Pweng sin Prestuhnsi Se Met, OHKTOHPA 2013
Ma Kunacsr in Molwelah
Nuh sin Mwet Luhlahlfongi ke Lwen-sahflah, mwe enenuh in molwelah tamuhlwel ac tahmtahel wiyacsr suc, ke srihpac se kuh sahyac, som liki inkacnek ke mukwikwi luhn Alu uh pa yohk srihpac ke ma pahtpaht. Oasr mwet ohinge kuht etuh suc eis wosasuc sie pacl ah? Fin oasr, meac kunohkohn lasr in molweloslac?
Motko ke mwet mahtuh, mwet katinmas, ac mwet mas. Pacl pucspucs elos kuh in konweyuckyak ke acn oalal kuh mwesis pahngpahng muhkahimtacl. Ke moul fuhsr uh som, ke fokoko wacngihnlac, ke kuh wacngihnlac, ke kahlwem luhn finsrak muhnahslah, elos kuh in kahsrweyuck ac ahkkweyeyuck ke paho se ma kahsruh ac insiyac ma etuh luhngse pwacye.
Oasr, pwacye, mwet sahyac suc enenuh langoeyuck. Kuhtuh muhnahs ke ma koluk ac kuhtuh sahyac fahsr ke sahngweng kuh wacngihn puhla kuh nihkihn ma nuh kwewa. Ke kuhtwena srihpac, elos sifacna srwacloslac liki mukwikwi luhn Alu uh. Ac elos fah kalweni in tuhlac nuh ke oasr acsmaklac in kuht—mempucr fokoko ke Alu uh—sie kena in molwelah ac in moullac.
Mwet Se in Ahkkahlwemye Inkacnek An
Kuhtuh pacl somlah ah nga eis lwacta se sihmlac sin mukul se suc som liki Alu uh. Ma inge oacna inkaiyen mempucr lasr uh. Tukun el ahkuhtweyac ohiyac ke el eklac suhkwac alu lac ah, el suhmuhslah:
“Puhkantwen ma luhk met ac ingena srihklac. Nga ahsor ac puhla oacna lah nga oruh koluk ke ma nuh kwewa. Wacngihn pacl wosasuc som liki insiyuck, finne som liki moul luhk. Nga siyuck ke pruhe lowos.
“Nuhnak muhnahs tiac muhlkuhnlah kuhtuh sesr suc oasr inge—Mwet Luhlahlfongi ke Lwen-sahflah tuhlac uh. Nga etuh lah piyac acn Alu uh, tuhsruhktuh nga nuhnkuh lah nga enenuh mwet se sahyac in ahkkahlwemye inkacnek an, ahkkweyeyuc, eslah sahngweng luhk, ac fahkwack luhlahlfongi lalos nuh sihk.”
Ke nga riti lwacta se inge, nuhnak luhk eklac nuh ke sie pacl ah ke nga som nuh ke sie sin art gallery luhlahp fin facluh—acn pwengpweng ke Museum Victoria ac Albert fin acn London, England. Ingoh, ke frame na kahto se, pa sie petsac wolacna sroallah ke yac 1831 sel Joseph Mallord William Turner. Atacn petsac ke puhkuhnyen toasr sroalsroal ac sraksrak luhn meoa pohlkuhlak ma ahkkahlwemye sensen ac misac. Sie kahlwem ke soko oak sisilac sahrlah loesalah. Ke muhtuhn oak an, totoyak fuhlwact ke noa utyak ke kof pulohllohl, oasr soko oak in molwelah luhlahp. Mukul uh pahtok lihksreni oac uh ke oak in molwelah soko ah fungul noa pohlkuhlak uh. Ke lihkihn pot ah tu sie muhtwacn pahyuck ac tuhlihk luo, sroksrok ke af uh ac puokyuck ke eng ah. Elos ngwetngwet sensen nuh meoa. Ke nuhnak luhk nga ahkfototoye inen sroal sac. Nuh sihk eklac nuh ke In Molwelah.1
Infulwacn pahkah luhn moul, ma sensen oasr kac. Mukul ac muhtwacn, mukul fuhsr ac muhtwacn fuhsr elos sifacna konweyuckyak tuhlac ac sun kuhnausyucklac. Suc ac fah kol oak in molwelah uh, som liki ma pwacr in lohm ac sucu, ac som nuh ke molwelah?
