Mensahe sa Visiting Teaching, Nobyembre 2013
Kari, Magbuylog sa Amon
Wala’y sapayan sang inyo mga sirkumstansya, inyo personal nga kasaysayan, ukon kabakod sang inyo panaksihon, may lugar para sa inyo sa sining Simbahan.
Sang una may yara sing isa ka tawo nga nagdamgo nga yara sia sa isa ka dako nga bulwagan sa diin ang tanan nga relihiyon sang kalibutan nagtililipon. Iya natukiban nga ang kada relihiyon may yara sing madamo sa ila ginahikot nga daw tuman kahalandumon kag kadalayawon.
Nakilala niya ang mag-asawa nga representante sang Ang Simbahan ni Jesucristo sang mga Santos sa Ulihing mga Adlaw kag nagpamangkot, “Ano ang inyo ginapangayo sa inyo mga miyembro?”
“Kami wala sang may ginapangayo nga bisan ano,” sabat nila. “Apang ang Ginuo nagapangabay nga ihalad ang tanan.”
Ang duha nagpadayon sa pagpaathag parte sa mga calling, home teaching kag visiting teaching, full-time mission, semanal nga family home evening, buluhaton sa templo, welfare kag pag-alagad sa mga tawo, kag mga takay sa pagtudlo.
“Ginabayaran bala ninyo ang inyo mga miyembro sa tanan nga ulobrahon nga ila ginahimo?” ang tawo namangkot.
“Ay, wala a,” paathag sang duha. “Ginatanyag nila sing libre ang ila panahon.”
“Subong man,” ang duha nagpadayon, “kada anum ka bulan ang mga miyembro sang amon Simbahan nagahinguyang sing panahon Sabado kag Domingo sa pagtambong ukon pagtan-aw sang 10 ka oras sang pangkabilugan nga komperensya.”
“Napulo ka oras nga nagapamulongpulong?” ang tawo daw indi makapati.
“Paano ‘ya ang inyo semanal nga mga miting sa simbahan?” Ano kalawig?”
“Tatlo ka oras kada Domingo!”
“Ay, naku,” siling sang tawo. “Ginahimo gid bala sang mga miyembro sang inyo simbahan ang imo mga ginapanghambal?”
“Ina kag madamo pa. Wala pa gani kami nakamitlang sang family history, mga youth camp, mga devotional, pagtuon sa balaan nga mga kasulatan, mga training sa liderato, mga kahiwatan sang bataon nga mga babayi kag mga pamatan-on, kaagahon nga mga klase sa seminary, pagmentenar sang mga bilding sang Simbahan, kag siyempre yara ang layi sang Ginuo parte sa ikaayong-lawas, ang bulanan nga pagpuasa agud mabuligan ang mga imol, kag ika-pulo.
Ang tawo nagsiling, “Naglibog na ang akon ulo. Ngaa man may mabuylog sa amo nga simbahan?”
Ang mag-asawa nagyuhum kag nagsiling, “Abi namon indi mo na ina ipamangkot.”
Ngaa Man May Mabuylog sa Amo nga Simbahan?
Sang tion nga ang madamo nga mga simbahan sa bug-os nga kalibutan nagaeksperiyensia sang talalupangdon nga pagdiutay sang ila mga miyembro, Ang Simbahan ni Jesucristo sang mga Santos sa Ulihing mga Adlaw—bisan gamay kon ikomparar sa madamo nga iban pa— amo ang isa sang pinakadasig magtubo sa kadamuon sang mga miyembro sa kalibutan. Sang Septyembre 2013 Ang Simbahan ni Jesucristo sang mga Santos sa Ulihing mga Adlaw may sobra sa 15 ka milyon nga miyembro sa bug-os nga kalibutan.
May madamo sang rason sa sini, apang mahimo bala ako maghatag sang pila lang?
