Poraus seni ewe Aewin Presetensi, January 2014
Ewe Fansoun Och ne Afotukatiw Efoch Ira
Non Rome me noom, Janus I ewe kotun poputa. Ra chungani fan chommong ren ruu mesan—ren eu a kunu ngeni ewe fansoun a no, me ewe eu a nenengeni ewe fansoun epwe eto. Ekkoch fosun fonu ra iteni ewe maram January mwrin I pun ewe poputan ewe ier a eu fansoun ekiek me kokkot.
Fitu ngoru ier mwirin, chommong aramas won unusen fonufan ra sopweno ei orenien fori kokkotun siwin fan itan ewe ier mi fo. Pungun, forun ewe kokkotun siwin mi mecheres—ach apwonueta ewe kokkot a eu mettoch mi unusen sokkoseni.
Emon mwan a fori echo tettenin an kewe kokkotun siwin an ewe ier mi fo a mefi och usun an foffor. A pwisin ekieki, “Tori iei, ua fiti ai we kokottun kekis, use mwo songokai, ua fiti ai we kokkotun moni, me use mwo fan eu fosunganu ren ewe konak noun ewe chon unukui. Nge ikenai a Januray 2 me ewe esisinen neno a keran tik me a tori fansoun ai upwe pwata. Epwe namwot eu manaman pwe upwe sopweno.”
Poputa Sefan
A wor eu mettoch mi wesen awora apinukunuk ren eu pop sefan. Nge ai nuku pwe fan eu ika fan ekkoch kich meinisin sia mochen sipwe pop sefan ren eu uruo me tonano.
Ua sani ai upwe angei eu computer ren eu hard drive mi nimenimoch. Ren och fanosun a angang unusoch. Nge nupwen ekkewe ran me wiik ra no me chommong prokram ra tonong non ewe computer (ekkoch ren ach pwisin fori, ekkoch ren ach sise fen mochen fori), ewe computer epwe poputa ne mangano, me mettoch a fen mwitir me akkomw mi kan mang. Fan ekkoch ese fen mochen pwak. Ach mina epwe poputa a pwan weires nupwen ewe hard drive a uren mettochun osukosuk usun uruon computer mi taropas. Fan ekkoch ewe eu chok anen forseffani ach sipwe tonu unusan ewe computer me poputa sefan.
Aramas ra pwan tongeni uren mettochun osukosuk ren niuokus, tipewmwaramwar, me niamam mi chou. Ach kewe mwanino (ekkewe sia pwisin fori are fori ren ach sise fen mochen) ra tongeni chou woch tori a nikinikin a kan weires ach sipwe fori met ururun sipwe fori.
Non pekin tipis, a wor eu angangen tonusefan sia iteni aier mi mut ngeni kich ach sipwe tonu ach kewe pwisin hard drive ren ekkewe mettochun osukosuk mi kan chou won netipach. Ewe kapas allim, me ren ewe Achasefanin Jises Kraist mi amwarar me atong, a pwar ngeni kich ewe an ach sipwe nimeti ngunuch seni ewe nimengauen tipis me winiti minefo, nimoch, me unusoch usun emon semirit.
Nge fan ekkoch pwan ekkoch mettoch ra amangakich me epetikich, me esenipato ekiek mi nusmwan me foffor mi fen aweiresi ach sipwe poputa.
Wau ewe Aramasoch non Kich.
Forun kokkotun mochen a eu mettoch mi murinno. Sia sinei pwe mi wor an Semach won Nang kewe kokkot pokiten A ereni kich pwe An angang me an ning pwe epwe esenipato manau fochofoch me manau esemuch an aramas meinisin (Moses 1:39).
