Poraus seni ewe Aewin Presetensi, December 2013
Famini me Chiechi Feinfeino
Ia chok ka nonnnom ia, a wor chienom kana ra kutta ewe pwapwa mi nap ka weri seni om manaueni ewe kapas allim a niwinsefan an Jises Kraist. Mi tufich pwe resap tongeni awewe ena pwapwa non kapas, nge ra tongeni esinna nupwen ra kuna non manauom. Repwe fen mochen sinei popunapen ena pwapwa, akkaewin nupwen ra kuna pwe en mi tori osukosuk usun chok ir.
Ka mefi pwapwa nupwen ka apwonueta ekkewe annukun Kot. Ina ewe uwan ira mi pwon ngenikich ren ach manaueni ewe kapas allim. (nenengeni Mosaia 2:41) Kesap apwonueta ekkewe annukun Kot non nuku ren aramas ar repwe chok katon en, nge ekkewe aramas ra kuna om pwapwa ra ammonata me ren ewe Samon pwe repwe ausening ngeni ewe poraus mi murinno usun ewe Niwisefaniton ewe kapas allim.
Ekkewe feioch ka angei ra awora ngonuk wis me tufich mi amwarar fan itom. Ren en emon chon kunon Jises Kraist mi pwon, a wor wisom om kopwene atoura ngeni ekkewe ekkoch ewe tufich ne kutta pwapwa, akkaewin ngeni cheinom kewe me chon om we famini.
Ewe Samon a kuna om we tufich me a awewe wisom ren ei annuk: A ina wisan iteitan mwan mi mi angei an aurour epwe auroura chon nonnom unukun (nengeni D&C 88:81).
Ewe Samon a amecheresi om kopwe apwonueta ena annuk me ren ewe ekkisiwini a fis non netipom nupwen ka etiwa me manaueni ewe kapas allimen Jises Kraist. Iwe ren ena, a esenipato om tong ngeni ekkewe ekkoch epwe napeno, pwan usun chok om mochen ar repwe angei ena pwapwa ka mefi.
Eu awewen ena siwin a pwa ren ifa usun ka etiwa ewe tufichin aninis non an ewe Samon angangen misineri. Misineri ra kaeo pwe nupwen ra tingor aninisin kutta aramas seni emon ennetin chon nuku epwe fen pwapwa ne ngenir. Ekkewe ra keran papatais ra wesan mochen pwe chiener me chon ar famini repwe fitir non ar pwapwa.
Nupwen om souemwenin angangen misineri non om wart are ekkewe misineri ra tingor itan ekkoch aramas ra tongeni afanafan ngeni, epwe fakkun murrino ngonuk. Ra sinei pwe chienom kana ra fen kuna omw pwapwa, iei minne, ekkana chiechi ra fen monnata ne ausening ngeni me etiwa ewe kapas allim. Iwe mei wor ar nuku pwe en kepwe ewe sokkun chiechi mi namwot ngenir ren ar tonong non ewe muu.
Kesap niuokus pwe chienom kewe repwe pout senuk ren om ka tingorei ekkewe misineri ar repwe churir. Mi wor chienei kewe ra poponi ekkewe misineri nge fan chommong ier ra fen kinisou ngeniei ren ai achocho ne atoura ngenir eu mettoch mi fakkun auchea ngeniei. Ka tongeni mina ar repwe chienom feinfeino ren om ka atoura ngenir ewe kapas allim, pun ra fen kuna pwe a fen awora ngonuk pwapwa. Kesap mut ngeni eu tufich an epwe pout senuk om kopwe etiwa emon chienom akkaewin emon chon om famini ar repwe fini ne apwonueta ewe kokkotun pwapwa.
Ese wor pwan eu tufichin wau kapasen etiwitiw nap seni me non ekkewe tempel an ewe Mwichefen. Ikewe ia ewe Samon a tongeni awora ekkewe angangen amanau ngeni ach kewe neuo rese tufichin angei me non manauer. Ra nennetiw wom ren tong me apinukunuk. Ewe Samon a pwon pwe epwe wor ar tufichin tonong non Muun we (nenengeni D&C 137:7–8), iwe A fotukatiw eu tong fan iter me non netipom.
Chommong me neimi oua mefi pwapwa non ami awora ekkewe angangen ewe tempel, usun chok nupwen ka ngeni ekkewe misineri itan ekkoch aramas ar repwe churi. Ka fen mefi ewe pwapwa mi nap ren om ka fori ekkewe angang fan itan om kewe neuo. A pwa ngeni ewe Soufos Joseph Smith pwe ach pwapwa ese much mi chok tufich ika pwe sipwe awora ewe an ngeni ena feioch fan itan ach kewe neuo me ren ekkewe angangen ewe tempel fan itan ekkewe ra fen mano. (nenengeni D&C 128:18).
Fansoun Christmas a kunnu netipach ngeni ewe Samon pwan ewe pwapwa An we kapas allim a fen wato rech. Sia pwarata ach kinisou ngeni I non ach awora ena pwapwa ngeni ekkoch. Ach kinisou epwe winiti pwapwa ren ach awora itan aramas ngeni ekkewe misineri pwan ren ach uwei itan ach kewe neuo ngeni ewe tempel. Ena pisekin pwaratan ach kinisou epwe etufichi chiechiach me ach famini ar repwe nonnom feinfeino.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun First Presidency Message, December 2013. Chuukese. 10672 901
Afanafan seni ei Poraus
Preseten Eyring a awewe pwe kich mi tongeni pwari ach kinisou ren ewe Samon ren ach sipwe aporausa ewe kapas allim ren ekkoch. Ka tongeni fos ren ekkewe ka afanafana ifa usun ewe kapas allim mi efeiochu manauer. Ekieki om kopwe pesei ngenir ar repwe esinnna me ren iotek ion ra mochen atoura ngenir nifangen ewe kapas allim pwan ifa usun ar repwe fori.