Ang Simbahan sang Manluluwas
Una, ini nga Simbahan ginpanumbalik sa aton nga panahon ni Jesucristo Mismo. Diri, inyo masalapoan ang awtoridad agud magbuhat paagi sa Iya ngalan —sa pagbunyag para sa kapatawaran sang mga sala, sa paghatag sang Balaan nga Espiritu, kag para sa paghugpong sa duta kag sa langit.1
Yadtong nagabuylog sa sini nga Simbahan nagapalangga sa Manluluwas nga si Jesucristo kag nagahandum sa pagsunod sa Iya. Nagakalipay sila sa ihibalo nga ang Dios nagapakighambal liwat sa katawhan. Kon magbaton sila sang sagrado nga ordinansa sang priesthood kag maghimo sang kasugtanan sa Dios, ila mabatyagan ang Iya gahum sa ila mga kabuhi.2 Kon magsulod sila sa balaan nga templo, ila mabatyagan nga yara sila sa Iya presensya. Kon magbasa sila sang balaan nga mga kasulatan 3 kag ipangabuhi ang mga pinanudlo sang Iya mga propeta, magatubo sila nga mas malapit sa Manluluwas nga ila gid ginapalangga.
Isa ka Aktibo nga Pagtuo
Isa pa ka rason amo nga tungod ang Simbahan nagahatag sing mga oportunidad sa paghimo sing maayo.
Ang pagpati sa Dios dalayawon, apang kalabanan sang mga tawo luyag maghimo sing mas sobra pa sangsa magpamati sa mga sermon nga nagahatag-inspirasyon ukon maghandum sang ila mansyon sa langit.4 Luyag nila ipangabuhi ang ila pagtuo. Luyag nila mag-obra kag mag-entra sa sini nga dako nga kawsa.
Kag amo sina ang nagakatabo kon magbuylog sila sa amon—may madamo sila nga oportunidad nga bayluhon ila mga talento, kaayo, kag panahon sa maayo nga mga buluhaton. Tungod nga wala kami sing ginabayaran nga mga alagad sang simbahan sa amon mga kongregasyon sa bug-os nga kalibutan, ang amon mga miyembro mismo ang nagahikot sang mga pag-alagad. Ginatawag sila paagi sa inspirasyon. Kon kaisa nagaboluntar kami; kon kaisa kami ang ginaboluntar sang iban sa buluhaton. Ginatan-aw namon ang mga takay indi bilang mga pabug-at kundi mga oportunidad agud matuman ang amon mga kasugtanan nga malipayon namon nga ginhimo agud alagaran ang Dios kag ang Iya mga kabataan.
Ginapakamahal nga mga Bugay
Ang ikatlo nga rason kon ngaa ang mga tawo nagabuylog sa Simbahan amo nga ang pagkabuhi kasubong kay Cristo nagadala sang malahalon nga mga bugay.
Ginatan-aw namon ang bunyag nga amo ang panugod sa pagpangabuhi sang bilang sumulunod ni Jesucristo. Ang amon adlaw-adlaw nga pagsunod kay Jesucristo nagadala sang kapawa kag katuyuan sa sini nga kabuhi kag himpit nga kalipay kag wala’y katapusan nga kaluwasan sa madason nga kabuhi.
Sila nga matutom nga nagasunod sini nga alagyan nagalikaw sa madamo nga mga peligro, mga kasubo, kag mga pagbasol sa kabuhi.
Ang kubos sa espiritu kag tampad sing tagipusuon makasalapo sang dalayawon nga mga manggad sang kaalam diri.
Sila nga nagaantos ukon nagakalisud makasalapo sing kasulhayan diri.
Sila nga ginabug-atan sang sala makaagom sang kapatawaran, kahilwayan, kag kapahuwayan.
Sa Ila nga Nagbiya
Ang pagpangita sang kamatuoran nagdala sang minilyon ka mga tawo sa Ang Simbahan ni Jesucristo sang mga Santos sa Ulihing mga Adlaw. Ugaling, may mga tawo nga nagbiya sa Simbahan nga sadto ila ginpalangga.
Ang isa ka tawo mahimo magpamangkot, “Kon ang ebanghelyo manami kaayo, ngaa nga ang isa katawo magbiya?
Kon kaisa ginahaum-haum naton nga nasaklaw sila ukon tamaran ukon makasasala. Sa realidad, indi na amo sina kasimple. Sa pagkamatuod, indi lang isa ka rason ang makabig nga husto sa madamo nga mga sitwasyon.