Kunohkohn lasr tiacna upaclac. Kuht wi orekma luhn Leum; kuht olweyucklac nuh ke kahsruh Lal.
Ke puhlan orekma lal Mwet Kol, El pahngon mwet pahtuhr fin acn Galilee in som liki nwek lalos ac ukwacl, fahkwack, “Nga fah luti kowos ohiyacn pahtuhri mwet.”2 Lwelah kuht in wi orekma ke mwet pahtuhr luhn mukul ac muhtwacn uh, tuh kuht kuh in sang kuhtwena kahsruh kuht kuh nuh kac.
Ma kunacsr pa in saplakyang in molwelah mwet suc som liki acn wo luhn mukwikwi, tuh elos kuh in tuhkuh nuh ke tepuh luhn Leum in lutlut yohk ke kahs Lal, in engankihn wi luhn Nguhn Lal ac “tiac sifil mwet sac kuh mwet tahkuhsrkuhsr; a kowos mwet wiyacn mwet luhn God ac mwet in sucu luhn God.”3
Ip Yohk luhn Luhngse
Nga konwacack lah oasr srihpac yohk luo in kahsruh mwet in fohlohk nuh ke Alu ac eklac ohiyaclos, mwe pahlah lalos, ac mukwikwi lalos. Ma se met, kais sie fohlohk ke srihpen mwet se ahkkahlwemye nuh selos ohiyac ma pahtpaht lalos ac kahsrwelos in sulaclah in sun ma inge. Mempucr suhkwac alu uh tiac kuh in kalweni ke ma infulwac ke elos liye ma wolacna fototo nuh ke saplak lalos.
Ahkluo, mwet sahyac uh fohlohk ke srihpen mwet suc luhngse elos kuh “mwet wiyacn mwet luhlahlfongi” ukwe mwe luti luhn Mwet Lahngo, luhngse mwet tuhlan lalos oacna elos sifacna,4 ac kahsruh mwet sahyac uh in oruh finsrak lalos in ahkfalyeyuck ac kena lalos in ahksahfyeyuck.
Ma kahsruh in eklac ke ma inge pa—ac fah kalweni in pa—ip yohk ke luhngse.
Ke sie ohiyac pwacye, mwet tuhlac ke petsac luhn pahkah sel Turner oacna mempucr pucspucs lasr suc suhkwac alu suc tuhpan molwelah sin mwet suc kol oak in molwelah uh. Insiyaclos kena yohk ke kahsruh. Ninac ac pahpah uh pruhe ke tuhlihk mukul ac muhtwacn nahtuhlos uh. Muhtwacn pahyuck uh kwacfwe inkuhsrao tuh mukul tuhmwaclos uh kuh in kahsrweyuck. Kuhtuh pacl uh tuhlihk uh pruhe ke pahpah ac ninac kiyaclos.
Pa inge pruhe luhk tuh in oasr kena lasr in molwelah mempucr ma suhkwac alu ac in fohlohkohnohlosme nuh ke mwe engan ke wosasuc luhn Jisus Kraist, tuh elos kuh in ipeis yohrohsr ma asruoki nohfohn uh kuh in sang.
Lwelah kuht in saplakyang in molwelah mwet tuhlac suc raunikuhtlac: mwet mahtuh, mwet katinmas, mwet mas, mwet suhkahpahs, mwet suhkwac alu, ac mwet suc tiac karihngihn masap an. Lwelah kuht in sang nuh selos paho ma kahsruh ac insiyac ma etuh luhngse pwacye. Ke kuht oruh, kuht ac sang engan nuh insiyaclos, ac kuht ac puhla engan yohk ma tuhkuh nuh sesr ke kuht kahsruh mwet sahyac nuh ke inkacnek nuh ke moul ma pahtpaht.
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/13. Ahkkweyeyucklac ke lweng: 6/13. Lwenglah luhn First Presidency Message, October 2013. Kosraean. 10670 868
Luti ke Pweng Se Inge
Motko in siyuck mwet kom liye an elos fin etuh kuhtwena mwet suc muhnahs in wi alu. Kom kuh in sulaclah mwet se ac sramsramkihn ohiyac in ahkkahlwemye luhngse, oacna in solwacl in wi ekuh in toeni luhn sucu kuh tuhkuh nuh lohm ah in wi mongo.