Ennaan eo an Būreejtōnji eo Kein Kajuon, Tijem̧ba 2013
Baam̧le im Ro M̧ōttad N̄an Indeeo
Jabdewōt jikin kwoj jokwe ie, ewōr ro m̧ōttam̧ ro rej pukōt m̧ōņōņō eo eļapļo̧k emōj am loe ilo mour kōn jepļaaktok in ko̧jpeļ eo an Jisōs Kraist. Remaron̄ jab maron̄ kōmeļeļeik m̧ōņōņō ņe ilo naan, ak remaron̄ kile ilo iien n̄e rej loe ilo mour ņe am. Renaaj kijoror in katak kōn ia eo m̧ōņōņō in ej itok jene, eļaptata ilo iien ņe rej loe ke kwoj bar jelm̧ae apan̄ āinwōt er.
Emōj am kar en̄jake m̧ōņōņō ilo am kōjparok kien ko an Anij. En̄ņe ej leen kalim̧m̧ur eo kōn mour kōn ko̧jpeļ eo (lale Mosaia 2:41). Kwoj jab tiljek ilo pokake kien ko an Irooj bwe ro jet ren loe, ak ro rej lale am m̧ōņōņō emōj kōpooj er jen Irooj n̄an ron̄jake nuuj ko rem̧m̧an an Jepļaaktok eo an ko̧jpeļ in.
Kōjeram̧m̧an ko emōj liwaj n̄an eok raar kōm̧m̧an eddo ko im iien ko rem̧m̧an n̄an eok. Āinwōt juon rikaļoor in bujen an Kraist, kwoj eddoik n̄an leļo̧k n̄an ro jet juon iien em̧m̧an n̄an kōļapļo̧k m̧ōņōņō, eļaptata n̄an pukōt ro m̧ōttam im ro uwaan baam̧le eo am.
Irooj eaar lo iaļen jeram̧m̧an in am̧ im kar kōmeļeļeik eddo in am̧ ippān kien in: Ej kōm̧m̧an bwe aolep armej ro raar bōk kakkōl ren kakkōl eo iturin (D&C 88:81).
Irooj ej kōm̧m̧an bwe en pidodo ļo̧k n̄an pokake jen oktak in ej waļo̧k ilo būruwōm̧ ilo am̧ errā kake im mour kōn ko̧jpeļ eo an Jisōs Kraist. Āinwōt juon tōprak, am̧ iakwe n̄an ro jet ej eddōkļo̧k, barāinwōt am̧ ikdelel bwe en wōr ippāer ejja m̧ōņōņō in me emōj am̧ imminene kake.
Juon waanjon̄ok kōn oktak in ej wāween am̧ karuwaineneiktok am iien n̄an jipan̄ ilo jerbal in mijenede. Mijenede ro rej jerbal aolep raan ejjab etto rej katak ke remaron̄ kōtmāne jen juon rioktak juon uwaak em̧m̧an n̄an juon kajjitōk n̄an juon rikatak eo remaron̄ katakin. Rioktak eo ej jan̄nuwaade ro m̧ōttan im membōr ro an baam̧le eo n̄an kwaļo̧k ippāer m̧ōņōņō in aer.
N̄e ritōl eo an mijen ilo ward eo am̧ ak mijenede ro rej kajjitōk etan armej n̄an katakin, ej juon menin nōbar eļap n̄an eok. Rejeļā bwe ro mōttāer raar lo am̧ m̧ōņōņō im, kōn menin, ro m̧ōttāer raar m̧aanjebpopo n̄an ron̄jake im kālet n̄an bōk ko̧jpeļ in. Im ewōr aer lōke bwe kwonaaj juon m̧ōttāer eo renaaj aikuji ilo aer deļo̧n̄e tok ilo aelōn̄ in kiin̄ in.
