Poraus seni ewe Aewin Presetensi, October 2013
Wisach ne Amanaua
Fan iten Aramas mi Pin non Fansoun Soponon, mi fakkun auchea non pekin fansoun ese much pwe sipwe amanaua pwiich me fefinach kewe, ir mi rikino seni ewe anen pochokun non ewe Mwichefen, ren och sokkun popun. Sia sinei ekkoch aramas mi etiwaochu ewe kapas allim fan eu? Ika ewer, met wisach pwe sipwe amanauer?
Oupwe ekieki usun ekkewe ir mi pout mwanino nupwen ra chinnap, ekkewe mi mano punuer, me ekkewe ir mi samau. Fan chommong ra nom non ewe fonupon mi pwas a iteni akkanaemon chok. Nupwen ra chinnap, nupwen pochokunen inis a kisikisino, nupwen ewe saramen epinukunuk a tin ekkis chok, ra tongeni manau me pochokun seni pounen aninis me ewe netipen tong.
Ennet, mi wor pwan ekkoch mi namwot repwe manau. Ekkoch ra osukosuk ren tipis me ekkoch ra fetan fein fan niuokus are chipwang are kukkunun ar mirit. Ren met chok popun, ra pwisin aimufesenir seni ar repwe pochokun non ewe Mwichefen. Meni repwe mwanucheno feinfeino chinon chok kich—ekkewe chon Mwichefen mi pochokun—sia mochen amanaua me anisir.
Emon Epwe Pwarata ewe An
Fansoun nom ua angei echo taropwe seni emon mwan a rikino seni ewe Mwichefen. A wewe ngeni chommong chon ach mwichefen. Mwirin a awewe ifa usun a patapatano, a makkei:
“A chommong ai feioch me iei a kukkun. Use pwapwa me ua mefi pwe use fefeita non och mettoch. Ewe kapas allim ese tou seni netipei, ina mo a tou seni manauei. Ua tingorei kopwe iotek fan itei.
“Ouse mochen ousap monukano am aua—Aramas mi Pin non Fansoun Soponon mi mwanucheno. Ua sinei ian ewe Mwichefen a nom ia, nge fan ekkoch ai nuku pwe mi namwot emon epwe pwarata ngeniei ewe an, pesei ngeniei, angei seniei ai niuokus, me kapasen pwarata ngeniei.”
Nupwen ua anneani ei taropwe, ua ekieki usun eu fansoun ua churi eu nenien chunga mi ningoch won fonufan—ewe Victoria me Albert Museum non London, England. Ikkewe, mi pwarata, eu nios minne Joseph Mallord William Turner a peiniti non 1831. Ewe nios a peiniti a pwarata kuuchu mi chonochon me ewe sat a nowatte a nikinikinin osukosuk me mano. Eu saram seni efoch mota a tin seni touau. Arapakkan, efoch motan amanau, mi osukosuk nesat ren ekkewe no. Ekkewe mwan ra fotunei ewe motan amanau nge a ekkis kok fan ewe menumen. Nepii emon fefin me ruemon semirit ra uta, chechen ren pungutiwen ran me ewe asepwan a kuu. Ra nenengeni ewe sat fan ar noninen. Non tupuwei ua amocha iten ewe nios. Me rei ua iteni Ne Amanaua.1
Nein ekkewe menumenun manau, a nom weires. Mwan me fefin, at me nengin ra pwisin kuna pwe ra anaemon me repwene tano. Ion epwe emweni ekkewe motan manau, epwe feino seni kinamwen imwan me an famini, me epwe feino aninis ne amanaua?
Wisach mi tufich ne pworacho ngeni. Sia fori an ewe Samon angang; sia tongeni weri An aninis.
Fansoun an ewe Masta misin, A kokkori ekkoch chon attau non Galilee pwe repwe su seni ar kewe chew me tapweno I, a apasa, “upwe aiti kemi ifa ussun oupwe attawa aramas.”2 Amo ita sipwe fiti ekkewe chon attaua mwan me fefin, pwe sipwe awora met chok aninis mi tufich.
Wisach ina pwe sipwe eitau ngeni ekkewe ir ra feino seni kinamwen pochokun non fan, pwe repwe niwinsefan ngeni ewe Samon ne kamatip won An kewe kapas, apwapwaiti chiechian Noun we Ngun mi Fel, me “ouse chuwen chon nukun are chon ekis, pun iei oua fiti noun Kot kewe aramas, iwe oua chon an Kot we famini.”3
Ewe Nongonongen Tong
Ua kuna pwe napengeni fansoun mi wor ru popun aramas ra niwinsefan me pochokun non fan me ren ekkesiwinin ekiek, me foffor. Akkomwan, aramas ra niwinsefan pokiten emon a pwarata ngenir tufichir non pekin fansoun ese much me ra anisir ne finata pwe repwe weri ekkena feioch. Ekkewe mi patapat rese tongeni pwapwa ren met ese och nupwen ra kuna pwe met mi fakkun och a nom fan iter.
Oruwan, ekkoch ra niwinsefan pokiten chon tongeir are “noun Kot kewe aramas” ra tapweno an ewe Chon Amanau kapasen aurour, ra tongei chon orur usun pwisin ir,4 me ra anisi ekkoch ne apwonueta ar mochen fan netiper pwe repwe wesewesen fisita.
Ewe minen amwitiri ei mettoch pwe epwe fisita—me epwe sopweno ne fisita—mi ewe nongonongen tong.
Ennetin, ekkewe aramas mi nom neset fan ewe menumen non an Turner we nios mi usun chok chommong chon ach mwichefen mi patapatono mi awiti repwe manau seni ekkewe ir ra emweni ekkewe motan manau. Netiper ra mochen aninis. In me sam ra iotek fan iten nour kewe at me nengin. Punuen mwan ra tingor ngeni nang pwe emon epwe kuu netipen punuer. Fan ekkoch semirit ra iotek fan iten semer me iner.
Ua iotek pwe sipwe mochen amanaua ekkewe ir mi patapatono me emwenir ngeni pwapwan ewe kapas allimen Jises Kraist, pwe repwe fitikich ne angei meinisin ekkewe feiochun chon mwichefen mi pochokun.
Amo ita sipwe eitau ne amanaua ekkewe ir mi mwanucheno mi nom unukuch: ekkewe chinnap, ekkewe mi mano punuer, ekkewe mi samau, ekkewe ir mi wor terir, ekkewe mi patapat, me ekkewe ir rese anneasosichi ekkewe annuk. Amo sipwe atora ngenir ewe poun aninis me ewe netip mi sinei tong ennet. Ren ach fori ei, sipwe wanong pwapwa non netiper, me kich sipwe mefi ewe pwapwa a eto ren ach anisi pwan emon an epwe fetan won ewe an ngeni manau ese much.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun First Presidency Message, October 2013. Chuukese. 10670 901
Afanafan seni Ei Poraus
Kopwe ekiekin eisini ekkewe ir ka churi ika ra sinei emon a kuna weires ne fiti fan. Ka tongeni fini emon aramas me poraus usun napanapan pwarata tong, usun chok tingorei i ne fiti pwinin famini are feito mongo.