Etop eke First Presidency, Ofiong Duopekiet ke isua 2013
“Ami Ndiyakke Fi Nduok, Ndinyung Nkpongke Fi
Ete Nnyin ke Enyong … omodiongo ete ke nnyin idikpeb ikori inyung ikabare isongo nte nnyin ikutde inyung iyo mme idomo emi nnyin idibede.
Ke journal mi ke okoneyo emi, Ami ndiwet nte, “Emi ekedi kiet ke otu inem ikpehe general conference eke ami nkedukde. Kpukpru nkpo ediworo okpononyung oyoho ye uduot eke spirit.”
Ndito eke iren ye iban, ofiong itiokiet emi ekebede nte nnyin isobode otokiet ke general conference nnyin, inem anwan mi, Frances, ekena ke ufokibok, ke ama okoduo akamba iduo kpa ke usen ifang emi ekebede. Ke ofiong Ition, ke enye ama okodomo ndisongo man edikan mme unan esie, enye ama ebe efeb ke nsinsi. Ami mmenana enye etieti. Ami ye enye ikedian ndo ke Temple Salt Lake ke October 7, 1948. Usen mkpong ekpekedi oyoho isua Ata ye ition tongo nnyin ikedian ndo. Enye owo eke Ami mmade nkan ke ofuri nkpo ke uwem mi, nsanga mbuotidem mi, ye ufan ekekperede mi akan. Nditing nte ke Ami mmenana enye itongoke ndimen nwut ntutungu ekikere mi.
Conference emi anam oyoho isua Aba ye duop tongo President David O. McKay ekekot mi esin ke Eboho mme Mbet Duopeba. Akananam iduhe ini ekededi ke ofuri mme isua emi eke Ami nkenyenede nkpo ndinam ke mmenyeneke oyoho ye ofuri iberedem eke anwan mi. Nwaidem emi enye ekesinamde man otodo ami nkeme ndinam ubiongutom mi ekedi anana ibat. Akananam Ami nkopke nte enye esemede koro ekesiwak ndiyom mi ndida ediwak usen ye ubak ini mme urua nworo nkpong enye ye ndito nnyin. Enye ke akpaniko, ekebiet angel.
Ami nyom ndino ekom mi, Diana ke ekom eke mbio ufokidung mi, ke nditim nwut ima emi nnyin ikutde tongo Frances ekebe efeb. Ema eno ediwak cards ye letas eto ofuri ererimbot ndiwut ima nno enye ye mbom nno ufokidung nnyin. Nnyin ima ibo ediwak mme ediye flower. Nnyin imenem esit ke ediwak etibe eke enode ke enying esie esin ke General Missionary Fund eke ufok Abasi. Ke ibuot ofuri nnyin eke enye okpongde ayak, Ami mmetim nnem esit kabanga mfonido ye esit ekom ima eke mbufo.
Nkpo emi eketimde odong mi esit akan ke ini ekediangare Sister Monson ekpong mi edidi iko ntiense mi ke gospel Jesus Christ ye ifiok eke Ami nnyenede nte ke edema Frances mi mmodo ke uwem. Ami mmodiongo nte ke edidiangare nnyin edi ke esesit ini. Owo emi enyenede odudu ndibup nnyung ntat nkpo ke Enyong ye ke isong ekedian nnyin otokiet ke ufok Jehovah. Ami mmodiongo nte ke nnyin iyefiak idiana usen kiet otokiet ndien ididiangakere aba. Emi edi ifiok eke anwamde mi.
Ndito-eka iren ye iban, imekeme ndikere ete ke iduhe owo kiet emi okodude ke ererimbot eke mikutke ufen ye mfuho, nko iduhe ini ke uwem isong eke ndutime ye unana inemesit miduhe.
