Serafo
Ngang mi Tongeni Ngeni Emon Echo Puken Mormon?
Ewe chon mak mi nonnom Washington, USA.
Non ai we aewin ierin high school, nei we sensen seminari a tungoreikem am aupwe ngeni chienem kewe rese mo chon ewe mwichefen ekkoch Puken Mormon. Ina mo ika pwe ngang mi mefan, ngang mi chok tipeu ngeni an na tungor.
A fen fitu ran ra no me mwen ua tufichin apochokunaei ne fori, nge ngang mi ngeni chienei we itan Britany echo Puken Mormon fansoun am mongon neanowas ua pwan ekkis apasa ai kapasen pwarata. Britny a apasa an kinisou fan itan ewe puk.
Neseoponon ewe ierin sukun, Britny a feino ekkis, nge am mi chok foffos fengen. A aporausa ngeniei usun an na sukun minafo, pwan usun chienan kewe ir meinisin chon ewe Mwichefen.
Mi siwin ena me mwen ua no misineri. Ua angei echo taropwe seni Britny a era a wor watte poraus fan itei: I epwene paptais, a pwan mochen pwarata an kinisou ngeniei ren ai chiechioch ngeni pwan ai fori eu nenien appiru mi murrino.
Kot a angei emon mi mefan a chok 15 ierin ese wor an sinei usun angangen misineri, iwe a emweni an epwe aporausa ewe kapas allim ngeni emon A fen sinei epwe etiwa. Ua sinei pwe seni ach ausesning ngeni ewe Ngun mi Fel, sia tongeni kuna chommong aramas neich ra witiwit ar repwe kaeo usun ewe kapas allim mi niwinsefan. Ua sinei ika pwe sipwe tongeni uwei emon chok ngeni ewe Samon, epwe ifa aukkukun [ach] pwapwa ren I non ewe muun [Semach]! (nengeniD&C 18:15).