Klumech er a First Presidency, Ongetruich me a tang el buil 2013
“Ng Kmal Diak Chitau, Me a Diak Bo Kikrau”
A Demad er a Babeluades … a medengei el kmo kede mukeroul e merael mo mesisiich sel de chebangel a ongarm.
A kebesengei, e ak mo luchesii er a journal er ngak, “Tiang a ta er a kot el ulekrael el ongdibel er a ngii di el klou el ongdibel el blak bo er ngii. Ngii el rokui el meral mle meklou a belkul e mesisiich el chedaol tekoi.”
Rodam me a rodos, elolem el buil er a memong er a de kldibel er a blil ongdibel, e a bechik, er aFrances, a mlara ospitar, el mlara ringel er a rrebet er a sesei el klebesei ruchei. Sera May, ruriul er a tela el sandei lomekduch er rengul er a ringel, eng socherang. A kmal mui el melatk er ngii. Ngii me a ngak a mlo bechiil er a Salt Lake Temple er sera October 7, 1948. A klukuk eng mo meng okolem me a eim el rak er a ki bo bechiil. Ng mle betik a renguk er ngii er a rokui el ngera er a klengar, el kuumera er ngii, e kmal sechelik. A di kdu el kmo ak melatk er ngii a diak lochotii a delechel sel kumelchesiu er ngii.
Tial ongdibel a mo meng okeim el rak er ak mokedong el mora Chelechad er a Teruich me a terung el Apostol lulekiu a President David O. McKay. Chelsel aikal betok el rak eng dimlak a ta me kedmeklii a ngii di el ngerang el dimlak kuusbech a mui el ngeso er a bechik. Ng diak el mochur aikel blo el charm er ngii me luchul el sebechek el kudmeklii a ngerchelek. Ng dimlak a ta me krengesii loumondai le ak mle blechoel cheroid er ngii me a rengelekam el mela klebesei me a sandei. Ng meral, mle anghel.
Ng soak loureng a saul, luldimukl omereng el saul er a telungalek er ngak, er a kmal betok lolchotel a beltikelreng el mlei er kemam er a secherel a Frances. Dart el card me a babier el mlara beluulechad el rokir a mlodurokl el chemat er ngii e dirrek lodars a kngtil a rengrir el kirel a telungalek er kemam. A ki dirrek el ngilai a betok el bung. Aki oureng a saul er a betok el ngeso er a udoud el mla modars el ngara ngklel el mora General Missionary Fund er a Ikelesia. Me kemam el kiei e ngii a mlo iikremam, e ak kmal loureng a suliu me a ungil lomereliu.
Sel kmal mle uchul ongelaod el mei er ngak er tiaikid el taem el ki bocha mchacheroid a sel klaumera er ngak er a ebangkelio er a Jesus Kristo me sel klemedengei er ngak el kmo a Frances a dirk ngar. Ak medengei el kmo a klechacheroid er kemam a di kedeb el taem. Kemam a mirrenged er a blil a Dios er a chad loba klisiich lomak er a beluuelchad el mora babeluades. Ak medengei el kmo aki lmuut el mo dmak e diak ki mluut el mo kebii. Tiaikid a klemedengei el smisichak.
Rodam me a rodos, ng bai ungil a domdasu el kmo ng diak a chad el mla kiei el kmal diak a ringel me a klengitelreng le bo er ngii, malechub eng mla ngarngii a taem er a reksi er a chad el dimlak a ko er a uldikel me a klengitelreng le ngarngii.
Sel bo de chebangel a ringel er a klengar, e ngarngii a kse er kid loker el kmo “Ngera uchul me ngak?” E ngarngii a taem eng uaia lak a ulebengelel aikal ringel el mei er kid, el diak el sebeched el tuobed er ngii. Kede omelchesiu el mui er a sebekreng e diak el bol tekoi aikel soad me a dikea urunguled. Kede mo metik er kid el melekoi er sel tekoi el ngara biblia el kmo, “Ngarngii a ukeruul el ngara Gilead?”1 Kede omelchesiu el cheloit, mui er a klengitelreng, e di kid el tang. Ng mo er ngii a teleteled lomes olibesongel loba rraureng. Ng mo kedeb a rengud el kirel a nger er a mondai er kid, e mla obes el kmo a kldung er a kllouelreng a klou a belkul.
A ringel el mei er kid a skeng el kirel a duch er kid loutekangel. Sel klou a belkul ker el dertsa kid a kired longer ngii a kmo: ak kimer, malechub e a kuutekangel rokir? A rebebil a kimer sel betik er tir el dikea el sebechir ngoriakl er a ringel le chelebangel. A mo rokir a kirel lultuil er a outekangel el mora ulebengelel a klengar.