Ini emi nnyin ikutde nsong nkpo ke uwem, ke ini idomo imekeme ndibup mbume emi ’Ntak edige ami?” Ndusuk ini esibiet nte ufen nnyin inyeneke utit, ke nnyin idiboghoke mme idomo nnyin. Nnyin idikere ke udong nnyin okpu onyung oyoho ye unana idorenyin. Nnyin ibuana ikpeubok nte Bible ewetde, ”Nte aran emi osukde ubiak ke Gilead iduhe?”1 Nnyin idikere ete ke emesin nnyin, iyoho ye mfuho, idu ikpong. Nnyin idikere ida ise ndiokiso nnyin ye unana idorenyin. Nnyin ikabare inana ime ke ndiyom uboho nno mme mfana nnyin, ifefre ndinyene ime ke kpukpru nkpo.
Mme okposong nkpo eke esinde nnyin owut nnyin ata idomo eke nnyin ikpekemede ndiyo. Ata akpan mbume odu emi nnyin kiet kiet idiboro: nte ami nyeduo, mme ami nyesim utit? Ubak owo esiduo kini mmo ekutde ete ke mmimo idikemeke ndikan mme okposong nkpo emi. Ndisim utit esine ndiyo tutu esim utit uwem ke idemesie.
Nte nnyin ikerede ibanga nkpontibe emi etibede ono nnyin kiet kiet, nnyin imekeme nditing nte Job, emi okodude ke eset, ete ”Owo amana ono ukut.”2 Job ekedi ” mfonma ye edinen” owo emi ”akabakde Abasi, onyung afara ke idiok.”3 Enen ke ido esie, oforo ke inyene esie, Job ama okut idomo emi ekpekemede ndibiat owo ekededi. Ema ebo enye ofuri inyene esie, mu ufan esie esin enye, obo ubiak ke ufen esie, ofuho ke ndinana ufokidung esie, ema eteme enye ete ”kpong Abasi, ndien kpa mkpa.”4 Enye ama ebe idomo emi ndien edifiori oto ntotungu ukpong esie ete:
”Sese, ntiense mi odu ke enyong, iberedem mi odu ke edikong ebiet.”5
”Ami mmofiok nte ke Andifak mi odu uwem.”6
Job ama enyene mbuotidem. Nte nyin inyenam ukem oro kini nnyin ikutde nsongo nkpo ke uwem nnyin?
Ini ekededi eke nnyin ikerede ke oyobio eke uwem oyom ndibop nnyin nduok, yak nnyin iti ete ke mme owo efen ema ebe ke ukem usung oro, eyo, ndien ema ekan.
Mbukuwem eke ufok Abasi ke, uyoho edikem ini emi oyoho ye ukpebnkpo mbio emi ekenwanade ndien esuk enyenyene iwuk enyung esongde esit. Nsidi ntak? Mmo ema eda gospel Jesus Christ esin ke uwem mmo. Emi edi nkpo eke edinwamde nnyin ndiyo nkpntibe eke idikutde ke uwem. Nnyin iyesuk ikutmkposong mfana, edi nnyin iyekeme ndiyo mmo, ye nsongo nda ndien ke akpatre iyekan mmo.
Oto ke ubiak itie bed emi nnyin inade, oto ke udori ibuot emi nnyin isituade eyet, edisana nsongnda ye eti enwongo emi edimenede nnyin ke enyong. ”Ami ndiyakke fi nduok, ndinyung nkpongke fi.”7 Oruk ndongesit emi inyeneke ekom urua.
Nte Ami nsisangade ke itung ye inuk ke ofuri ererimbot man nnam ubiongutom eke ikot mi, Ami mmediongo ediwak nkpo—ke esit oro edide ete ke kpukpru owo ekut mfuho ye ufen Ami nkemeke nditongo ndomo kpukpru ubiak ye mfuho eke Ami nkutde kini Ami nsikade nkosobo ye mbio emi edude ke mfuho, edongode, eyode ukut uworo ke ndo, enwanade ye eyeneren mme eyen-anwan emi oworode okpong usung, ye mbio emi ebode ufen eto idioknkpo. Ibat emi ekeme ndika iso, koro odu anana ibat mfana emi ekemede nditibe nno nnyin. Ndisiak kiet kpot nte uwutnkpo edi okposong nkpo, ndien edi ini ekededi eke Ami nkerede mbanga mme mfana, Ami ndikere mbanga Brother Brems, emi ekededi Sunday School teacher kiet kini uyen mi. Enye ekedi oyoho owo ufok Abasi, owo emi ekenyenede ata ima. Enye ye nnwan esie, Sadie, ekenyene ndito itiaita, ediwak kotu oro ekedide ukem isua emana ye mbon eke ufokidung nnyin.