Pila sang aton mga pinalangga nga mga miyembro tinuig nga nabudlayan sa pamangkot kon bala iseparar nila ang ila kaugalingon sa Simbahan.
Sa sini nga Simbahan nga ginatahod sing lubos ang pagbuot, nga ginpanumbalik sang pamatan-on nga nagpamangkot kag nagpangita sang mga sabat, ginatahod naton sila nga tampad nga nagapangita sang kamatuoran. Mahimo nga magkasubo kita kon ang ila pagpanglakaton nagapalayo sa ila sa Simbahan nga aton ginapalangga kag sa kamatuoran nga aton nasalapoan, apang aton ginatahod ang ila kinamatarong sa pagsimba sa Dios nga Makaako suno sa dikta sang ila kaugalingon nga konsiyensya, subong nga ginaangkon man naton inang prebilihiyo para sa aton kaugalingon.5
Wala Masabat nga mga Pamangkot
Pila ka tawo ang nagapangabudlay sa wala masabat nga mga pamangkot parte sa mga butang nga nahimo ukon nahambal sang nagliligad. Hayag namon nga ginakilala nga sa malapit 200 ka tuig sa kasaysayan sang Simbahan— upod sang wala untat nga madamo nga inspirado, dalayawon kag diosnon nga mga hitabo— may pila ka mga butang nga nahambal kag nabuhat nga amo ang mahimo nga rason nga magpamangkot ang mga tawo.
Kon kaisa ang mga pamangkot nagatuhaw tungod kay wala sa aton ang tanan nga impormasyon kag nagakinahanglan lang naton sang diutay pa gid nga pasensya. Kon ang kabug-osan sang kamatuoran sa ulihi mahibaloan, ang mga butang nga indi naton mahangpan sang una masolbar para sa aton kalipayan.
Kon kaisa may yara sing pagkinalain sang opinyon sa kon ano gid ang buot silingon sang mga “nagkalatabo”. Ang pamangkot nga nagahatag sing pagpangduhaduha sa iban nga tawo, pagkatapos sang maid-id nga pagpangusisa, sarang magpasad sang pagtuo sa iban.
Mga Sayop sang Di-perpekto nga mga Tawo
Kag, sa prangka lang, may mga tinion nga ang mga miyembro ukon mga lider sa Simbahan nakahimo gid man sang mga sayop. Mahimo nga may yara gid man sing mga butang nga nahambal ukon nabuhat nga wala nagasanto sa aton mga sulundan, mga prinsipyo, ukon doktrina.
Nagapati ako nga ang Simbahan mangin perpekto lamang kon ini ginapalakat sang perpekto nga mga tawo. Ang Dios perpekto, kag ang Iya doktrina puraw. Apang nagahikot Sia paagi sa aton— ang Iya di-perpekto nga mga anak— kag ang di-perpekto nga mga tawo nagahimo sing mga sayop.
Sa tig-ulo nga pahina sang Libro ni Mormon aton mabasa, “Kag karon, kon may kasaypanan ini mga sayop sang tawo; gani indi pagpakalaina ang mga butang nga iya sang Dios, agud kamo makita nga wala’y musing sa hukom-lingkuranan ni Cristo.”6
Amo sini ang pirme nagakatabo kag mangin amo sa gihapon tubtob sa perpekto nga adlaw nga si Cristo na mismo ang personal nga magahari sa duta.
Masubo nga ang pila nagluya tungod sang mga sayop nga ginhimo sang tawo. Apang wala’y sapayan sini, ang wala’y katapusan nga kamatuoran sang ginpanumbalik nga ebanghelyo nga masalapoan sa Ang Simbahan ni Jesucristo sang mga Santos sa Ulihing mga Adlaw wala nadagtaan, nagluya, ukon nagguba.
