Fas Presidensi Mesej, Jenuware 2014
Gudfala Taem blong Planem wan Tri
Long Rom blong bifo, Janus i bin wan god blong ol stat. Oltaem oli ripresentem hem wetem tu fes—wan i stap luk i gobak long bifo, mo narawan i stap luk long fored i go long fiuja. Sam lanwis, oli nemem manis blong Jenuware folem nem blong hem from se stat blong yia i wan taem blong luklukbak, mo tu, wan taem blong stap mekem plan.
Plante taosen yia afta, plante kalja raon long wol oli stap gohed long wan tradisen blong mekem lis blong ol samting blong mekem gud long niufala yia. I tru, blong mekem lis blong ol samting blong mekem, i isi—blong mekem olgeta i wan defren samting evriwan.
Wan man we i bin mekem wan longfala lis blong ol samting we bae oli mekem long niufala yia i filim gud tumas long progres blong hem. Hem i talem long hemwan: “Naoia, mi kipim komitmen blong mi blong katem daon kilo blong mi, mi no kros kwiktaem, mi kipim gud badjet blong mi, mo mi no bin komplen nating abaot dog blong neiba. Be tedei hem i namba 2 Jenuware mo alam i mekem noes mo hem i taem blong mi kamaot long bed. Bae i kam wan merikel blong kipim ol gol blong mi oli gohed.”
Stat Bageken
I gat samting we i mekem yumi gat bigfala hop taem yumi tingbaot wan niu stat bakegen. Mi ting se long eni taem yumi evriwan i wantem stat bageken we yumi no gat mistek olsem bifo.
Mi laekem tekem wan niu kompiuta wetem wan klin had draev. Kompiuta ia i wok stret gud evriwan blong sam taem. Be taem ol dei mo ol wik oli pas, mo taem oli putum moa program (sam we yumi nomo i putum mo sam i no yumi), bae i no longtaem kompiuta i stat blong wok slo, mo ol samting we i bin stap mekem kwik mo gud, naoia i kam slak. Samtaem kompiuta ia i nomo wok nating. Iven blong statem i save kam wan wok from se had draev i fulap wetem plante defren infomesen mo ol lektronik baten we i no nid. I gat ol taem we i gat wan joes nomo i stap, we i blong klinim had draev blong kompiuta ia, mo stat bakegen wetem ol niu program.
Ol man tu oli save kam fulap wetem fraet, tu tingting, mo hevi tingting blong harem nogud. Ol mistek we yumi mekem (tugeta hemia we yumi minim blong mekem mo hemia we yumi no minim) i save stap hevi long yumi kasem taem we i had blong mekem wanem yumi save se yumi mas mekem.
Wetem sin, i gat wan gudfala rod blong kam klin we yumi singaotem, fasin blong sakem sin, we i letem yumi klinim had draev insaed long yumi we i fulap long ol infomesen ia we i mekem hat blong yumi i trabol gud. Gospel, tru long merikel mo sore blong Atonmen blong Jisas Kraes, i soem long yumi rod blong klinim ol sol blong yumi long ol toti blong sin mo kam niu bageken, klin gud, mo kam olsem wan smol pikinini.
Be samtaem, ol nara samting i mekem yumi slodaon mo i holembak yumi, i mekem yumi gat ol tingting mo aksen we i blong nating, we i mekem i had long yumi blong stat.
Soemaot Bes Fasin Insaed long Yumiwan
Blong setem ol gol, i wan wok we i inaf blong wokhad from. Yumi save se Papa blong yumi long Heven i gat ol gol from se Hem i bin talem long yumi se wok mo glori blong Hem i blong mekem man i nomo save ded mo i kasem laef we i no save finis (luk long Moses 1:39).
Ol gol blong yumiwan i save soemaot bes fasin insaed long yumiwan. Nomata long hemia, wan long ol samting we i spolem ol hadwok blong yumi blong mekem mo kipim desisen, hem i fasin blong stap pusumbak taem. Samtaem, yumi holemtaet taem blong stat blong longtaem, yumi wet long wan stret taem blong statem—fas dei blong niu yia, stat blong hot taem, taem we bae oli singaotem yumi olsem bisop o Rilif Sosaeti presiden, afta ol pikinini oli go long skul, afta yumi ritae.
