iVaqa ni Veisiko, Sepiteba 2013

Bula Rawati- koya

Vulica ena masumasu na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na marama oqo me yaco na iSoqosoqo ni Veivukei me dua na tiki bulabula ni nomu bula vakai iko. Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Na bula rawati koya sa ikoya na kaukauwa, yalodina, kei na sasaga mo rawata kina na bula vakayalo kei na bula vakayago ni bula yadua kei na bula ni matavuvale.¹

Ni da sa vulica na ivakavuvuli ni bula rawati koya ena noda matavuvale kei na itikotiko, sa noda na madigi eso ni qaravi ira na dravudravua kei na vakaloloma ka vukei ira tale eso mera bula rawati ira me rawa kina ni ra vosota na veigauna ni bula dredre.

E tiko vei keda na dodonu kei na itavi meda vakayagataka kina na noda galala meda bula rawati keda vakayalo ka vakayago talega. Ni da vosa tiko ena bula rawati koya vakayalo kei na noda vakararavi vua na Tamada Vakalomalagi, e vakavulica o Elder Robert D. Hales ena Kuoramu ni iApositolo Le Tinikarua: “Eda sa veisau ka bula rawati keda vakayalo ni da bulataka ena masumasu na noda veiyalayalati—ena noda kania ena bula kilikili na sakaramede, bula dodonu me dua kina na ivolatara ni valetabu, ka solibula ena qaravi ira na tani.”²

O Elder Hales e vakasalataki keda meda bula rawati keda vakayago, “wili kina na rawati ni dua na itagede ni vuli ena koronivuli torocake se vuli cakacaka, vulica mo cakava, ka bula ena loma ni noda rawa-ka. Ena noda levea na dinau ka maroroi ilavo ena gauna oqo, eda sa vakarau kina ki na veiqaravi tudei ena Lotu ena veiyabaki mai muri. Na inaki ni bula rawati koya vakayago kei na kena vakayalo sai koya me biuti keda ena dua na vanua cecere cake me rawa ni da laveti ira kina na vakaleqai tu.³

Mai na iVolanikalou

Maciu 25:1–13; 1 Timoci 5:8; Alama 34:27–28; Vunau kei na Veiyalayalati 44:6; 58:26–29; 88:118

Mai na Keda iTukutuku Makawa

Ni ra sa mai soqoni vata ena Salt Lake Valley na Yalododonu Edaidai, e dua na vanua liwalala ka dravuisiga, qai vinakata o Peresitedi Brigham Young mera vuavuai vinaka ka tauyavutaka na nodra itikotiko tudei. Oqo e kena ibalebale mera vulica na Yalododonu Edaidai na cakacaka ni liga mera na rawa ni bula rawati ira. Ena sasaga oqo, sa vakaraitaka kina o Peresitedi Young na nona vakanuinui ena nodra kaukauwa ni rawa-ka, taledi eso, nodra vakabauta, kei na gu ni yalodra na marama, ka vakayaloqaqataki ira okoya ena qaravi ni nodra itavi ni bula vakayago. Sa na via duidui wasoma nikua na itavi matata ni iSoqosoqo ni Veivukei, ia na kena ivakavuvuli e dua tu ga.

1. Vulica mo dau taleitaka na cakacaka ka levea na vakawelewele.

2. Mo rawata na yalo ni bula rawati iko.

3. Ciqoma me nomu itavi vakataki iko na veika ni tiko bulabula, na vuli, na cakacaka, ilavo, kakana kei na veika gadrevi eso me baleta na bula.

4. Masulaka na vakabauta kei na kaukauwa me sotavi kina na bolebole.

5. Vaqaqacotaki ira era gadreva tu na veivuke.⁴

© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12. Vakadonui me vakadewa: 6/12. Vakadewa ni Visiting Teaching Message, September 2013. Fijian. 10669 858

iDusidusi

1. Raica na iVoladusidusi 2: Veiqaravi ena Lotu (2010), 6.1.1.

2. Robert D. Hales, “ Kilai Yaloda: Na Sakaramede, na Valetabu, kei na Solibula ena Veiqaravi ,” Ensign se Liaona Me 2012, 34.

3. Robert D. Hales, “Kilai Yaloda,” 36.

4. Raica na Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei (2011), 57.

Na Cava e Rawa Niu Cakava?

1. Au sa vukei ira tiko vakacava na marama au sikova mera vaqara na iwali ni nodra gagadre vakayalo kei na gagadre vakayago?

2. Au sa tosocake tiko li ena noqu bula rawati au vakayalo ena vakavakarau ki na sakaramede kei na solibula ni veiqaravi?