raoiroi, ngkana [ti] nakonako ni kaetira” (D&C 90:24; karinaki te katuruturu).
Ngkai membwa ngaira n Ana Ekaretia, aika Aomata Aika Itiaki, ti kimwareirei ao n tauraoi ni beku i nanon taian maro ao n taian tai ni kabane. Ao ngkai ti karaoia, a kaonaki nanora n onimaki aika tabu, kantaninga aika rauaki, ao n te tangira ni karawa.
E nga n anne, ti na bon wakinako rinanon taian tai ni kabane—ni kauoua bwa a kakukurei ao a kamaraki. Ma e aki tabeakinaki te tai, bwa taan tia ririmwin Iesu te Kristo, ti na matoa ni kabotoa ara kantaninga i Aona ngkai ti keiaki n oki rikaki Nakoina.
Ni kakimototoana, ngaira Ana Aomata Aika Itiaki te Atua, ti kan reirei n Taekana, n Tangiria, ao n tangiriia raora. Kanga taan tia mwamwananga ngaira n toua te kawai ae tabu are a toua ana reirei (n okira te Atua), ao ti na nakonako ni waki nakon ara kouru ni karawa.
Ma ngaia are, ke ti riki bwa Aomata Aika Itiaki n te tiburing, te tiamwa, ao n te winta. Ke ti riki bwa Aomata Aika Itiaki ni katoa tai ni maiura.
© 2013 by Intellectual Reserve, Inc. All rights reserved. Boretiaki i USA. Kariaiakaki n te Ingiriti: 6/13. Kariaiakaki rairana: 6/13. Rairan te First Presidency Message, September 2013. Kiribati. 10669 859
Reirei man te Rongorongo Aei
E a tia n reirei te Moan Beretitentii, “Tabeua kabwarabwara aika rang ni korakora a kabwarabwaraaki n aneneakin kuna n taromauri” (Kuna n Taromauri, ix). Ngkana ko maroroakina te rongorongo aei, iangoa te anene ma naake ko reireiniia teuana man kuna n taromauri aikai ke te anene tekorana n taekan teimatoan te kaaitara: “Ai matoara” (nambwa{ nb} 85); “Te Uea te Tia Kawakinai” (nambwa 108); ke “Let Us All Pregkanass On” (nambwa 243). Ngkana ko namakina wirikirikiam, tibwa am tai n te tai ni kaangaanga teuana ni maium are e bitaki nakon te kakabwaia.