Ke Ami ye Frances ima ikedo ndo inyung iworo ikpong ward oro, nnyin ima isikut Brother ye Sister Brems ye mbio ufokidung mmo ke itie ndo ye itie mkpa, ye ke ward reunions.
Ke isua 1968, nnwan Brother Berms Sadie, ama akpa. Ndito iba kotu ndito itiaita esie ema ekpa nko ke mme isua oro ekebede.
Usen kiet ke nkpo nte isua Duopeta emi ekebede, nkponkan eyeyen-anwan eke Brother Brems ama okot mi ke telefon. Enye ama eting ete ke etebom imo esim isua emana Ikie ye ition. Enye eting ete ke”Enye odu ke ekpri ebiet ukpeme edi esisobo ye ofuri mbio ufokidung esie kpukpru usen Ederi, emi enye esinode mmo ukpebnkpo iko Abasi.” Enye aka iso eting ete, ”Usen Ederi emi ekebede Grandpa ama ono nnyin ntot te, ”Mme ndima mi, Ami nyekpa ke urua emi. Mbok enyime ndikot Tommy Monson eno mi. Enye eyefiok se edinamde”.
Ami mma nkese Brother Brems ata edem mbubreyo usen oro. Ama ebighi esesit Ami nkwe enye. . Ami nkekemeke nditing iko ye enye, koro enye ikekopke nkpo aba. Ami nkekemeke ndiwet nkpo nno enye okot, koro enye ama akabare nnan. . Ema esian mi ete ke mbio ufokidung esie esineme nneme ye enye ke ndida nnuenubok nnasia esie ndien eduri enying owo emi edisede enye ke ekaubok esie. Enye eyeneme etop ekededi ke ukem usung emi. Ami ma ntiene usung edinam nkpo emi ke ndida nnuenubok esie nnyung nduri T-O-M-M-Y M-O-N-S-O-N, enying emi enye okodiongode mi kpukpru ini. Brother Brems akabare enem esit ndien, ada ubok mi, odori ke ibuot esie. Ami mma mfiok ke udong esie ekedi ndibo edidiong itie oku. Awat moto emi akadade mi aka ebiet ukpeme oro ama adiana ye ami man nnyin idori ubok nnyin ke ibuot Brother Brems inyung ino edidiong emi enye okoyomde. Ke oro okurede, mmongeyet ama efehe osuhore oto nkimkim enyin esie. Enye ama omum ubok nnyin ke inemesit ekom. Okposukedi nte enye mikikopke iko edidiong emi nnyin ikenode enye, nnyin ima ikop utenge Spirit etieti, ndien Ami mmenim ke akpaniko nte ke enye ama enem esit ndidiongo ete ke nnyin ima ino edidiong emi enye okoyomde. Ediye ete emi ikekwe usung aba. Enye ikekopke nkpo aba. Kpukpru usen enye okodu ke ekpri ubet ufok ke ebiet ukpeme emi. Ndien ke ntre imam emi okodude ke okpo iso esie ye mme iko emi enye eketingde ama otuk esit mi. Enye okodoho ete, ”Sosongo.” ”Ete mi ke Enyong emefon ido akagha ye ami.”
Ke ufang urua kiet, ukem nte Brother Brems eketingde, enye ama ebe efeb ke mkpa. Akananam enye ikebiatke ini ndikere mbanga nkpo emi ananade enye; edi, kpukpru ini enye ama ono ekom ke mme ediwak edidiong esie.
