Mensahe sa Unang Kapangulohan
Pamilya ug mga Higala sa Kahangturan
Bisan asa mo nagpuyo, kamo adunay mga higala kinsa nangita sa mas dakong kalipay nga inyong nakaplagan sa pagsunod sa gipahiuli nga ebanghelyo ni Jesukristo. Tingali dili nila mahulagway kana nga kalipay gamit ang mga pulong, apan ila kining maila kon ila kining makita sa inyong kinabuhi. Sila maghinam-hinam nga makakat-on sa tinubdan niana nga kalipay, ilabi na kon ilang makita nga kamo nag-atubang og mga pagsulay sama nila.
Inyong nabati ang kalipay samtang kamo nagsunod sa mga sugo sa Dios. Kana mao ang gisaad nga bunga sa pagsunod sa ebanghelyo (tan-awa sa Mosiah 2:41). Wala kamo nagmatinud-anon sa pagsunod sa mga sugo sa Ginoo aron lang makita sa ubang mga tawo, apan kadtong nag-obserbar sa inyong kalipay giandam sa Ginoo nga maminaw sa maayong mga balita sa Pagpahiuli sa ebanghelyo.
Ang mga panalangin nga gihatag diha kaninyo nakamugna og mga obligasyon ug talagsaong mga oportunidad alang kaninyo. Isip usa ka disipulo sa pakigsaad ni Jesukristo, kamo obligado sa paghatag og oportunidad sa uban nga makakaplag og dugang kalipay, ilabi na sa inyong mga higala ug mga sakop sa pamilya.
Ang Ginoo nakakita sa inyong oportunidad ug mihulagway sa inyong obligasyon uban niini nga sugo: “Matag tawo kinsa napasidan-an magpasidaan sa iyang silingan” (D&P 88:81).
Kana nga sugo mas gipasayon sa Ginoo nga inyong sundon pinaagi sa kausaban nga nahitabo diha sa inyong kasingkasing samtang kamo modawat ug mosunod sa ebanghelyo ni Jesukristo. Isip resulta, ang inyong gugma alang sa uban molambo, ingon man ang inyong tinguha nga sila makabaton sa sama nga kalipay nga inyong nasinati.
Usa ka panig-ingnan niana nga kausaban mao ang paagi kon giunsa ninyo pagdawat ang kahigayunan sa pagtabang sa misyonaryo nga buhat sa Ginoo. Ang full-time nga mga misyonaryo maglaum sa usa ka tinuod nga kinabig og madasigong tubag sa hangyo og referral. Ang kinabig nagtinguha sa kalipay para sa iyang sa mga higala ug sakop sa pamilya.
Kon ang inyong ward mission leader o mga misyonaryo mangayo og ngalan sa tawo nga matudloan, kini nindot nga pagdayeg alang kaninyo. Sila nasayud nga may mga higala nga nakakita sa inyong kalipay ug, busa, kadtong mga higala giandam sa pagpaminaw ug pagpili sa pagdawat sa ebanghelyo. Ug sila adunay pagsalig nga kamo mahimong higala nga ilang gikinahanglan kon sila magpasakop sa gingharian.
Dili mo angay nga mahadlok nga mawala inyong mga higala kon dapiton ninyo ang mga misyonaryo sa pag-ila-ila kanila. Ako adunay mga higala kinsa mibalibad sa mga misyonaryo apan mapasalamaton kanako sa daghang katuigan sa pagtanyag kanila og usa ka butang nga ilang nasayran bililhon kaayo para nako. Molungtad sa kahangturan ang inyong paghinigalaay pinaagi sa pagtanyag sa ebanghelyo, nga ilang nakita nga nakapalipay ninyo. Ayaw gayud palabya ang kahigayunan sa pagdapit og usa ka higala ug ilabi na sakop sa pamilya nga mopili sa pagsunod sa plano sa kalipay.
Walay mas maayong kahigayunan sa pagdapit gawas diha sa mga templo sa Simbahan. Didto ang Ginoo makahatag sa mga ordinansa sa kaluwasan alang sa atong mga katigulangan nga wala makadawat niini sa kinabuhi. Sila nagtan-aw kaninyo uban sa gugma ug paglaum. Ang Ginoo misaad nga sila adunay oportunidad nga mosulod sa Iyang gingharian (tan-awa sa D&P 137:7–8), ug Siya nagtanom og gugma alang kanila diha sa inyong kasingkasing.
Adunay daghan kaninyo mibati sa hingpit nga kalipay sa pagbuhat sa mga ordinansa sa templo alang sa uban, sama sa inyong bation kon mohatag kamo og mga ngalan sa mga tawo nga mabisita sa mga misyonaryo. Mas malipay kamo sa pagpahigayon sa mga ordinansa alang sa inyong mga katigulangan. Kini gipadayag ngadto kang Propeta Joseph Smith nga ang atong mahangturon nga kalipay posible lamang kon atong itanyag ngadto sa atong mga katigulangan ang paagi nga madawat nila kana nga panalangin pinaagi sa mga ordinansa sa pagpuli (vicarious) diha sa templo (tan-awa sa D&P 128:18).
Sa panahon sa Pasko makapamalandong kita sa atong pagbati kabahin sa Manluluwas ug sa kalipay nga gidala sa Iyang ebanghelyo ngari kanato. Atong maipakita og maayo atong pasalamat Kaniya kon atong ipakigbahin kana nga kalipay ngadto sa uban. Ang pasalamat nahimong kalipay samtang kita mohatag og mga ngalan ngadto sa mga misyonaryo ug samtang atong dalhon ang mga ngalan sa atong katigulangan ngadto sa templo. Kana nga ebidensya sa atong pasalamat makahimo og mga higala ug pamilya nga molahutay sa kahangturan.
Pagtudlo niini nga Mensahe
Si President Eyring nagpasabut nga atong maipakita atong pasalamat alang sa Manluluwas pinaagi sa pagpakigbahin sa ebanghelyo ngadto sa uban. Mahimo ninyong hisgutan sa inyong gitudloan kon sa unsang paagi ang gasa sa ebanghelyo mipanalangin sa ilang mga kinabuhi. Ikonsiderar sa pagdapit kanila nga mainampoong ilhon kadtong gusto nilang hatagan sa gasa sa ebanghelyo ug unsaon nila sa pagbuhat niini.