Sel domtab a teletael el duubech el mei er kid, eng sebeched el melekoi el uaia Job er a recheuodel, “A chad a mechell e ngara chelsel a ringel.”2 A Job a mle “cherrungel e mlemalt” el chad el “medakt er a Dios, e chetil a mekngit.”3 Meng mle melemalt a klengar ngii, e ungil besul, e a Job a mlo chelebangel er a skeng el sebechel tomelii a ngii di el chad. A rokui el kloklel a mlengai, a resechelil a mlo ouketui er ngii, e mlora klou el ongarm, me a klengitelreng er a bol dibus a telungalek er ngii, ng mle sebechel “dobeklii a Dios, e bai mad.”4 Ng ultngeklii tial ongetikaik e millekoi er a chelsel a rengul el kmo:
“Le a, sioning er ngak a ngara babeluades, me a rekord er ngak me ngarbab.”5
“Ak medengei el kmo osobelek a ngar.”6
A Job a mle urrekodel er a klaumerang. Kede locha mo meruul er a osisiu sel bo dechelbangel a ringel?
Sel bo domelchesiu er kid el kmal oberaod er a ringel er a klechad, e bo dolatk el kmo a rebebil a mla soiseb er a osisiu el teletael, e mla outekangel, e mla mosebechakl er ngii.
Chelsel a reksi er a Ikelesia, er chelechal cherrengelel a rokui el tekoi, a mui er a teletael er tirkel mlara ringel e millemolem el mesisiich e ngara deureng. Ngera uchul? Te mla rullii a ebangkelio er a Jesus Kristo meng moktek er a klengar tir. Tiaikid sel mo sobecheklid er a chelsel a ngii di el teletael. Kede melemolem el seluk er a chelsel a ringel, eng di ng mo sebeched el obangel, el mesisiich a rengud, e mo mesisiich er ngii.
Me a ringel el domelchesiu, me a lengeled er a chilled, e kede mosebechakl el bedul bab lokiu a chedaol klisiich me a yaksok: “Ng kmal diak kchitau, me a diak bo kikrau.”7 Tia kmal klou a belkul.
Sel kumais el meliuekl er a beluulechad el meruul a ngerchelek er a urerek, e ak mla mo medengei a betok el tekoi—luldimukl er a klemerang el kmo a klengitelreng me a ringel a di dodengelii el rokui. Ng diak el sebechek el mtab aikel rokui el ringel me a klengitelreng el blak ues sel kuldingel er tirkel ngara klengitelreng, ngara secher, dertel a chebechiil, ngara ringel er a ngelekir el sechal malechub a redil el mla touchakl, malechub e te ngara ringel el klengit a uchul. Ng sebeched el masech a lmuut el betok er a ikang, le ng diak el mochur a mondai el sebechel duubech el mei er kid. A bo kusaod er a kmal di chimo el okesiu eng meringel, eng di sel kumdasu el kirel a ringel, e a uldesuek a mo melatk el kirel a Brother Brems, el ngii a mle sensei er ngak er a Sandei Skuul er ak ngalek. Ng mle blak a rengul el chedal a Ikelesia, el mle bekokouii el chad. Ngii me a bechil, er a Sadie, a mle teai a rengelekir, el betok er tir a mle telbasech tir me a rengalek er a telungalek er ngak.
Uriul er a bok bechiil ngak me a Frances e ki molukl er a ward er kemam, e a ki ulemes er a Brother me a Sister Brems er a rua merengel a chebechiil er a telungalek me a kemeldiil, malechub eng kuk di bebil er a ngera el mo er ngii er a ward.
Sera 1968, e a bechil a Brother Brems er a Sadie, a mlad. Teru er tirkal teai el ngelekel a dirrek el mlad er a chelsel aikel rak el mlocheuekl.
A ta er a klebesei el kmeed el teruich me a edei el rak er a memong, e a kot el klou el redil el ngelekel a ngelekel a Brother Brems a uledengua el mei er ngak. Ng milsaod el kmo a demal rubak a mla mo 105 a rekil. Ng millekoi el kmo, “Ng kiei er a kekerei el blirir a remecheuodel eng di mo kebetech ngii me a telungalek er ngii er a bek el Sandei, e ngii olisechakl er a suobel.” Ng millemolem el kmo, “Tial mlomerek el Sande, i e a Demmam el Rubak a millekoi er kemam el kmo, “Rengelekei, ngak a mo mad er chelechal merael mei el sandei. Ng sebechemiu lomekedong er a Tommy Monson. Ngii a medengei el kmo ng mekerang.’”
