Mensahe iti Visiting Teaching, Nobiembre 2013
Umaykayo Makikadua Kadakami
Ania man dagiti kasasaadyo, bukodyo a pakasaritaan ti biagyo, wenno pigsa ti pammaneknekyo, adda lugar para kadakayo iti daytoy a Simbaan.
Naminsan adda maysa a lalaki a nagtagtagainep nga adda isuna iti maysa a dakkel a pasdek a nagguummongan ti amin a relihion ti lubong. Naammuanna nga adu a banag iti tunggal relihion ti kasla makaay-ayo ken napateg.
Naam-ammona ti nasingpet nga agassawa a mangibagi iti Ti Simbaan ni Jesucristo dagiti Santo iti Ud-udina nga Aldaw ket sinaludsodna, “Ania ti ipapaaramidyo kadagiti miembroyo?”
“Awan tiipapaaramidmi kadagiti miembromi,” insungbatda. “Ngem idawat ti Apo nga idatonmi ti amin.”
Inlawlawag dagiti agassawa maipapan kadagiti pagrebbengan iti Simbaan, ti home teaching ken visiting teaching, dagiti full-time a mision, dagiti linawas a family home evening, aramiden iti templo, welfare ken humanitarian service, ken panangisuro iti klase.
“Baybayadanyo kadi dagiti taoyo iti amin a trabaho nga ar-aramidenda?” sinaludsod ti lalaki.
“Ah, saan,” inlawlawag dagiti agassawa. “Itedda ti panawenda nga awanan bayad.”
“Kasta met nga,” intuloy dagiti agassawa, “tunggal innem a bulan dumardar-ay wenno agbuybuya dagiti miembro ti Simbaanmi iti sapasap a kumperensia iti 10 nga oras.”
“Sangapulo nga oras a mangted kadagiti mensahe?” nagsiddaaw ti lalaki.
“Komusta met dagiti linawas a serbisio iti simbaanyo? Kasano ti kaatiddog dagitoy?”
“Tallo nga oras, tunggal Domingo!”
“Talaga,” kinuna ti lalaki. “Talaga kadi nga ar-aramiden dagiti miembro ti simbaanyo ti amin a kinunayo?”
“Wen ken saan la a dayta. Saanmi pay a nadakamat maipapan ti family history, youth camp, debosional, panagadal iti nasantuan a kasuratan, panagsanay iti panangidaulo, dagiti aktibidad dagiti agtutubo, nasapa a klase iti seminary, panangpatalinaed kadagiti pasdek ti Simbaan, ken siempre adda linteg ti Apo iti salun-at, ti binulan a panagayuno a pangtulong kadagiti napaglaw, ken ti apagkapullo.”
Kinuna ti lalaki, “Ita matiktikawak. Apay a kayat ti asino man ti agpamiembro iti kasta a simbaan?”
Immisem dagiti agassawa ket kinunada, “Impagarupmi a dika agsaludsod.”
Apay a Kayat ti Asino man ti Agpamiembro iti Kasta a Simbaan?”
Iti panawen a bumasbassit ti bilang ti adu a simbaan iti intero a lubong, Ti Simbaan ni Jesucristo dagiti Santo iti Ud-udina nga Aldaw—nupay bassit laeng no ikumpara daytoy kadagiti dadduma pay a simbaan—ket maysa kadagiti kapartakan a dumakdakkel a simbaan iti lubong. Manipud pay idi Septiembre 2013 addaanen ti Simbaan iti nasurok a 15 milion a miembro iti sangalubongan.
Adu dagiti gapu no apay, di la mabalin a mangtedak iti sumagmamano?
