2014
Tabu Misin blong Jisas Kraes: Stap Olsem Eksampol
Jenuware 2014

Visiting Tijing Mesej, Jenuware 2014

Tabu Misin blong Jisas Kraes: Stap Olsem Eksampol

Stadi toktok ia wetem prea mo luklukgud blong save wanem blong serem. ?Olsem wanem nao taem yu andastanem laef mo misin blong Sevya i leftemap fet blong yu long Hem mo blesem olgeta we yu stap lukaotem olgeta tru long visiting tijing? Blong kasem moa infomesen, go long reliefsociety.lds.org.

Fet • Famle • Help

Taem yumi andastanem se Jisas Kraes i eksampol blong yumi long evri samting, yumi save leftemap tingting blong yumi blong wantem folem Hem. Ol skripja oli fulap long ol toktok blong leftemap tingting blong yumi blong folem ol futstep blong Kraes. Long ol man blong Nifae, Kraes i talem: “From ol wok yufala i bin lukim mi mi mekem, samting ia bae yufala i mas mekem tu” (3 Nifae 27:21). Long Tomas, Jisas i talem: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sapos mi mi no tekem hem i kam” (Jon 14:6).

Tede ol lida blong yumi oli mekem yumi tingbaot blong putum Sevya olsem eksampol blong yumi. Linda K. Beten, Rilif Sosaeti Jeneral presiden, i talem: “Taem wanwan long yumi i gat doktrin blong Atonmen we oli raetem dip insaed long ol hat blong yumi, bae yumi kam ol kaen pipol ia we Lod i wantem yumi blong kam.”1

Presiden Tomas S. Monson i talem: “Lod mo Sevya blong yumi, Jisas Kraes, i Eksampol mo paoa blong yumi.”2

Yumi mas mekem tingting blong yumi blong kam moa klosap long Jisas Kraes, blong obei long ol komanmen blong Hem, mo blong traehad blong gobak long Papa blong yumi long Heven.

I Kamaot long Ol Skripja

2 Nifae 31:16; Alma 17:11; 3 Nifae 27:27; Moronae 7:48

I Kamaot long Histri blong Yumi

“Hem i makem rod mo lidim wei,” Elisa R. Sno, seken Rilif Sosaeti jeneral presiden i bin raetem abaot ministri blong Jisas Kraes long wol ia.3 Hem i givhan long wanwan man, woman mo pikinini—wan afta narawan. Hem i bin tijim se yumi mas lego ol naentinaen mo go faenem wan we i lus (luk long Luk 15:3–7). Hem i bin hilim, mo i bin tijim evri man, woman mo pikinini, iven i tekem taem blong wanwan man o woman mo pikinini insaed long wan bigfala grup blong 2, 500 pipol (luk long 3 Nifae 11:13–15; 17:25).

Abaot ol Lata-dei Sent woman, Presiden Dita F. Ukdof, Seken Kaonsela long Fas Presidensi, i talem: “Yufala ol gudfala sista i givim gud seves long ol narawan from ol risen we i bitim tingting ia blong wantem kasem samting blong yuwan. Long wei ia, yufala i folem Sevya. … Ol tingting blong Hem i oltaem blong helpem ol narawan.”4

© 2014 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/13 Oli letem translesen: 6/13 Translesen blongVisiting Teaching Message, January 2014. First Presidency and Visiting Teaching Messages, January 2014. Bislama. 10861 852

Ol Not

  1. Linda K. Beten, “Is Faith in the Atonement of Jesus Christ Written in Our Hearts ?” Ensign o Liahona, Nov. 2012, 114.

  2. Thomas S. Monson, “Meeting Life’s Challenges,” Ensign, Nov. 1993, 71.

  3. “God Hem I Waes mo I Mekem Rod,” Singsing Tabu Mo Singsing Blong Pikinini, pej 19.

  4. Dita F. Ukdof, “Happiness, Your Heritage,” Ensign o Liahona, Nov. 2008, 120.

?Wanem Mi Save Mekem?

  1. ?From wanem, mo olsem wanem Jisas Kraes i stap olsem eksampol blong mi?

  2. ?Olsem wanem nao taem mi givhan long ol sista we mi visitim i helpem mi blong folem Sevya ?