Ete Nnyin ke Enyong, emi okonode nnyin ediwak nkpo ndidara nko ofiok ete ke nnyin iyekpeb inyung ikori ndien ikabare isongo kini emi ikutde idomo ndien iboho mme idomo emi anade nnyin ndibogho. Nnyin imediongo ete ke ini odu eke nnyin idinyenede mfuho mbungo esit, ini emi nnyin idifuhode, ye ini emi ekpedomode nnyin esim akpatre. Nte ededi, oruk nsongo nkpo oro eyenwam nnyin ndikpuho ke usung emi nnyin idifonde, man ifiak isuho uwem nnyin ke usung eke Ete nnyin ke Enyong ekekpebde nnyin, ndien man ikabare ikpuho ikpong se nnyin ikedide— ifon ikan nte ikedide, inyene ifiok ofon akan nte ekedide, inyene mbom ikan nte ikedide, ye okposong iko ntiense ikan nte ikenyenede ke akpa.
Emi ekpedi udong nnyin—idige ndisin ifik nnyung nyo kpot, edi nko man ikabare isana ke Spirit kini nnyin idude ke ufot eti ye idiok ini. Mikpidige ke ntak nsongo nkpo man ikan inyung iyo mme mfana nnyin, nnyin ikpedu nte nnyin idide idaha emi, ye ekpri mme unana nkori ono udong nnyin kabanga nsinsi uwem. Andiwet uto etim emen ukem ekikere emi owut ke mme iko emi:
Eti eto ikorike ke mmem-mmem ebiet.
Okposong ofum, ekem ye okposong eto.
Nte eto enyenede ediwak ufang ndikori, ntre ke enye edi-nyong ika.
Nte oyobio okponde, odudu esie okpon ntre.
Oto ke eyo ye etuep, oto ke edim ye snow.
Nti eto okori ke eto, ndien nti ido esikori oto owo.8
Andikpeb kpot ofiok adanga idomo, ubiak ye ndutoho nnyin. Enye kpot edino nnyin nsinsi emem ke ini oyobio. Enye kpot edinyene mbom ino ukpong nnyin ke mme iko idongesit Esie emi.
”Etiene mi, kpukpru mbufo emi ekpade mba enyung ebiomde edidobi mbiomo, ndien Ami nyeno mbufo nduok odudu.
”Emen okpono mi ekongo ke itong mbufo, enyung ekpebe mi; koro mmenyene ifure-ifure ido nnyung nsuhore idem ke esit; ndien mbufo eyekut nduok-odudu eno ukpong mbufo.
Koro okpono mi ememem, mbiomo mi onyung efefere.”9
Mme ekpedi ke eti ini mme ke idiok ini, Enye mmodo ye nnyin. Enye ama onwongo ete ke emi idikpuhoke.
Ndito eka mi iren ye iban, yak nnyin inyene iwuk ino Ete nnyin ke Enyong emi midikpuhokere ye ini ye nte oyobio otukde uwem nnyin. Inaha nte nnyin ikut ukut man iditi Enye, ndien inaha nte ekpakpak nnyin man isuhore idem mbemiso idibuot idem inim Enye ke akpaniko.
Yak nnyin kpukpru ini idomo ndidu mkpere Ete nnyin ke Enyong. Man inam oro, nnyin inyene ndibong akam nno Enye inyung ikpang utong ino enye kpukpru usen. Nnyin imetim iyom Enye kpukpru ini, ekpedi ke eti ini mme ke okposong ini. Nnyin kpukpru ini inyene nditi enwongo Esie: ”Ami ndiyakke fi nduok, ndinyung nkpongke fi.”10
Ye ofuri odudu eke ukpong mi, Ami nting iko ntiense nte ke Abasi ododu uwem onyung amama nnyin, nte ke Ikpong – ikpong Eyen Esie ama odu-uwem onyung akakpa ono nnyin, ndien nte ke gospel eke Jesus Christ edi nkukure usung nsongo ye idorenyin eke edinwamde nnyin man iyo ata mkposong ini ke uwem nnyin. Yak emi edidi ntre, Ami mbenge ke edisana enying Jesus Christ, amen.
© 2013 otode Intellectual Reserve, Inc. Ema enim kpukpru unen. Ekeming ke USA. Enyimme eming ke Iko Mbakara: 6/13. Enyimme Ndikabare: 6/13. Translation of First Presidency Message, November 2013. Efik. 10670 553