Etop eke Visiting Teaching, Ofiong Duopekiet ke isua 2013
Di, Buana Ye Nnyin
Ke nte ndaha mbufo ekpededi, mbuk uwem eke idem mbufo, ye osongo eke iko ntiense mbufo, ufang odu ono mbufo ke ufok Abasi emi.
Ini kiet ama odu erenowo kiet emi akadabade ndap nte enye okodude ke akamba ufot ufok kiet emi kpukpru mme edu ukpono ke ofuri ererimbot ekeboghoke otokiet. Enye edifiok ete ke edu ukpono kiet ema enyene ediwak nkpo eke ekpewutde inem ye ekpedotde.
Enye ama okut ediye ebe ye nnwan kiet emi ekedade eno ufok Abasi Jesus Christ eke mme Latter-day Saints onyung obup ete, “Nso ke mbufo eyom eto members mbufo?”
mmo ekeboro ete, “ Nnyin isiyomke nkpo ndomo kiet.” ”Edi Jehovah oyom ete nnyin ino ofuri nkpo.”
Ebe ye nnwan oro ema eka iso nditing mbanga mme ikoot eke ufok Abasi, home ye visiting teaching, full-time missions, mbono mbubreyo kwa urua, utom eke temple, utom unwam ye eke idem owo, ye udeme utom ndikpeb nkpo.
”Nte mbufo emesikpe mbio mbufo okuk ke kpukpru se mmo enamde do?” erenowo oro okobup.
”Iyo, ihn-ihn,” ebe ye nnwan oro ema enam anwanga. ”Mme eno ini mmo ke mfon.”
”Nko,”Ebe nnwam oro eka iso, “kpukpru ufang ofiong itiokiet mbio ufok Abasi nnyin esibiat hour duop ke weekend kiet ndika nkeduk mme ndisese ndise eke general conference.”
”Ini hour duop nte mme owo etingde iko?” erenowo odu ke mkpaidem.
”Nso ndien kabanga mme ediinam ufok Abasi ke ufot urua kiet kiet? Didie ke oro esibighi etre?”
”Ini hour ata, kpukpru usen Ederi!”
erenowo odoho ete “Oh, se ami,” ”Nte mbio ufok Abasi mbufo esitim enam se afo etingde mi?”
”Oro ye ediwak eken. Nnyin ikam isiakke family history, youth camps, deviotionals, edidungo nkpeb nwed Abasi, ukpeb eke mme adausung, edinam eke mme iwaad, edibak-nka seminary ke usenubok, ndikwok anwa ufok Abasi man asana ndien nko odu mbet nsongidem eke Jehovah, eno eke utre udia man enwam mme ubuene, ye ndikpe oyoho mbak duop.”
Erenowo oro odoho ete, “Etimere mi idahaemi. Ntak emi owo nte kiet ekpeyomde ndika uto ufok Abasi oro?”
Ebe ye nnwam oro ema esak enyung edoho ete, “Nnyin ikekere ete ke afo udubupke mbume oro.”
Ntak Emi Owo Nte Kiet Ekpekade Oruk Ufok Abasi oro?
Ke ini emi ediwak ufok Abasi ke ofuri ererimbot esuhokere ke ibat, ufok Abasi Jesus Christ eke mme Latter-day Saints — ekpedi nte esipde ke udomo ye ediwak eken — edi kiet ke otu ufok Abasi ekekoride akan ke ofuri ererimbot. Ke Ofiong Usukkiet ke isua 2013 ufok Abasi enyene ibat members okponde akan million Efut ke ofuri ererimbot.
Odu ediwak ntak nte emi etibede, edi yak ami nsiak esesit?
Ufok Abasi eke Andinyanga
Akpa, Jesus Christ ke Idemesie ekefiak emen ufok Abasi emi edi ke eyo nnyin emi. Ke ufok Abasi emi mbufo eyekut odudu ndinam nkpo ke enying Abasi — man obo uduok mmong man efen mme idioknkpo, man obo eno Edisana Spirit, onyung obop adian ke isong ye ke enyong.1
Mbio eke edukde ufok Abasi emi ema Andinyanga Jesus Christ enyung enyime nditiene Enye. Mmo edara ke ndifiok ete ke Abasi esifiak eting iko ono ubon owo. Ini emi mmo ebode edisana edinam itie oku enyung enam ediomi ye Abasi, mmo ekeme ndikop odudu Esie ke uwem mmo.2 Ini emi mmo edukde edisana temple, mmo efiok ete ke mmo idu ke iso ESie Ini emi mmo ekotde ndisana nwed Abasi3 enyung enam ukpebnkpo eke mme prophets esie, mmo eyekori ekpere Andinyanga emi mmo etimde ema.