Ti Simbaan ti Mangisalakan
Umuna, insubli Mismo ni Jesucristo daytoy a Simbaan iti panawentayo. Makitayonto ditoy ti awtoridad nga agtignay iti naganna—tapno mangbuniag para iti pannakaugas dagiti basbasol, tapno mangipaay ti sagut ti Espiritu Santo, ken tapno mangilantip iti daga ken iti langit.1
Dagiti agkameng iti daytoy a Simbaan ket mangipatpateg iti Mangisalakan a Jesucristo ket tarigagayda ti mangsurot Kenkuana. Naragsakda a nakaammo a makisasao manen ti Dios iti sangkataw-an. No umawaw-awatda kadagiti sagrado nga ordinansa iti priesthood ken makitultulagda iti Dios, mariknada ti bilegna iti biagda.2 No sumrekda iti nasantuan a templo, mariknada nga addada iti sibayna. No agbasbasada kadagiti nasantuan a kasuratan3 ken agbibiagda kadagiti pannursuro dagiti propetana, ad-adda a mayasidegda iti Mangisalakan nga ipatpategda unay.
Agbiag iti Pammati
Sabali pay a gapu ket mangmangted ti Simbaan kadagiti gundaway iti panagaramid iti naimbag.
Ti panamati iti Dios ket madaydayaw, ngem saan laeng nga aggusto dagiti tao a dumngeg kadagiti makaparegta a mensahe wenno mangarapaap kadagiti parabur a sumangbay.4 Kayatda ti agbiag iti pammatida. Kayatda nga isagana ti bagida ket makipaset iti daytoy naindaklan nga aramid.
Ket dayta ti mapasamak no kumappengda kadakami—addaanda iti adu a gundaway a mangusar kadagiti talentoda, pannakipagrikna, ken panawen kadagiti nasasayaat nga aramid. Gapu ta awan dagiti mabayadan wenno matangdanan a pangulo kadagiti kongregasion iti sapasap a lubong, dagiti mismo a miembro ti simbaantayo ti agserserbi para iti aramid. Maawaganda babaen ti inspirasion a naggapu iti langit. No dadduma agboluntariotayo; no dadduma datayo ti “iboluntario.” Ditayo ibilbilang a dagensen dagiti maipapaaramid kadatayo do di ketdi gundaway a mangipatungpal kadagiti katulagan a siraragsak nga aramidentayo tapno makapagserbi iti Dios ken kadagiti annakna.
Dagiti Napapateg a Parabur
Maikatlo a gapu no apay a kumappeng dagiti tao iti Simbaan ket gapu ta adda dagiti napapateg a parabur ti panagbalin a disipulo.
Ibilangtayo ti panagbuniag a pangrugian ti panagbalin a disipulo. Ti inaldaw a pannagnatayo a kaduatayo ni Jesucristo ket mangiturong iti talna ken panggep itoy a biag ken nalaus a rag-o ken agnanayon a pannakaisalakan iti umay a lubong.
Dagiti napudno a sumurot iti daytoy a dalan ket mailiklikda iti adu a panagbiddut, panagladingit, ken pagbabawyan iti biag.
Dagiti napakumbaba iti espiritu ken napudno iti puso ket makasarakda kadagiti dadakkel a kinabaknang ti pannakaammo ditoy.
Dagiti agsagsagaba wenno agladladingit ket makasarakda iti pannakaliwliwa ditoy.
Dagiti madagdagsenan iti basol ket makasarakda iti pannakapakawan, wayawaya, ken inana.
Kadagiti Pumanaw
Ti panagsapsapul iti kinapudno ket nangidateng iti minilmilion a tattao iti Ti Simbaan ni Jesucristo dagiti Santo iti Ud-udina nga Aldaw. Nupay kasta, adda dagiti pumanaw iti Simbaan a sigud nga impategda.
Mabalin nga adda agsaludsod, “No napintas ti ebanghelio, apay nga adda pumanaw?”
No dadduma ipapantayo a gapu ta adda nakapaguraanda wenno nasadutda wenno managbasolda. Kinapudnona, saan a kasta ti kasimplena. Kinapudnona, saan a maymaysa ti gapu iti agduduma a kasasaad.
