Mensahe ti Umuna a Panguluen, Nobiembre 2013
“Dikanto Panawan wenno Baybay-an”
Ti Nailangitan nga Amatayo … ammona nga agsursuro ken dumur-as ken pumigpigsatayo no maipasango ken malasattayo dagiti pannubok a nasken a pagdalanantayo.
Iti journalko ita a rabii, isuratko, “Daytoy ti maysa kadagiti makaparegta unay a sesion ti ania man a sapasap a komperensia a dinar-ayakon. Nakapimpintas ken naespirituan unay.”
Kakabsat, innem a bulan ti napalabasen idi nagkikitatayo iti sapasap a kumperensiatayo, nakaidda idi iti ospital ti nasingpet nga asawak, ni Frances, kalpasan ti nakaro a pannakatnagna sumagmamano nga aldaw kasakbayanna. Idi Mayo, kalpasan ti sumagmamano a lawas a situtured a panangikarigatanna tapno umimbag dagiti sugatna, pimmusay isuna. Nalaus ti pannakaulilak iti ipapanawna. Nagkallaysakami iti Salt Lake Temple idi Oktubre 7, 1948. Inton bigat koma ti maika-65 nga anibersario ti kallaysami. Isu ti ayat ken biagko, ti mapagtalkak, ken kasingedan a gayyemko. Saan nga umdas a sawek a nangulilaak kenkuana tapno ipeksak ti pudno a riknak.
Daytoy a komperensia ti maika-50 a tawen manipud idi inawagannak iti Korum dagiti Sangapulo-ket-Dua nga Apostol ni Presidente David O. McKay. Iti unos amin dagitoy a tawen awan sabali a naawatko no saan a ti naan-anay a suporta ti nasingpet a kaingungotko. Nakaad-adu dagiti sakripisio nga inaramidna tapno maipatungpalko ti pagrebbengak. Uray naminsan awan ti nangngegko a reklamo manipud kenkuana uray no masansan a naidawat kaniak a mangbubos iti sumagmamano nga aldaw ken no dadduma sumagmamano pay a lawas nga adayoak kenkuana ken kadagiti annakmi. Maysa isuna a pudno nga anghel.
Kayatko nga ipeksa ti panagyamanko, kasta met kadagiti kapamiliak, gapu iti napalaus a pannakaibukbok ti ayat a simmangbay kadakami manipud pay idi pimmusay ni Frances. Ginasgasut dagiti kard ken surat a naawatmi manipud iti amin a suli ti lubong a mangipekpeksa iti panagdayawda kenkuana ken pannakipagladingitda iti pamiliak. Nakaawatkami iti nakaad-adu a napipintas a sabsabong. Agyamankami kadagiti nakaad-adu a kontribusion a nairuknoy iti naganna iti General Missionary Fund ti Simbaan. Iti nagan kadakami a pinanawanna, idanonko ti nalaus a panagyamanko para iti naasian ken naimpusuan a panangipakitayo iti kinaimbag.
Kadakkelan a liwliwa kaniak iti daytoy naladingit a panawen ti panagsinami ket ti pammaneknekko maipapan iti ebanghelio ni Jesucristo ken ti pannakaammok a sibibiag pay laeng ti ay-ayatek a ni Frances. Ammok a saan nga agbayag ti panagsinami. Pinaglantipkami iti balay ti Dios ti maysa nga addaan iti awtoridad a mangilantip iti daga ken iti langit. Ammok nga agdennakaminto manen iti maysa nga aldaw ken dikaminton agsina pay. Daytoy ti pannakaammo a mangpappapigsa kaniak.
Kakabsat, mabalin nga ipapantayo nga awan ti tao a nagbiag a saan a nakapadas iti panagsagaba ken panagladingit, wenno awan ti panawen iti pakasaritaan ti tao a saan a nagtuok wenno nagrigat iti kaano man.