Enyene Uwem Mbuotidem
Ntak efen edi koro ufok Abasi esino mme ufang man enam eti nkpo.
Ndinim Abasi ke akpaniko ofon, edi ediwak owo eyom ndinam awak akan ndikpang utong nno inem ukworo iko mme ndidapa ndap mbanga akamba ufok mmo ke enyong.4 Mme eyom ndisin mbuotidem mmo ke utom. Mmo eyom ndikpang ubok ofongidem mmo ndien ekabare enwam ke akwa utom emi.
Nden emi edi se iditibe kini mmo edibuanade ye nnyin — mmo enyene ediwak ufang ndikpuho eno, esitmbom, ye ini mmo nsin ke eti utom. Koro nnyin minyeneke okworo iko Abasi eke ekpede okuk ke mme eboho nnyin k ofuri ererimbot, mbio nnyin enam utom ukworo iko emi ke idem mmo. Eda odudu Abasi ekot mmo. Ubak ini nnyin inyime ndinam ke idem nnyin, ubak ini “enyenyime eno nnyin.” Nnyin ikutke iso utom nte mbiomo edi nte mme ufang ndinam ediomi emi nnyin ikedatde esit inyime man inam nkpo ino Abasi ye ndito Esie.
Mme Nkpouto Edidiong
Oyoho ntak ita eke mme owo edidukde ufok Abasi edi koro ndisanga ke mkpafaha usung eke mbet edida ikesim osongurua edidiong.
Nnyin ida uduok mmong nte ntongo isang nnyin nte mbet. Nnyin ndisanga ye Jesus Chrsit kpukpru usen edida ikesim emem ye uduak ke uwem emi ye akwa idara ye nsinsi erinyanga ukpong ke ererimbot eke edidide.
Mbio eke eketimde etiene mkpafaha usung ebogho ediwak nkpo iduo, mfuho ye mkpofiok eke uwem.
Mbio se ibuene ke Spirit ye andinam akpaniko ke esit ekut akwa nkpouto eke ifiok mi.
Mbio ekebode ndutuho ye efuhode ebo erikok mi.
Mbio se ibiom mbiomo idioknkpo eyebo mfen nno, uworo ufin ye nduok odudu.
Eno Mbio Eke Eworode
Ndidungo nyom akpaniko ada ata ediwak owo edi Ufok Abasi Jesus Christ eke mme Latter-day Saints. Nte ededi, odu ubak owo eke eworode ke ufok Abasi emi mmo ema ekema ke akpa.
Owo ekeme ndibup ete, “Edieke gospel enemde, ntak emi owo nte kiet ekpeworode?”
Ubak ini nnyin imesikere ete koro ema edue mmo ye ifu mme edinam idioknkpo. Ke akpaniko, oro itimke imem ntre. Ke akpaniko, iduhe ntak kiet kpot eke edade enam nkpo eno ediwak ndaha.
Ubak mme nti members nnyin enwanwana ke ediwak isua ye mbume mme mmimo ikpediangare idem mmo ikpong ufok Abasi.
Ke ufok Abasi emi esongode ekpono agency eke owo, eke akparawa emi okobupde mbume oyom iboro akafiakde emen edi nnyin imekpono mbio eketimde edungo eyom akpaniko. Esit nnyin ekeme nditua eyet ini emi isang mmo adade mmo oworo okpong ufok Abasi emi nnyin imade ye akpaniko emi nnyin ikokutde, edi nnyin ikpono unen mmo ke ndikpono Abasi Ibom ntiene udong isong esit mmo, ukem nte nnyin idade ufang ndikpono nno idem nnyin.5
Mbume eke owo Miboroke
Ubak owo enwanwana ye mbume eke iboro miduhe kabanga mme nkpo emi ema ekenam mme iko emi ema eketing ke edem. Nnyin ke anwa-anwa imenyime ite ke esesit mbemiso ufok Abasi edisim isua Ikie Iba — diana ye unana okposong ubiongo, odot ukpono, ye ndisana nkpontibe — odu mme nkpo emi eketingde ye ekenamde emi ekemede ndinam mme owo ebup mbume.
Ubak ini mme mbume esidi koro nnyin isinyeneke ofuri information ndien ana nnyin inyene esesit ime. Ini emi ediongode ofuri akpaniko ke akpatre, mme nkpo emi minyeneke se oworo ono nnyin ke akpa eyebiere oyuho nnyin.
Ubak ini odu ubahare ekikere kabanga nkpo se “akpaniko”etimde oworo. Mbume eke ubak nnyin ikemede ndiyik, ke ima itim idungo ikure eyesongo mbuotidem ke idem owo efen.