Kwoj jab aikuj in mijak bwe enaaj iiōtļo̧k m̧ōttam̧ ilo am̧ karuwaineneiktok mijenede ro bwe ren ioon er. Ewōr ro m̧ōtta ro raar kajekdoon mijenede ro ak raar kam̧oolol eō elōn̄ iiō kōn aō kar leļo̧k n̄an er men eo me rejeļā ke eaar lukkuun in aorōk ippa. Komaron̄ kōm̧m̧an m̧ōttam̧ n̄an indeeo jen leļo̧k ko̧jpeļ eo, eo rej loe bwe eaar bōktok n̄an eok m̧ōņōņō. Jab eļļā jen juon iien em̧m̧an n̄an karuwaineneik juon m̧ōttam̧ im eļaptata juon membōr in baam̧le n̄an kālet n̄an ļoor karōk in m̧ōņōņō eo.
Ejjeļo̧k iien en em̧m̧anļo̧k n̄an kūr in jen ilowaan tampeļ ko an Kabun̄ in. Ijeņ Irooj emaron̄ letok kain̄i ko an mour indeeo n̄an ro nukid m̧okta ro raar jab maron̄ būki ilo kar mour in. Rej reilaļtak ioom̧ kōn iakwe im kōjatdikdik. Irooj ej kalim̧m̧ur bwe enaaj wōr aer iien em̧m̧an n̄an itok n̄an aelōn̄ in kiin̄ in An (lale D&C 137:7–8), im E eaar katōke juon iakwe n̄an er ilo būruōm.
Elōn̄ iaami eaar en̄jake lan̄lōn̄ ilo ami leļo̧k kain̄i ko an tampeļ n̄an ro jet, āinwōt n̄e kwoj leļo̧k et ko etan armej n̄an mijenede ro bwe ren ioon er. Emōj am̧ en̄jake eļapļo̧k lan̄lōn̄ ilo am kōm̧m̧ani kain̄i ko n̄an rūtto ro nukum̧. Eaar waļo̧k n̄an Rikanaan Joseph Smith bwe m̧ōņōņō indeeo eo ad enaaj kūrm̧ool wōt n̄e jenaaj leļo̧k iaļ eo n̄an kōjeram̧m̧an eo an ro nukid m̧okta jen kōj ilo kōm̧m̧ani kain̄i ko an tampeļ (lale D&C 128:18).
Iien kūrijm̧ōj ej kepaakļo̧k būruwōd n̄an Rilo̧mo̧o̧r eo im n̄an lan̄lōn̄ eo ko̧jpeļ eo An eaar bōktok n̄an kōj. Jej kwaļo̧k ad kam̧oolol n̄an E ilo ad leļo̧k m̧ōņōņō n̄an ro jet. Kam̧oolol ej erom lan̄lōn̄ ilo ad leļo̧k et ko n̄an mijenede ro im ilo ad bōk etan ro nukid m̧okta jen kōj n̄an tampeļ eo. Kam̧ool in kōn ad kam̧oolol emaron̄ kōm̧m̧an jem̧jerā im baam̧le ko me reniknik n̄an indeeo.
© 2013 jen Intellectual Reserve, Inc. Aolep jim̧we rej pād ippān. Jeje ilo USA. Kōmālim ilo kajin English: 6/13. Kōmālim an ukook: 6/13. Ukook eo an First Presidency Message, December 2013. Marshallese. 10672 874
Katakin jān Ennaan In
Būreejtōn Eyring ej kōmeļeļeiki ke jemaron̄ kwaļo̧k ad kam̧oolol kōn Rilo̧mo̧o̧r eo ilo ad kōjjeikik ko̧jpeļ eo n̄an ro jet. Komaron̄ kōnono ippān ro kwoj katakin er wāween an menin letok eo an ko̧jpeļ in kar kōjeram̧m̧an mour ko aer. Lale n̄e komaron̄ karuwaineneiktok er n̄an kallikar ilo jar ro me rej kōņaan kwaļo̧k menin letok in an ko̧jpeļ eo im ewi wāween aer maron̄ kōm̧m̧an āindein.