Ak mlo oldingel er a Brother Brems er a bol kukuk er a tutau. Ng meketeketang el diak kisang. Ng dimlak el sebechek el mengedecheduch er ngii, le ng mla mo diak lorrenges. Ng dimlak el sebechek el meluches a tekingek, le ng mla mo diak lomes. Te ulechais er ngak el kmo a telugalek a mengedecheduch er ngii el di nguu a chedngelel a kadikm er a chimal e meluches er a ngklel a chad el mle oldingel er a chereuel a katur er a chimal. Ngii di el tekoi a kirel meluches er tiaikid el teletael. A kultirakl er tial teletael me ak ngiluu chimal el luchesii a T-O-M-M-Y M-O-N-S-O-N, el ngii a ngakl lodengelii el ngklek. A Brother Brems a kmal mlo ungil a rengul, e mocha ngmai chimak, locha er a bebul a bdelul. Ak mlo medengei el kmo ng soal a klengeltengat er a priesthood. A chad lulmekall er a mlai loltak er ngak a ki bocha mdak el terung e ngmai chimomam locha er a bebul a bdelul a Brother Brems e msa klengeltengat. Uriul, eng longelang. Ng ulereked a chimomam loureng a saul. Ng uaisei el dimlak el rengesii tial klengeltengat, eng di ng mle mesisiich Chedaol Reng, e a kuumerang el kmo ngii a mlo medengei el kmo aki milsa klengeltengat el ngii ousbech er ngii. Ngika el kmal ungil chad a dikea lomes. Ng dikea lorrenges. Bek el sils eng di kiei er a chelsel a kekerei el delmerab er a blirir a remechuodel. Eng di sel klikm er a osengel me a tekoi lullekoi a rirtechii a renguk. “Ko mesulang,” ng millekoi. “A Demak er a Babeluades a kmal ungil mei er ngak.”
Ng di mle chelsel a tal sandei, el uaia ikel lullekoi a Brother Brems, eng socherang. Ng dimlak a ta lolatk aikel diak er ngii; ng bai, mle blechoel mui er a omereng el saul el kirel a betok el klengeltengat.
A Demad er a Babeluades el meskid a kmal betok el de ngara deureng el kirel, a dirrek el medengei el kmo kede mukeroul e merael mo mesisiich sel de chebangel a ongarm. Kede medengei el kmo ngarngii a taem e kede soiseb er a klengitelreng, el bo delangel, e mora skeng lengelakl er sel sebeched. Eng di, aikaikid el ringel a rullid el mo mesisiich, e sumechokl a klengar kid er sel teletael el Demad er a Babeluades olisechakl er kid, e kuk mo ngodech er sel teletael el de bla er ngii—el muut el mo ungil, lmuut el klemedengei, lmuut el mo chubechubechad, e lmuut el mo mesisiich a klaumera er kid.
Tiaikid a kirel moktek er kid—el mengeluolou e outekangel, oi, e dirrek el mo mesisiich er a chedaol tekoi sel de kiei er a chelsel a ungil me a mekngit el taem er a klengar kid. Omko ng diak a ringel me a mondai el kired el soiseb er ngii, e kede melemolem el di uaisei, el kekerei malechub eng diak a mengodech er kid el kirel a moktek er kid er a diak a ulebengelel klengar. A chad er a omeluches a melekoi el kirel osisiu el tekoi el kmo:
A ungil kerrekar a diak el mukeroul er a chelsel a ungil teletael,
A klisichel a eolt, eng klisichel a kerrekar.
A cherridel a eanged, eng klemengetel.
A le klou a ses el eolt, eng klou a klisichel.
A le sils me a kelekolt, a le chull me a le snow,
A ungil kerrekar a mukeroul, me a ungil blekeradel a mekerulii a chad.8
Ng di tal Mastang a medengelii a delechel ongarm el de ngarngii, ringel, me a klengitelreng. Ng di ngii el tang a meskid a diak a ulebengelel budech er a taem er a ringel. Ng di ngii el tang a remutech a telemall el rengud lokiu aikakid el tekingel:
“Mei er ngak, kemiu el chellungel a berraod, e kbeskemiu a ulengull.
“Mnguu a chelngelek, e mosuub er ngak; le ngak a medemdemk e ngariou a renguk: me ko mo metik a ulengull er a rengmiu.
“Le chelngelek a beot, me a berraod er ngak a kebekakl.”9
Me a le sal kmal ungil taem malechub eng kmal mekngit el taem, e Ngii a di obengked. Ngii a mla yaksok el kmo tia diak el mengodech.
Rodam me a rodos, mei e bo dultuil er a Chedam er a Babeluades el ngii a diak el mengodech er a chelsel aikel meringel el taem er a klengar kid. Ng diak el kired el mo obangel a ringel el mo melbedebek er Ngii, e diak el kired el morrimel el mo ngariou a rengud ruchei er a dodersii er Ngii a klaumerang er kid.
Dolemolem el melasm el mo kmeed er a Demad er a Babeluades. A bo deuaisei, eng kired el meluluuch el mo er Ngii e orrenges er Ngii er a bek el sils. Kede meral lousbech er Ngii er a bek el sikang, a lungil a eanged malechub eng chull. Bo de blechoel melbedebek er tiakid el yaksok er Ngii: “Ng kmal diak chitau, malechub e bo kikrau.”10
Me a ikel rokui el klisichel a renguk, e a kuuchais el kmo a Dios a ngar e betik a rengul er kid, e a Di Chimo el Ngelekel Sechal a kiliei e mlad el kired, e a ebangkleio er a Jesus Kristo a sel ngii a llomes el meluich er a iilkolk er a klengar kid. Me bol uasiei, a nglunguchek el ngara chedaol ngklel a Jesus Kristo, amen.
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/13. Kengei er a oidel: 6/13. Oidel a First Presidency Message, November 2013. Palauan. 10671 881