Adda dagiti ay-yatentayo a miembro ti nabayagen nga agpampanunot no rumbeng nga umadayoda iti Simbaan wenno saan.
Itoy a Simbaan a mangbigbig unay iti bukod a kinawaya nga agpili, nga insubli ti agtutubo a lalaki a nagdamag kadagiti saludsod ken nagkiddaw kadagiti sungbat, dayawenmi dagiti sipupudno nga agsapsapul iti kinapudno. Nasakit ti nakemmi no pumanawda manipud iti Simbaan nga ipatpategmi ken iti kinapudno a nasarakanmi, ngem dayawenmi ti karbenganda nga agrukbab iti Mannakabalin a Dios a segun iti diktar ti konsensiada, a kas met laeng iti panangbigbigmi iti gundawaymi.5
Dagiti Saan a Nasungbatan a Saludsod.
Adda dagiti marigatan kadagiti saan a nasungbatan a saludsod maipapan kadagiti banag a napasamak wenno naisao iti napalabas. Sibabatad nga aw-awatentayo nga iti dumani 200 a tawen ti pakasaritaan ti Simbaan—kageddan dagiti agtultuloy a napipintas, madaydayaw, ken nadiosan a paspasamak—adda dagiti banag a naisao ken naaramid a a nagsaludsodan dagiti tao.
No dadduma adda dagiti saludsodtayo gapu laeng ta kurangtayo iti impormasion ket kasapulantayo laeng ti aganus pay bassit. No naipakaammon ti naan-anay a kinapudno iti kamaudianan, dagiti banag a ditayo maawatan idi ket maipaawatto kadatayo.
No dadduma sabasabali ti opinion iti talaga a kaipapanan ti “kinapudno.” Ti saludsod a mangparnuay iti panagduadua dagiti dadduma, kalpasan ti naannad a panagpulutpot, ket mabalin a mangpatibker iti pammati dagiti dadduma.
Dagiti Biddut dagiti Saan a Perpekto a Tao
Ket isaok a sipaprangka daytoy, adda dagiti panawen a makaaramid kadagiti biddut dagiti miembro wenno lider iti Simbaan. Mabalin nga adda dagiti banag a naisao wenno naaramid a saan a maitunos kadagiti kababalin, pagbatayan, wenno doktrinatayo.
Panagkunak perpekto laeng ti Simbaan no imatonan daytoy dagiti perpekto a tattao. Perpekto ti Dios, ken natarnaw ti doktrinana. Ngem agtrabaho Isuna babaen kadatayo—a saan a perpekto nga annakna—ket agaramid iti biddut dagiti saan a perpekto a tao.
Iti panid ti paulo ti Libro ni Mormon mabasatayo, “Ket ita, no adda riro, nagkurangan dagiti tao; gapuna, saanyo nga uyawen dagiti banag ti Dios, tapno masarakankayonto nga awan mulitna iti pangukoman ni Cristo.”6
Kastoy a kanayon ti mapaspasamak manipud pay idi ket agtultuloyto daytoy agingga a dumteng ti naan-anay a panawen no agturay Mismo ni Cristo iti rabaw ti daga.
Sayang ta adda dagiti naitublaken gapu kadagiti biddut nga inaramid dagiti tao. Ngem iti baet daytoy, ti agnanayon a kinapudno ti naisubli nga ebanghelio a masarakan iti Ti Simbaan ni Jesucristo dagiti Santo iti Ud-udina nga Aldaw ket saan a mamulitan, mapakapsut, wenno madadael.
Kas maysa nga Apostol ni Apo Jesucristo ken kas maysa a nakasaksi mismo kadagiti konseho ken maar-aramid iti daytoy a Simbaan, iburayko ti napudno a pammaneknekko nga awan ti napateg a pangngeddeng a makaapekto iti Simbaan wenno kadagiti miembrona ti naaramid a saan a sipapasnek a naidawatan iti inspirasion, pannarabay, ken pananganamong ti Agnanayon nga Amatayo. Daytoy ti Simbaan ni Jesucristo. Saanto nga ipalubos ti Dios a sumiasi ti Simbaanna manipud iti naituding a turognenna wenno mapaay a mangipatungpal iti nadiosan a pagtungpalanna.