Ndudue eke Mme Owo emi Mifonke-ima
Ndien, ke nditim nting akpaniko, odu ediwak ini emi members ye mme adausung ke ufok Abasi esinamde ndudue. Ekeme ndidi odu mme nkpo emi eketingde ye ekenamde emi mikesangake ikem ke ufon, akpan ekikere, ye doctrines nnyin.
Ami ndikere nte ke ufok Abasi okpofon ama kpot edieke mfon mma owo ekpedade usung. Abasi ikpong ofon ama, ndien doctrines Esie edi edisana. Edi Enye anam utom ye nnyin — anana mfon mma ndito Esie — ndien mme anana mfon mma owo esinam ndudue.
Ke akpa ikpa nwed eke Nwed Mormon nnyin ikot ete, “Ndien ke emi edieke mme ndudue edude mmo edi ndudue owo, ke ntre, ekusiongo ubok utom Abasi ndo man edikut ndo ke idem mbufo ke ini editiede ke itie-ikpe Christ.”6
Emi edi usung nte esidide kpukpru ini ndien eyedi ntre tutu edisim ata eti usen ini emi Christ ke Idemesie edidade ubong ikpong ke ofuri iso isong.
Edi nkpo mbom koro ubak owo eduo ke ntak ndudue emi mme owo ekenamde. Edi ke ofuri emi, nsinsi akpaniko eke restored gospel emi odude ke Ufok Abasi Jesus Christ eke mme Latter-day Saints idibiarake, idinimeke, inyung isoboke.
Nte mbet eke Obong Jesus Christ kiet ye nte owo kiet emi ama okut ata akpa mme esop ye ubono nkpo ufok Abasi emi, Ami ndi oyoho ntiense nte ke iduhe akpan ubiere eke otukde ufok Abasi ye members emi ekenamde ke mibemke iso itim iyom odudu, ndausung, ye unyime eke Nsinsi Abasi Ete. Emi edi ufok Abasi eke Jesus Chris.t Abasi idiyakke ufok Abasi Esie edutun ekpong usung emi ekenimde ye ediduo ntre ndinam edisana akanga esie.
Ufang Odu ono Mbufo
Nting nno mmo emi edinagare idem mmo ekpong ufok Abasi, Ami ndoho nte, mme ndina ufan mi, ufang osuk odudu ono mbufo mi.
Di ndie dian oniong, eno ye ukeme mbufo ke eke nnyin. Kpukpru nnyin iyekabare ifon ima akpatre.
Ubak owo ekeme ndibup, “Edi kabanga mme eyihi mi?”
Edi nnen-nnen nkpo ndinyene mbume — ekpri edidungo ke esit akpaniko esiwak nditibe nyung nkori nkesim akamba ifiok. Odu ibat-ibat mbio ufok Abasi eke, ke kiet mme eken, minwanake ye okposong mme ufiop-ufiop mbume. Kiet kotu uduak eke ufok Abasi edi ndibok nyung mkpeme mkpasip mbuotidem— ekpri ke ubak ini eketo ke isong ntatara eke eyihi ye unana idorenyin. Mbuotidem edi ndidori enyin ke nkpo eke enyin mikwe oro edide akpaniko.7
Ke ntre, ndima ndito eka iren ye iban — ndima ufan mi—mbok, ke akpa yik eyihi mbufo mbemiso mbufo ediyik mbuotidem mbufo.8 Nnyin inaha nte iyak eyhihi omum nnyin ukat onyung ada nnyin okpong edisana ima, emem, ye eno eketode mbuotidem ke Obong Jesus Christ.
Ubak owo ekeme nditing ete, “ Ami ndotke ndiduk otu mbufo ke ufok Abasi .”
Edieke mbufo ekpesede isong esit nnyin, mbufo ekpekeme ndikut ete ke mbufo emedot eduk ofon akan nte mbufo ekerede. Ekeme ndidu mbufo ke mkpaidem ete ke nnyin imeyene udong ye mfana ye idorenyin emi edide ukem nte eke mbufo. Ebiet ye ndaha nkori mbufo eke ndikpuho mkpong se mbufo ekerede ebanga mme ediwak Latter-day Saints, edi oro ekeme ndidi edidiong. Ndito eka iren ye iban, ndima ufan mi, nnyin imoyom sanga-sanga oniong ye idorenyin mbufo. Mme nsio-nsio ndaha kpukpru mme owo ke ofuri ererimbot edi nsongonda ono ufok Abasi emi.
Ubak owo ekeme nditing ete , “Ami nkerede nteke ami nyekeme ndidu uwem nsim ndaha eke mbufo .”