Ach pwisin kokkotun mochen a tongeni wau ewe aramasoch non kich. Nge, eu ekkewe mettoch mi orukuruku kich non ach achocho ne apwonueta ach kokkotun siwin mi ach amangano ach angang. Fan ekkoch sia amangano ach poputa, ren ach witi ewe fansoun mi fich ne poputa—ewe aewin ranin ewe ier, ewe nepoputan atun pwich, nupwen sia kokko ngeni wisen pisop are presetenin Fin Anisi, mwirin ekkewe semirit ra tonong sukun, mwirin sia asoso seni angang.
Ese namwot kapasen etiwetiw ren om kopwe poputa ne fetan ngeni om kewe kokkotun mochen mi pung. Ese namwot kopwe angei mwumwuta pwe kopwe winiti ewe emon ita ururun kopwe winiti. Ese namwot emon epwe tingorek ne angang non ewe Mwichefen.
Fan ekkoch sia tongeni asonapa chommong ierin manauach ne witi ach sipwe kefin (nengeni D&C 121:34–36). Nge ese pung ena. Ka fen kefin!
Fan ekkoch non manauei a wor pwinin use mour ren ai ua weires ren osukosuk, noninen, are pwisin netipengau. Nge ese nifinifin aukukkun kirochun ewe pwin, ua chok angei pochokun seni ei ekiek: nesesor ewe akkar epwe tota.
Ren iteitan ran mi fo, eu mesen ran mi fo a pwan feito—esap chok fan itan fonufan nge pwan fan itach. Me ren iteitan ran mi fo a feito eu tufichin poputa mi fo—eu tufich ne pop sefan.
Nge Met Ika Sia Kuf?
Fan ekkoch nioukus mi ewe mettoch a epetikich. Meni sia niuokus pwe sisap tongeni apwonueta, pwe sipwe apwonueta, pwe sipwe mefen, pwe ach apwonueta epwe siwinikich, are siwini ekkewe sia tongeir.
Iwe sia witiwit are fangeta.
Pwan eu mettoch sipwe chechemeni ren ach fori kokkotun ach kewe mochen a ien: Naman sipwe kuf—non ewe fansoun mochomoch. Nge siwinin ach sipwe netipengau, sia tongeni pochokun pun ei weweiti a angei senikich ewe ekiekin ach sipwe fen unusoch iei chok. A esinna seni nepoputan pwe fan eu are pwan eu fansoun, sisap naf. Ach sinei ei me akkomw a angei senikich ewe mefian mairu me netipengauan ach kuf.
Nupwen sia fetan ngeni ach kewe kokkot iei usun, ach kuf ese epeti kich. Chechemeni, ina mwo ika sise tori ewe ennetin, ach mochen iei chok, sipwe fen pochokununo ren an soposop won ewe an mi emwen ngeni.
Me a auchea ena—a watte auchean.
Ina mwo ika sisap naf ne tori muchun, ach sopweno won ach sai epwe anapano kich seni akkom.
Iei Ewe Fanosun Mi Och ne Poputa
Eu porausen noom a apasa, “Ewe fansoun mi och ne fotukatiw efoch ira mi 20 ier mwen iei. Iei ewe oruan fansoun mi och.”
A wor och mettoch mi amwarar me awora apinukunuk usun ewe kapas iei. A wor och mettoch mi apochokun usun ach finata ne fini iei, sia tongeni fetanano iei chok.
Iei ewe fansoun mi och ach sipwe poputa ne winiti ewe emon sia ennetin mochen winiti—esap chok 20 ier seni ikenai nge pwan ren fansoun esemuch.
© 2014 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun First Presidency Message, January 2014. Chuukese. 10861 901
Afanafan seni Ei Poraus
Preseten Uchtdorf a awewe pwe ika sia kuf ren ach apwonueta ach kewe kokkot, “sipwe tongeni pochokun. … Ina mwo ika sisap naf ne tori muchunon, ach sopweno won ach sai epwe anapano ochun kich seni akkom.” Kopwe tingorei chon famini ar repwe poraus usun fansoun a watte met ra kaeo seni ar fori nap seni met ra kaeo seni niwinin nupwen a wes, usun sochungio seni sukun are angei och sokkun esisinen angoch.