No naulpit ti kapaypay-an ti panagbiagtayo, adda pannulisog nga agdamag iti saludsod nga “Apay a siak?” No dadduma kasla awan patinggana dagiti parikuttayo, kasla awan silaw a manglawag iti sipnget ti rabii. Mariknatayo a napalawlawantayo iti sakit ti nakem ken liday gapu kadagiti napaay nga arapaap ken pannakaupay gapu iti kinaawan iti namnama. Sangkamaysatayo iti panangipeksa iti araraw iti biblia, “Adda kadi balsamo idiay Galaad?”1 Mariknatayo a nabaybay-antayon, agsagsagaba, agmaymaysa. Nakaugaliantayon ti mangkita kadagiti bukodtayo a kinadaksanggasat babaen ti negatibo a wagas. Naawanantayon iti panaganus nga agsapul iti solusion kadagiti problematayo, a nalipatantayon a no masansan ket kasapulan ti nailangitan a kababalin ti panaganus.
Dagiti rigat a sagsagabaentayo ket mangisangbay kadatayo iti pudno a pannubok iti kabaelantayo nga agibtur. Kasapulan pay laeng a sungbatan ti tunggal maysa kadatayo ti napateg unay a saludsod: Sumukoak kadin, wenno leppasekto daytoy? Adda dagiti sumuko no makitada a saanen a kabaelan ti bagida ti mangparmek kadagiti pannubokda. Tapno makaileppas kasapulantayo ti agibtur agingga iti paggibusan ti biag a mismo.
Bayat ti panangpampanunottayo kadagiti pasamak a mabalin a mapagteng kadatayo amin, maisaotayo kas ken ni Job idi un-unana, “Mayanak ti tao iti pannakaburibor.”2 Ni Job ket maysa a “naan-anay ken nalinteg” a tao a “nagbuteng iti Dios, ken immadayo iti dakes.”3 Managkararag ken nabaknang, nasken a maipasango ni Job iti maysa a pannubok a mabalin a mangdadael iti asino man. Naibus amin a sanikuana, inuyaw dagiti gagayyemna, nagsagaba iti rigatna, nagladingit unay iti pannakapukaw ti pamiliana, naguyugoy isuna a “mangilunod iti Dios, ket matay.”4 Linabanna daytoy a sulisog ket impeksana manipud iti kaunggan ti natakneng a kararuana:
“Adtoy, ti saksik adda idiay langit, ket isu ti agsungbat kaniak nga adda iti ngato.”5
“Ammok a sibibiag ti mannubbotko.”6
Nagtalinaed ni Job iti pammatina. Aramidentay met kadi ti kastoy no maipasangotayo kadagita a pannubok iti biagtayo?
No mariknatayo a madagdagsenantayo kadagiti pannubok ti biag, laglagipentayo koma a linasat met ti kastoy dagiti dadduma, nagibturda, ket kalpasanna narimbawanda.
Ti pakasaritaan ti Simbaan iti daytoy a dispensasion ti pakabuklan dagiti panawen, ket napnuan iti padpadas dagiti tao a nagrigrigat ngem nagtalinaedda a natibker ken naragsak gapu ta insentroda ti biagda iti ebanghelio ni Jesucristo. Ti gapuna? Inaramidda ti ebanghelio ni Jesucristo a sentro ti biagda. Daytoy ti mangtulongto kadatayo nga agibtur iti ania man a padas a sumangbay iti biagtayo. Mapasarantayonto latta dagiti narigat a pannubok, ngem kabaelantayonto a sanguen ken sarangten dagitoy a situtured, ket agballigitayonto kadagitoy.
Manipud iti ikamen ti sagabaen, manipud iti pungan a nabasa iti lulua, itang-aynatayo iti langit ti nasantuan a pammatalged ken napateg a kari: “Dikanto panawan wenno baybay-an.”7 Saan a magatadan ti kasta a pannakaliwliwa.
Idi nagbaniagaak iti adu nga adadayo a lugar iti intero a lubong tapno mangipatungpal kadagiti pagrebbengan ti awagko a kas propeta, naammuak ti adu a banag—agraman ti kinapudno a ti amin ket makapadas iti panagladingit ken panagsagaba. Diak kabaelan a rukoden ti amin a sakit ti nakem ken ladingit a nasaksiak idi binisitak dagiti tao nga agsagsagaba iti leddaang, masaksakit, maipaspasango iti diborsio, ken marigatan iti nasukir nga anak a lalaki wenno anak a babai, wenno agsagsagaba kadagiti bunga ti basol. Adu pay dagiti maibagak, gapu ta nakaad-adu dagiti problema a mabalin a dumteng kadatayo. Narigat ti mangibaga iti maysa a pagarigan, ngem no pampanunotek dagiti pannubok, malagipko ni Brother Brems, maysa kadagiti maestrok iti Sunday School idi ubingak pay. Isu ket napudno a miembro ti Simbaan, maysa a lalaki nga addaan iti nabalitokan a puso. Addaanda iti asawana, ni Sadie, iti walo nga annak, a dumani amin kadagitoy ti kaedad dagiti ubbing iti pamiliak.