Adda Lugar Para Kadakayo
Kadagiti nangyadayon iti bagida manipud iti Simbaan, kayatko nga ibaga, ay-ayatek a gagayyemko, nga adda pay laeng lugar ditoy para kadakayo.
Umaykayo ket ibinglayyo dagiti talento, sagut, ken kabaelanyo kadakami. Sumingsingpettayo amin gapu iti daytoy.
Mabalin nga adda agsaludsod , “Kasano ngaruden dagiti duaduak?”
Gagangay laeng ti agdamag kadagiti saludsod,—ti bin-i ti napudno a panagsaludsod ket masansan nga agsulbod ken dumakdakkel a maitulad iti dakkel a kayo ti pannakaawat. Adda dagiti sumagmamano a miembro ti Simbaan nga, iti ania man a gundaway, ket saanda a naaddaan kadagiti napasnek wenno sensitibo a saludsod. Maysa kadagiti panggep ti Simbaan ti mangaywan ken mangtaripato iti bukel ti pammati—uray pay no adda man daytoy iti nadarat a daga ti panagduadua ken awan kinaawan namnama. Ti pammati ket panangnamnama kadagiti banag a saan a makita ngem pudno.7
Ngarud, ay-ayatek a kakabsatko —ay-ayatek a gagayyemko—pangngaasiyo, unaenyo a pagduaduaan dagiti duaduayo sakbay a pagduaduaanyo ti pammatiyo.8 Ditay koma ipalubos a ti panagduadua ti manglapped kadatayo ken mangyadayo kadatayo manipud iti nadiosan nga ayat, talna, sagsagut a sumangbay babaen ti pammati ken ni Apo Jesucristo.
Mabalin nga adda dagiti agkuna, “Saanak a maibagay kadagiti tao iti Simbaanyo.”
No makitayo koma kadagiti puspusomi, nalabit a makitayonto nga ad-adda pay a maibagaykayo ngem iti panangipagarupyo. Mabalin a masdaawkayo a makakita nga adda dagiti paggagaran ken pagrigatan ken namnamaenmi a maipada kadakayo. Ti nagtaudan wenno nakapadaklanyo ket nalabit a maigiddiat iti makitkitayo kadagiti adu a Santo iti Ud-udina nga Aldaw, ngem mabalin a maysa a parabur dayta. Kakabsat, ay-ayatek a gagayyem, kasapulanmi dagiti naidumduma a talento ken panniriganyo. Ti pagdudumaan dagiti tao ken tattao iti amin a suli ti lubong ket maysa a pigsa daytoy a Simbaan.
Mabalin nga adda agkuna, “Panagkunak diak makapagtungpal kadagiti pagrukodanyo.”
Ad-adda koma a nasken a sumurotkayo kadakami no kasta! Panggep ti Simbaan ti mangtaraon kadagiti addaan pagkurangan, ti marigrigatan, ken nabannog. Napno daytoy kadagiti tao ngaagtarigagay iti amin a pusoda nga agtungpal kadagiti bilin, uray no kurang pay ti kabaelanda nga agtungpal kadagitoy.
Mabalin nga adda agkuna, “Adda am-ammok a miembro ti Simbaanyo a maysa a hipokrito. Diak pulos makikappeng iti maysa a simbaan nga adda maysa a miembro a kas kenkuana.”
No ti kaipapanan kadakayo ti hipokrito ket maysa a tao a saan a naan-anay nga agbibiag wenno agtungtungpal iti no ania ti patienna, no kasta hipokritokami amin. Awan uray maysa kadakami ti naan-anay a kas ken ni Cristo nga ammomi a nasken a kasta koma ti pagbalinanmi. Ngem sipapasnek a tartarigagayanmi ti mangatur kadagiti biddutmi ken saankami nga agbasol. Iti puso ken kararuami tarigagayanmi ti agbalin a nasaysayaat babaen ti tulong ti Pannubbot ni Jesucristo.