Bilang Apostoles sang Ginuong Jesucristo kag bilang isa nga nakasaksi sing aktwal sang mga konseho kag mga pagpalakat sining Simbahan, ginapabutyag ko ang akon sagrado nga panaksihon nga ang tanan nga importante nga desisyon nga nagaapekto sining Simbahan ukon sang mga miyembro sini ginahimo nga ginapangayo sing maukod ang inspirasyon, paggiya, kag pahanugot sang aton Wala’y Katapusan nga Amay. Ini ang Simbahan ni Jesucristo. Ang Dios indi magtugot sang Iya nga Simbahan nga maglisa gikan sa iya gintangdo nga dalan ukon mapaslawan sa pagtuman sang iya sini diosnon nga kadangatan.
May Lugar para sa Inyo
Sa mga nagseparar sang ila kaugalingon sa Simbahan, akon ginahambal, pinalangga ko nga mga kaabyanan, may yara pa sang lugar para sa inyo diri.
Magkari kag idugang ang inyo mga talento, kinaadman, kag mga kusog sa amon. Ang resulta amo nga mangin mas magmaayo kita tanan.
Ang pila mahimo magpamangkot, “Apang paano ang akon nga mga pagpangduhaduha?”
Natural lang nga may yara sing mga pamangkot—ang gamay nga pamangkot sa masami nagatubo sa isa ka dako nga ihibalo. Diutay lang ang mga miyembro sang Simbahan nga, wala gid naghimud-os sa seryoso ukon sensitibo nga mga pamangkot. Isa sang mga katuyuan sang Simbahan amo ang pagbatiti kag pagsagod sang pagtuo—bisan pa sa kon kaisa balason nga duta sang mga pagpangduhaduha kag wala’y kasigurohan. Ang pagtuo amo ang pagpati sa mga butang nga indi makita apang matuod.7
Gani, mahal ko nga mga kauturan— pinalangga ko nga mga kaabyanan— palihog, unaha nga magduhaduha sang inyo pagpangduhaduha antes kamo magduhaduha sa inyo pagtuo.8 Indi gid naton tugutan ang aton mga pagpangduhaduha nga magpriso sa aton kag magapalayo sa aton sa diosnon nga paghigugma, kag sa mga kinaadman nga nagaabot paagi sa pagtuo kay Ginuong Jesucristo.
Ang pila mahimo magsiling nga,“Indi lang gid ko ‘ya bagay sa mga tawo dira sa Simbahan”
Kon makita ninyo ang inyo mga tagipusuon, siguro masalapoan nga nagakabagay kamo sing mas santu sangsa inyo ginapatihan. Mahimo nga masorpresa kamo kon mahibaloan ninyo nga may mga handum kag mga pagpaninguha kag mga ginalauman man kami nga kapareho sang inyo. Ang inyo kinadak-an ukon ang pagpadako sa inyo ayhan mahimo nga lain sangsa inyo nakita sa madamo nga mga Santos sa Ulihing mga Adlaw, apang ina mahimo nga isa ka bugay. Mga kauturan, pinalangga nga kaabyanan, ginakinahanglan namon ang inyo pinasahi nga mga talento kag mga panan-aw. Ang pagkinatuhay sang mga indibidwal kag mga katawhan sa bug-os nga kalibutan amo ang kusog sini nga Simbahan.
Ang iban makasiling, “Matyag ko daw indi ko malab-ot ang inyo mga sulundan.”
Rason pa gani nga magbuylog! Ang Simbahan gindisenyo sa pagbatiti sa mga di-perpekto, sa nagapaninguha, kag sa ginakapoy. Puno ini sing mga tawo nga nagahandum sing hugot sa ila tagipusuon nga magtuman sang mga kasuguan, bisan wala pa nila makabisado.
Ang pila mahimo magsiling, “May kilala ako sa inyo Simbahan nga isa ka hipokrito. Indi gid ako magbuylog sa isa ka Simbahan nga may pareho sa iya nga klase sang miyembro.”
Kon ang inyo kahulugan sang hipokrito isa nga napaslawan sa pagkabuhi sing perpekto sa iya ginapatihan, kon amo tanan kita mga hipokrito. Wala ni isa sa aton ang pareho gid ka-Cristohanon suno sa aton nga nahibaloan nga nagakadapat. Apang sinsero kita nga nagahandum nga madaug ang aton mga kasaypanan kag mga huyog sa pagpakasala. Sa bug-os naton nga tagipusuon kag kalag nagahandum kita nga mangin mas maayo sa bulig sang Pagpasag-uli ukon Atonement ni Jesucristo.
