iTukutuku ni Mataveiliutaki Taumada, Sepiteba 2013
Yalododonu ena Veidraki Kece Sara
Tiko vei au e dua na ivakananumi ni gauna ni gone mai na dua na yasai vuravura ka na rawa ni vakayagataki me iyaloyalo kadi ni veiveisau ni draki ena loma ni yabaki. E lagilagi ka totoka na veivula yadua e sivi yani. Ena dua na siga totoka ni vula ililiwa, dau ubia tu na ulunivanua na ucacevata vulavula kei na veitolo ni gaunisala ena veikoro lelevu. A kauta mai na uca veisavai na vula itubutubu vakakina na caudre mai ni drokadroka ni bula. Na galala vinaka tu ni lomalagi ena vula ikatakata sa dua na iyaloyalo ivakaraitaki karakarawa totoka ni caudre ni rarama ni matanisiga. Sa qai mai vakadinamati yani ni sa veisautaka na vula imago na rairai vinaka ni roka molibota, dromodromo, kei na damudamu. Au dau taleitaka na veidraki kece sara niu a se gone, ia nikua au taleitaka na kena duidui kei na totoka ni kedra ituvaki.
Tu talega na duidui ni draki ni noda bula. E so e katakata ka totoka. So tale e sega soti. So na siga ena noda bula e totoka sara me vaka tu e dua na iyaloyalo rairai vinaka ena ivola ni vula. Ia, e tu talega e so na siga e sega soti ni vaka o ya ka ni dau yaco na mosi ni yalo ka kauta mai ki na noda bula na yalolailai kei na yaloca.
Au kila ni so vei keda ena dau nanuma me dua na gauna mera na sotava tu ga na bula mamarau kei na vakacegu me vaka tu na irairai ni dua na iyaloyalo totoka ka na sega ni veisau rawa ka na sega talega na gauna ena duatani kina na kena ituvaki.
Ia, oqo ena sega ni rawa. Ka na sega talega ni gadrevi.
Niu vakaraica lesu na noqu bula sa tu kina e so na gauna ni tubucake ena gauna au sotava kina na draki ca ena noqu bula.
Kila vinaka tu na Tamada Vakalomalagi dau loloma na veika oqori baleti ira na luvena me ra na tubucake kina ki na ibulibuli ka ra buli mai kina ni sa dodonu mera sotava na veidraki ni bula kece sara ena nodra tiko voli ena bula oqo. Na parofita o Liai mai na iVola i Momani e kaya ni kevaka me sega na veibasai, “ena sega na ivalavala dodonu” (2 Nifai 2:11). Sa dina sara ni na wiwi ni bula ena vakavuna vei keda meda kila mai, vakatauvatana ka vakavinavinakataka na kena totoka (raica na V&V 29:39; Mosese 6:55).
A kaya vaqo o Peresitedi Brigham Young, “O ira kece era vakaiukuuku ka ra sa vakaisalataki ena lagilagi, tawamaterawa kei na bulatawamudu e dodonu mera na lako curuma na veidredre sa lesi vei ira mera na lako curuma mera na rawata kina na lagilagi kei na vakalagilagi. Na bula dredre kece ena yaco mai me na sotava na tamata … mera na rawata kina na marau ni laki tiko ena nona iserau na Turaga. … Na veivakatovolei kece ko na lako curuma ena gadrevi me sotavi mena rawati kina na veivakabulai.”1
Na taro e sega ni noda na sotava beka na draki ni bula dredre, ia, meda na lako curuma vakacava na bula dredre. Na ka ga ena gadrevi ena gauna ni veiveisau ni draki ni bula e daidai, sa ikoya meda na tautauri matua toka ga ena dina ni vosa ni Kalou, ni nona ivakasala e sega walega ni na vukei keda meda sotava na draki ni bula dredre ia, me kauti keda sivita yani. Sa solia tu na Tamada Vakalomalagi na nona vosa vei ira na Nona Parofita{m}na ivakasala momona meda na lako curuma yani kina na bula dredre ni veidraki ni bula kece sara ki na marau sega ni tukuni rawa kei na rarama ramase ni bula tawamudu. Sa dua na tiki bibi ni noda bula, na vakatorocaketaki ni qaqaco, qaqa kei na yalododonu meda dei tikoga kina ki na dina kei na dodonu ena dela ni veivakatovolei eda dau sotava.
O ira era sa curuma na wai ni papitaiso ka ciqoma na isolisoli ni Yalo Tabu, era sa muria na sala ni bula vakatisaipeli ka ra sa vakauqeti mera dei ka dina ki na muri mawe ni yava ni iVakabula.
E vakavulica na iVakabula ni matanisiga e cilavi ira na “sega ni ivalavala dodonu kei ira na ivalavala vinaka kei na uca ena tauci ira na ivalavala dodonu kei ira na ivalavala sega ni dodonu” (Maciu 5:45). Ena so na gauna eda na sega ni kila se cava e yaco kina ena noda bula na veika dredre se na veika sega ni vinaka. Ni da sa tisaipeli i Karisito, eda sa vakadinata ni kevaka meda “vakasaqaqara vagumatua ka dau masu tikoga ena vakabauta, … ena rawa vakavinaka na veika kece baleti [keda], kevaka [eda] sa caka dodonu” (V&V 90:24; ikuri e vakabibitaki).
Ni da lewena na Nona Lotu, vaka Yalododonu Edaidai, eda na veiqaravi ena yalomarau kei na yalodina ena veigauna ena veidraki ni bula kece sara. Ni da cakava vakaoqo, ena vakatawani na yaloda ena vakabauta vakalou, inuinui veivakabulai, kei na loloma vakalomalagi.
Ia, eda na lako curuma ga yani na veidraki ni bula kece sara—ena yalo marau vakakina ena yalo rarawa. Ia, ni da sa tisaipeli i Jisu Karisito, se vakacava sara na draki, eda na vakatavara Vua na noda vakanuinui ni da lako tiko yani ki na Nona rarama
Ni vakalekalekataki, eda sa Yalododonu ni Kalou, eda sa vakadeitaka meda na vulica na veika baleti Koya, ni da na lomani Koya, ka lomani ira na kainoda. Eda sa vulagi lako ena gaunisala ni bula vaka-tisaipeli, ka da na lako yani ena yalodei ki na noda icavacava mai lagi.
Sa dodonu kina meda Yalododonu tiko ena vula i tubutubu, vulai katakata, vula imago kei na vula ililiwa. Meda sa Yalododonu ni veidraki kece sara.
© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12. Vakadonui me vakadewa: 6/12. Vakadewa ni First Presidency Message, September 2013. Fijian. 10669 858
Veivakavulici mai na iTukutuku Oqo
E ratou vakavulica na Mataveiliutaki Taumada: “Dau rogoca vakawasoma talega na vosa momona e so ni vunau, mai na voqa ni sere ni lotu e so.” (Serenilotu, ix). Ni ko ni veitalanoataka na itukutuku oqo vakasamataka mo ni lagata vata kei ira o vakavulica e dua na sere oqo se dua tale na sere me baleta na vosoti ni dredre “Na Yavu Tudei (naba 43); “Noqu iVakatawa” (naba. 108); “Meda sa Gu Tiko” (naba. 146). Kevaka mo vakauqeti kina, wasea na gauna e tarai iko kina e dua na ua ni draki ca ena nomu bula ka qai muria mai e dua na veivakalougatataki.