Kalpasan ti panagkallaysami ken ni Frances ket immakarkami manipud iti ward, nakitami da Brother ken Sister Brems ken dagiti miembro ti pamiliada kadagiti pasken ti kallaysa ken punpon, kasta met kadagiti reunion iti ward.
Idi 1968, pimmusay ti asawa ni Brother Brems, a ni Sadie. Dua pay kadagiti walo nga annakna ti pimmusay kalpasan ti sumagmamano a tawen.
Maysa nga aldaw iti dumani kalpasan ti 13 a tawen, tinawagannak iti telepono ti kabaketan nga apoko a babai ni Brother Brems. Inlawlawagna a nadanonen ni lelongna ti maika-105 a panagkasangayna. Kinunana, “Aggigian isuna iti bassit a sentro ti pagaywanan ngem paspasiaren ti sibubukel a pamilia tunggal Domingo, a pangisuruanna iti maysa nga adalen iti ebanghelio.” Intuloyna pay, “Daytoy napalabas a Domingo, impadamag ni Lelong kadakami, ‘Dungngok, matayakton itoy a lawas. Mabalin kadi a tawaganyo ni Tommy Monson. Ammonanton no ania ti aramidenna.’”
Binisitak ni Brother Brems iti sumaruno a rabii. Nabayagen a diak nakita isuna. Diak makasarita isuna, gapu ta tulengen daytoy. Diak makapagsurat tapno basaenna koma, gapu ta bulseken daytoy. Naibaga kaniak a makasarsarita ti pamiliana kenkuana babaen ti panangiggem iti kanawan a ramayna ket isurat iti palad ti kanigid nga imana ti nagan ti tao a bumisbisita. Ania man a mensahe ket nasken nga ipakaammo kenkuana iti kastoy a wagas. Sinurotko ti kastoy a wagas babaen ti panangiggemko iti ramayna ket inispelingko ti T-O-M-M-Y M-O-N-S-O-N, ti nagan a kanayon nga awagna kaniak idi. Naragsakan ni Brother Brems, ket innalana dagiti imak nga imparabaw iti ulona. Ammok ti tarigagayna nga umawat iti bendision ti priesthood. Kinaduanak ti drayber a nangitulod kaniak iti sentro ti pagaywanan ket imparabawmi dagiti imami iti ulo ni Brother Brems ket intedmi ti tinarigagayanna a pammendision. Kalpasanna, nagarubos dagiti lua manipud dagiti bulsek a matana. Iniggamanna iti nairut dagiti imami nga agyamyaman. Nupay dina nangngeg ti pammendision nga impaaymi kenkuana, napigsa ti Espiritu, ket mamatiak a naparegta isuna a nangammo a naipaaymi ti bendision a kasapulanna. Saanen a makakita pay daytoy nasingpet a lalaki. Saanen a makangngeg pay. Nakaidda isuna iti aldaw ken rabii iti bassit a siled iti maysa a sentro ti pagaywanan. Iti baet dayta nasagid ti pusok iti isem iti rupana ken dagiti balikas nga insaona. “Agyamanak kenka,” kinunana. “Naimbag unay kaniak ti Nailangitan nga Amak.”
Iti uneg dayta a lawas, kas met laeng iti impadles ni Brother Brems, pimmusay isuna. Iti kaano man saanna a pinanunot no ania ti kurang kenkuana; ketdi, kanayon a nalaus unay ti panagyamanna iti adu a paraburna.