Kon amo sini ang inyo mga handum, wala’y sapayan sang inyo mga sirkumstansya, inyo personal nga kasaysayan, ukon kabakod sang inyo panaksihon, may lugar para sa inyo sa sining Simbahan. Kari, magbuylog sa amon!
Kari, Magbuylog sa Amon!
Bisan pa sa aton mga kakulangan, nakasiguro ako nga inyo masalapoan sa tunga sang mga miyembro sining Simbahan ang madamo sang pinakamaayo nga mga kalag nga nagakabuhi sa sining kalibutan. Ang Simbahan ni Jesucristo dawsa lapiton sang mga mabuot kag mga mabinuligon, mga tampad kag mga mapisan.
Kon ginapaabot ninyo nga makasalapo sang perpekto nga tawo diri, mapaslawan kamo. Apang kon inyo pangitaon ang puraw nga doktrina ni Cristo, ang pulong sang Dios “nga nagapang-ayo sang buong nga kalag,”9 kag ang nagatinlo nga impluwensya sang Balaan nga Espiritu, pwes sa diri masalapoan ninyo ang mga ina. Sa sining panahon sang nagatahaw nga pagtuo— sa sini nga panahon kon san-o madamo kaayo ang nagabatyag nga malayo ang gugma sang Dios—diri inyo masalapoan ang isa ka katawhan nga nagahandum nga makilala kag magpalapit pa gid sa ila Manluluwas paagi sa pag-alagad sa Dios kag sa mga isigkatawo, pareho sa inyo. Kari, magbuylog sa amon!
Buot Man Bala Kamo Maghalin?
Madumduman ko ang isa ka tion sa kabuhi sang Manluluwas sang madamo ang nagbiya sa Iya.10 Si Jesus nagpamangkot sa iya napulo’g duha ka disipulo:
“Buot man bala kamo maghalin?
“Nian si Simon Pedro nagsabat sa iya, Ginuo kay sin-o bala kami makadto? ikaw may mga pulong sang kabuhi nga wala’y katapusan.”11
May mga panahon nga kinahanglan naton sabton ang amo man nga pamangkot. Buot man bala kita maghalin? Ukon kita bala, kasubong ni Pedro, magkapyot sing malig-on sa mga pulong sang kabuhi nga wala’y katapusan?
Kon nagapangita kamo sing kamatuoran, kahulugan, kag pamaagi sa pagbaylo sang pagtuo sa pagbuhat; kon nagapangita kamo sing lugar nga mahamut-an: Kari, magbuylog sa amon!
Kon inyo ginbayaan ang pagtuluohan nga anay inyo ginapakamahal: Magbalik liwat. Magbuylog sa amon!
Kon ginasulay kamo nga mangindi na: Maghulat sing diutay pa nga panahon. May lugar diri para sa inyo.
Nagapangabay ako sa tanan nga nagapamati kag nagabasa sining mga pulong: Kari, magbuylog sa amon. Kari magpamati sang panawagan sang malulo nga Cristo. Pas-ana ang inyo krus kag magsunod sa Iya.12
Kari, magbuylog sa amon! Kay sa diri inyo masalapoan ang malahalon nga butang nga indi mabakal.
Nagasaksi ako nga sa diri inyo masalapoan ang mga pulong sang kabuhi nga wala’y katapusan, ang promisa sang sagrado nga pagtubos, kag ang alagyan padulong sa kalinong kag kalipay.
Akon ginapangamuyo nga ang inyo pagpangita sang kamatuoran magatudok sa inyo tagipusuon sang handum nga magkari kag magbuylog sa amon. Sa sagrado nga ngalan ni Jesucristo, amen.
© 2013 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/13. Petsa sang pagtugot sa paglubad: 6/13. Paglubad sang Visiting Teaching Message, November 2013. Hiligaynon. 10671 861