No dagitoy dagiti tartarigagayanyo, no kasta ania man dagiti kasasaadyo, bukodyo a pakasaritaan ti biagyo, wenno pigsa ti pammaneknekyo, adda lugar para kadakayo iti daytoy a Simbaan. Umaykayo makikadua kadakami!
Umaykayo Makikadua Kadakami!
Iti laksid dagiti pagkuranganmi kas tao, mamatiak a makitayonto kadagiti miembro daytoy a Simbaan ti adu kadagiti kasisingpetan a kararua ditoy a lubong. Ti Simbaan ni Jesucristo ket mangal-allukoy kadagiti nasisingpet, ti manangipateg, ti napudno ken ti nagaget.
No namnamaenyo a makasarakkayo kadagiti perpekto a tao ditoy, mapaaykayonto. Ngem no sapulenyo ti natarnaw a doktrina ni Cristo, ti balikas ti Dios “a mangpaimbag iti nasugat a kararua,”9 ken ti pangpasanto nga impluensia ti Espiritu Santo, ditoy ti pakasarakanyo. Iti daytoy a panawen ti panagkapsut ti pammati—iti daytoy a panawen nga adun dagiti makarikna nga adayodan iti Dios—makitayonto ditoy dagiti tao nga agtartarigagay a mangammo ken umasideg iti Mangisalakanda babaen ti panagserbi iti Dios ken kadagiti padada a tattao, kas met la kadakayo. Umaykayo makikadua kadakami!
Pumanawkayto Kadi Met?
Naipalagip kaniak ti maysa a panawen iti biag ti Mangisalakan idi adu ti nangpanaw Kenkuana.10 Sinaludsod ni Jesus kadagiti sangapulo-ket-dua a disipulona:
“Pumanawkayto kadi met?
“Kalpasanna insungbat ni Simon Pedro kenkuana, Apo, papananmo ngarud? addaanka kadagiti balikas ti agnanayon a biag.”11
Adda dagiti gundaway a nasken a sungbatantayo ti kasta met la a saludsod Pumanawkayto kadi met? Wenno, datayo kadi, kas ken Pedro, ket nairut a kumpet kadagiti balikas ti agnanayon a biag?
No agsapsapulkayo iti kinapudno, kaipapanan, ken wagas a pakatignayan ti pammatiyo; no agsapsapulkayo iti maysa a lugar a pagyanan: Umaykayo makikadua kadakami!
No tinallikudanyon ti relihion a sigud idi nga inawatyo: Agsublikayo manen. Umaykayo makikadua kadakami!
No masulsulisogkayo nga agsanud: Agtalinaedkayo pay iti nabaybayag bassit. Adda lugar para kadakayo ditoy.
Ipakaasik iti amin a dumdumngeg wenno agbasbasa kadagitoy a balikas: Umaykayo makikadua kadakami. Umaykayo dumngeg iti awag ti managayat a Cristo. Bagkatenyo ti krusyo ket sumurotkayo Kenkuana.12
Umaykayo makikadua kadakami! Gapu ta ditoy ti pakasarakanyonto iti napateg a banag a saan a magatadan ti kuarta.
Paneknekak a ditoy ti pakasarakanyonto kadagiti balikas ti agnanayon a biag, ti kari ti naindaklan a pannakasubbot, ti dalan nga agturong iti talna ken ragsak.
Sipapasnek nga ikarkaragko a ti bukodyo a panagsapul iti kinapudno ket maimalditto iti pusoyo ti tarigagay nga umay ket makikaduakayo kadakami. Iti sagrado a nagan ni Jesucristo, amen.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannakaipatarus ti Visiting Teaching Message, November 2013. Ilokano. 10671 864