Ammo pay ti Nailangitan nga Amatayo, a mangmangted iti nakaad-adu a pagragsakantayo, a masursuruan ken dumur-as ken pumigpigsatayo no maipasango ken malasatantayo dagiti pannubok a nasken a pagdalanantayo. Ammotayo nga adda dagiti panawen a mapasarantayonto ti makasakit iti nakem a ladingit, no agleddaangtayonto, ken no masuottayo no sadino ti pagpatinggaan ti pammatitayo. Nupay kasta, dagiti kasta a panagrigrigat ket mangipalubos kadatayo nga agbalbaliw iti nasaysayaat, tapno urnosentayo manen ti biagtayo iti wagas nga insuro ti Nailangitan nga Amatayo, ken agbalintayo a naidumduma ngem iti sigud—nasaysayaattayo ngem iti sigud, ad-adda a makaawattayo ngem iti sigud, naas-asitayo ngem iti sigud, napigpigsa ti pammaneknektayo ngem iti sigud.
Nasken koma a daytoy ti panggeptayo—saan laeng nga agan-anus ken agibtur, wen, no di ketdi pay agbalitanyo a napino iti kinaespirituan kabayatan ti panagbiagtayo iti naragsak ken naliday a panawen. No saan a gapu kadagiti pannubok a sarangten ken problema a risuten, agtalinaedtayo koma a kastoy, bassit unay wenno awan panagdur-astayo nga agturong iti panggeptayo a tun-oyen nga agnanayon a biag. Nangipeksa ti mannaniw iti kasta met laeng a kapanunotan kadagitoy a balikas:
Saan nga alisto a dumakkel ti nasayaat a kayo,
No napigpigsa ti angin, napigpigsa ti kayo.
No nangatngato ti tangatang, nangatngato daytoy.
No ad-adu ti bagyo, ad-adda a pumigsa daytoy.
Iti init ken lamiis, iti niebe ken tudo,
Dumakkel ti kinaimbag iti kayo man wenno tao.8
Ti Apo laeng ti makaammo iti kinauneg wenno kinakaro dagiti pannuboktayo, ti saemtayo, ken ti sagabaentayo. Isu laeng ti mangidiaydiaya kadatayo iti agnanayon a talna kadagiti panawen ti panagrigat. Isu laeng ti mangsagsagid kadagiti agrigrigat a kararuatayo babaen dagiti makaliwliwa a balikasna:
“Umaykayo kaniak dakayo amin nga agrigrigat ken madagdagsenan, ta paginanaenkayto.
“Alaenyo ti sangolko kadakayo, ket agsursurokayo kaniak; ta siak naemmaak ken napakumbabaak iti panagpuspusok: ket makasarakkayto iti inana a maipaay kadagiti kararuayo.
“Ta ti sangolko nalaka ken nalag-an ti awitko.”9
Kadagiti karagsakan man a kanito wenno kalidayan a kanito, kaduatayo Isuna. Inkarina a saanto daytoy nga agbalbaliw iti kaano man.
Kakabsatko, sapay koma ta agbalintayo a napudno iti Nailangitan nga Amatayo a saan nga agbalbaliw iti panaglabas dagiti tawen wenno kadagiti panagrigattayo iti biagtayo. Saan a nasken a mapasarantayo dagiti rigrigat tapno malaglagiptayo Isuna, ken saan a nasken a mapilittayo nga agpakumbaba sakbay a mamati ken agtalektayo Kenkuana.
Sapay koma ta kanayon nga ikarkarigatantayo ti mayasideg iti Nailangitan nga Amatayo. Tapno maaramidtayo daytoy, nasken nga agkararagtayo Kenkuana ket dumngegtayo Kenkuana iti inaldaw. Pudno a kasapulantayo Isuna iti tunggal oras, panawen man ti ragsak wenno rigat dagitoy. Sapay koma ta kanayontayo a laglagipen ti karina: “Dikanto panawan wenno baybay-an.”10
Addaan iti naan-anay a pigsa ti kararuak, paneknekak a sibibiag ti Dios ken ay-ayatennatayo, a nagbiag ken natay para kadatayo ti Bugbugtong nga Anakna, a ti ebanghelio ni Jesucristo ti nauneg a pagtaudan ti pigsa ken namnama a makatulong kadatayo nga agibtur iti karigatan a panawen ti biagtayo. Sapay koma ta agbalin a kastoy, ikararagko iti sagrado a nagan ni Jesucristo, amen.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/13. Pannakaanamongna a maipatarus: 6/13. Pannakaipatarus ti First Presidency Message, November 2013. Ilokano. 10671 864