Ke ofuri ediwak ntak se idi! Ekesiak ufok Abasi enim eno ndibok mbio unana mfon mma, mbio emi enwanade enwana ndiyo, ye mbio emi idem ememde. Ufok Abasi oyoho ye mme owo eke enyenede udong ke ofuri esit mmo ndinim mbet, ekpedi nte mmo mikanke inim mbet oro ima kanga.
Ubak owo ekeme nditing ete, “Ami mmediongo owo ufok Abasi mbufo emi edide owo mbubik.Ami ndikemeke ndiduk ufok Abasi kek enyende oruk owo oro ekebietde enye nte member .”
Edieke mbufo esede owo mbubik nte owo emi etrede ndidu edinen uwem man ekekan ke se enye enimde ke akpaniko, ndien kpukpru nnyin idi mbio mbubik Iduhe owo nnyin eketimde ebiet Christ nte ifiokde danga nnyin ikpebiet. Edi nnyin imetim inyene udong ndikan mme ududue nnyin ye udong nditre ndinam idioknkpo. Ye esit ye ukpong nnyin,nnyin imoyom ndikabare ndi nti ke unwam eke Uwa Usio Isop Jesus Christ.
Edieke emi edide udong mbufo, ndien ke suto ndaha eke mbufo edude, mbuk uwem mbufo, mme osongo iko ntiense mbufo, ufang odu ono fi ke ufok Abasi emi. Di, buana ye nnyin!
Di, Buana ye Nnyin!
Sia nnyin inyenede ndudue nte owo, Ami mmenim ke akpaniko nte ke mbufo eyekut kotu mbio ufok Abasi emi ediwak nti owo eke ererimbot enyenede ndino. Ufok Abasi Jesus Christ oyom mbio emi efonde ido ye mme andinyene ima, mme anam akpaniko ye mbio emi esinde idem enam utom.
Edieke mbufo ekerede ete ke iyekut mbio emi efonde ema mi, eyekpu fi. Edi edieke mbufo eyomde edisana doctrine Christ, iko Abasi “emi erikokde unan eke ukpong,”9 ye odudu edinam asana eke Edisana Spirit, ndien mi ke mbufo edikut oro. Ke emana emi mbuotidem osuhode mi— ke emana ini emi ediwak owo ekerede eyom usung ekpong unwam eke heaven — mi ke mbufo edikut mme owo eke eyomde ndidiongo nnyung nsanga mkpre Andinyanga mmo ke ndinam nkpo nno Abasi ye owo efen, ukem nte mbufo. Di, buana ye nnyin!
Nte ke Odung Mbufo Nko Ndidianare Nnyong?
Ami nditi ini kiet ke uwem Andinyanga emi ediwak owo ekekpongde Enye.10 Jesus okobup mbet duopeba Esie ete:
“Nte ke odung mbufo nko ndidianare nnyong?
“Simon Peter oboro Enye ete, Obong, nnyin iditiene anie? Afo enyene iko uwem nsinsi.”11
Odu mme ini eke nnyin inyenede iboro ino ukem mbume oro. Nte ke odung mbufo nko ndidianare nnyong? Mme nnyin, ukem nte Peter, iyemum mme iko uwem nsinsi ikama?
Edieke oyomde akapaniko, emi oworode ete, ye ke usung ndikabare mbuotidem nsin ke utom; edieke mbufo eyomde ebiet emi okpotode: Di, buana ye nnyin!
Edieke edide mbufo ema eworo ekpong mbuotidem emi ema ekemum ekama ke akpa:Fiak edem di. Buana ye nnyin!
Edieke idomo oyomde ndikan fi: Bet ke esesit ini. Ufang odu ono mbufo mi.
Ami mbenge kpukpru mmo eke ekopde mme ekotde iko emi nte: Di, buana ye nnyin. Di kop sung-sung ikot eke Christ. Men cross mbufo nnyung tiene Enye.12
Di, buana ye nnyin! Koro mi ke mbufo edikut nkpo eke osongde urua akan ekom urua.
Ami nting iko ntiense nte ke mi ke mbufo edikut iko uwem nsinsi, enwongo eke eti ufak, ye mkpafaha usung emi adade aka emem ye inemesit.
Ami mmetim mbong akam nte yak edidungo nyom akpaniko ke idem mbufo edisin udong ke esit mbufo ndidi man edibuana ye nnyin. Ke edisana enyin Jesus Chrst, amen.
© 2013 otode Intellectual Reserve, Inc. Emenim kpukpru unen. Ekeming ke USA. Enyimme eming ke Iko Mbakara: 6/13 Enyimme Ndikabare: 6/13 Edikabare eke Visiting Teaching Message, November 2013. Efik. 10671 553