Klumech er a First Presidency, Ongetiu el Buil 2013
Resanto er a Rokui el Taem
Ngarngii a ultebengek er a kngalek a tebechedel a beluulechad el sebechel uaia le siasing el kirel a ngeldechel a bek el taem. A bek el buil el mlocheuekl a mle klebokel. Sel kmal klebokel el sils er a taem er a kelekolt, ea becheleleu el snow a berrokel er bebul a ked me a rael er a beluu. A spring a kuk mlo uchul a chull me a beches el llel a kerrekar. Ea eabed a le summer a uaia le mellemau el iro el berrokel er a klebokel el dichel a sils. Ea klebokel el autum a uchul a mellomes el chuu el mengungau, bibrurk, me a bekerekard a bedengel. Sera kngalek, eng soak a dersta er a ikal taem, me lmuut er chelechal sils, eng kmal soak a teletelel a dersta er ngii.
Kid me ngarngii a taem er a klengar kid. A bebil a mekekeald e ungil. Ea bebil a diak. A bebil er a sils er a klengar kid a uaia klebokel el siasing er a kalender. Eng di dirrek el ngarngii a sils me a teletael el uchul a ringel er a rengud el sebechel uchul a klengitelreng, ngasechereng, me a mekngit el reng er a klengar kid.
Ak medengei el kmo ngarngii a taem e kede mla oureng el ulekum me kede kiei er a basio el mui er a ungil teletael er a bek el taem el diak a kora mekngit er a delongelel.
Eng di tia diak el sebechel duubech. Malechub e dosiik el kirel.
Sel kumes er a klengar ngak, eng bleketakl el ikel betok el taem el kurrael mo mesisiich a mlei lokiu a meringel el taem er a klengar ngak.
A mellomes a rengul Demad er a Babeluades a mle medengei el kmo a mo uchul ea Rengelekel a mukreoul el mo er sel teletael el tir a kirir el morngii, eng kirir el mo obangel a taem er a ongarm er tial klengar tir er a beluulechad. A profet Lehi er a chelsel a Babier er a Mormon a millekoi el kmo a lak a ultok, “ea llemalt a diak el sebechel morngii” (2 Nephi 2:11). Ng klemerang, el ikel mekngit el teletael el duubech er a chelsel a klengar a rullid el mo omtab, merriter, e mereng a saul el kirel a klungiolel (mesa D&C 29:39; Moses 6:55).
A President Brigham Young a dillii er tiakid el teletael: “A rokui el chad loba llomes el tir a ultekuul er a korone er a klebkall, diak el luut el kodall, me a diak a ulebengelel klengar a kirir el mo soiseb er a ringel el mla moterekokl el kirir a remellomes el chad el mo chuarm er ngii, me luchul e bol nguu a klebkellir me a diak a ulebengelel klengar. A bek el chelebuul el uchul a ringel el mora rechad … a kudmekelterir el mo ngara deureng er a rengedel a Rubak. … A bek el ongarm me a teletael el kau a soiseb er ngii a kirel a diak a ulebengelel klengar kau.”1
A ker a diak el kirel a kmo kede mo soiseb er a taem er a ringel ng bai kede mekerang e otekur a ses el eolt sel lemei er kid. Sel kot el klou el techelled er a chelsel a ngeldengodech el taem er a klengar a mo blak a rengud lorkedii a tekingel a Dios, le Tekingel a kldmokl el diak di lengesukid el -otekur a ses el eolt er a klengar ng dirrek el mekrolid lengelakl er ngii. A Demad er a Babeluades a mla meskid a Tekingel lokiu a reprofet er Ngii—a mekreos el llomes el ngii a kldmokl el mekrolid er a chelsel a olibesongel me a meringel el taem e ngoikid el merael bedul sel deureng me a llomes er a diak a ulebengelel klengar. Ng klou a belkul telengtengil a klengar kid el domekdubech a klisiched, blakelreng, me a klaumerang lorkedii a klemerang me a llemalt el diak el iior er a ringel el desiseb er ngii.
Tirkel mla soiseb er a techolbechelid e mla nguu a sengk er a Chedaol Reng a mla mo dechor er a rael loltirakl e kirir el blak a rengrir loltirakl a blekeklel Osobel.
A Osobel a ulisechakl el kmo a ngesechel a sils a “mora remekngit me a rungil, me a … chull a [ruebet] el mora remelemalt me a rediak” (Mateus 5:45). Bebil er a taem eng diak dodengei a uchul ea meringel el teletael, diak el tabesul, el tekoi a duubech er a klengar. Eng di kid loltirakl er a Kristo, a kired el mo oumerang el kmo alsekum e kede “blak a rengud losiik, e blechoel meluluuch, e oumera el kmo a rokui el tekoi a duubech el ngarngii a ungil uchul [kired], alsekum [e kede] merael melemalt” (D&C 90:24; smisichii a belkul).
Me kid el chedal a Ikelesia er Ngii, el Santo, e kede dmeu a rengud e blak a rengud el ngara omesiou er a chelsel a rokui el taem. Sel bo deuaisei, ea rengud a mo mui er a klaumerang, me a urunguled, e mo oba beltikelreng er a babeluades.
Eng di, kede melemolem el kired el soiseb er a rokui el kakerous el taem—a ungil me a mekngit. Eng di diak el iior er a taem, ele kid loltirakl er a Jesus Kristo, e kede mo ultuil er Ngii sel dorael bedul a llomes er Ngii.
A dongedeb er ngii, e kid a Resanto er a Dios, e blak a rengud el mesuub er Ngii, oubeltikelreng el mo er Ngii, e oubeltikelreng el mora rebebil. Kid a ngara sel rael er a rengeltengat, e blak a rengud el merael el bedul sel ngii a moktek er kid er a babeluades.
Maleuaisei, e mei me bo de Santo sel spring, summer, fall, me a winter. Mei e bo de Santo er a rokui el taem.
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/13. Kengei er a oidel: 6/13. Oidel a First Presidency Message, September 2013. Palauan. 10669 881
Osischeklel Tia el Klumech
A First Presidency a mla olisechakl el kmo, “A bebil er a kmal ungil osisechakl a mekedmokl lokiu a chelitakl” (Chelitakl, ix). Sel mosaod er tial klumech, e momdasu el mo mengitakl lobengterir tirkal moldingel er tir a ta er a ikakid el chelitakl el kirel ongarm me a ringel: “How Firm a Foundtion” (no. 85); “The Lord Is My Shepherd” (no. 108); or “Let Us All Press On” (no. 243). A momelchesiu er ngii, e mouchais el kirel a meringel el taem er a klengar kau el uaia lulebult el mo klengeltengat.