Yu no nidim wan invitesen bifo yu stat muv long daereksen blong ol gudfala gol blong yu we i stret. Yu no nidim blong wet blong oli givim raet long yu blong kam man o woman we oli putum plan blong yu kam. Yu no nidim blong wet blong oli invaetem yu blong givim seves insaed long Jos.
Samtaem yumi save westem ol yia blong laef blong yumi blong stap wet blong oli jusum yumi (luk long D&C 121:34–36). Be hemia i wan tingting we i giaman. !Oli bin jusum yu finis!
Samtaem long laef blong mi, mi bin spenem plante naet we mi no save silip wetem fulap tingting, ol wari, mo sore blong miwan. Be nomata we naet ia i tudak gud, oltaem wan tingting i leftemap tingting blong mi: long moning bae san i girap.
Wetem evri niufala dei, wan niu laet i kam—i no blong wol nomo, be blong yumi tu. Mo wetem wan niufala dei, wan niu sta i kam—wan janis blong stat bageken.
?Be Olsem Wanem Sapos Yumi No Save Mekem?
Samtaem samting we i holembak yumi, hem i fraet. Maet bae yumi fraet se bae yumi no save mekem, se bae yumi save mekem, se ating bae yumi sem, se sakses ia ating bae i jenisim yumi, o ating bae i jenisim ol pipol we yumi lavem olgeta.
Mo i mekem yumi wet. O givap.
Wan nara samting we yumi nid blong tingbaot taem yumi stap putum ol gol, hem i hemia: bae yumi mas mestem samting—blong sot taem nomo. Be i no nid blong kam slak long tingting; yumi save gat paoa from se save ia i ronemaot presa blong kam stret gud evriwan naoia. Save ia luksave long stat, se bambae i gat wan taem, we yumi save foldaon. Taem yumi save hemia fastaem i ronemaot olgeta sapraes mo fasin blong kam slak long tingting taem yumi foldaon o mestem samting.
Taem yumi stap wok from ol gol blong yumi long wei ia, blong foldaon i no save stopem yumi. Tingabaot, nomata sapos yumi foldaon blong kasem stret gol blong yumi long stret taem, bae yumi mekem progres folem rod we bae i lidim yumi i go kasem gol ia.
Mo hemia i impoten—i gat bigfala mining.
Nomata yumi no kasem laen blong finis, sapos yumi stap gohed nomo long rod ia, bae i mekem yumi kam moa gud bitim bifo.
Gud Taem blong Stat Hem I Naoia
Wan olfala toktok i talem: “Gudfala taem blong planem wan tri i 20 yia i pas finis. Seken taem we i gud, hem i naoia.”
I gat gufala samting mo we i gat hop abaot toktok ianaoia. I gat samting we i gat paoa abaot fasin ia blong, sapos yumi jusum blong disaed naoia, yumi save muv long fored long stret taem ia.
Naoia hem i bes taem ia nao blong stat kam man ia o woman ia we yumi wantem blong kam wan dei—i no 20 yia afta stat naoia, be blong wan taem tu we i no save finis.
© 2014 i kam longIntellectual Reserve, Inc. Oli gat evri raet. Oli printim long YSA. Oli letem long Inglis: 6/13 Oli letem translesen: 6/13 Translesen blongFirst Presidency Message, January 2014. First Presidency and Visiting Teaching Messages, January 2014. Bislama. 10861 852
Yusum Mesej Ia blong Tij
Presiden Ukdof i bin eksplenem se taem yumi foldaon o mestem blong kasem ol gol blong yumi, “yumi save kasem moa paoa. … Nomata yumi no kasem laen blong finis, sapos yumi stap gohed nomo long rod ia, bae i mekem yumi kam moa gud bitim bifo.” Askem ol memba blong famle blong serem ol eksperiens long wanem oli bin lanem moa long wok blong mekem bitim wanem oli lanem long risal blong wok ia, olsem graduesen blong skul o kasem wan awod.