Poraus seni Fefin Chon Amwa, January 2014

Ewe Popun mi Pin an Jises Kraist: Nenien Appiru

Kaeo me iotek usun ekkei mettoch me kutta om sinei usun met kopwe poraus usun. Ifa usun om weweiti usun manauen me popun ewe Chon Amanau epwe anapano om nuku non I me efeiochu ekkewe ka tumunu me churi ren wisen an fefin chon amwa? Ren pwan ekkis poraus, kopwe nengeni reliefsociety.lds.org.

Nuku, Famini, Aninis

Iei ei kinikin non chommong Porausen an Fefin Chon Amwa mi pachenong kinikinin popun ewe Chon Amanau.

Nupwen sia weweiti pwe Jises Kraist I ach nenien appiru non mettoch meinisin, sia tongeni anapano ach mochen ne tapweno I. Ekkewe pukfel ra uren kapasen apochokun usun ach tapweno mwirin ipwepin Kraist. Ngeni ekkewe Chon Nifai, Kraist a apasa, “pokiten oua kuna seni ekkewe angang ua fori, ina oupwe pwan fori usun chok”( 3 Nifai 27:21). Ngeni Thomas, Jises a apasa, “Ngang ewe ann, ewe ennet o ewe manau. Ese wor emon epwe feinno ren ewe Sam ika ese punun ngang.” (John 14:6).

Ikenai nouch chon emwen ra achema ngeni kich pwe sipwe anenia ewe Chon Amanau pwe epwe ach nenien appiru. Linda K. Burton, presetenin ewe Fin Anisi Unusan, a apasa, “Nupwen emon me emon kich sia anommu ewe nongonongen ewe Achasefan anonnon non netipach, iwe sipwe poputa ne winiti ekkewe sokkun aramas ewe Samon a mochen sipwe winiti.”¹

Preseten Thomas S. Monson a apasa, “Ach Samon me Chon Amanau, Jises Kraist, I ach nenien appiru me ach pochokun.”²

Sipwe finata ne arap ngeni Jises Kraist, me aneasosichi An kewe annuk, me achocho ne niwinsefan ngeni Semach won Nang.

Seni ekkewe Pukfel

2 Nifai 31:16; Alma 17:11; 3 Nifai 27:27; Moroni 7:48

Seni Ach Uruo

“A esisinata ewe an me a emweni kich,” poraus mi makk seni Eliza R. Snow, oruan presetenin ewe Mwichen Fin Anisi Unusan, usun ewe afanafan fetan an Jises Kraist non inis.³ A afanafan ngeni aramas pwisin—emon me emon. A aiti kich sipwe su seni ekkewe tiwe me tiu me amanaua ewe emon mi rikino (nengeni Luke 15:3–7). A echikarata me aiti aramas pwisin, a pwan churri meinisin emon me emon non ewe mwichen 2,500 (nengeni 3 Nifai 11:13–15; 17:25).

Usun fin Aramas Mi Pin non Fansoun Soponon, Preseten Dieter F. Uchtdorf, Oruan Chon Aninis non ewe Aewin Presetensi, a apasa: “Ami fefin mi amwarar oua awora aninnis non tong ngeni ekkoch ren popun mi nap seni pwisin ami feioch seni. Non ei ka nikinikinin ewe Chon Amanau. … An ekiek mi chok kunu ngeni an anisi ekkoch.”⁴

© 2014 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/13. Kapungunon chiakun: 6/13. Chiakun Visiting Teaching Message, January 2014. Chuukese. 10861 901

Esinesin

1. Linda K. Burton, “Is Faith in the Atonement of Jesus Christ Written in Our Hearts?” Ensign are Liahona, Nov. 2012, 114.

2. Thomas S. Monson, “Meeting Life’s Challenges,” Ensign, Nov. 1993, 71.

3. “How Great the Wisdom and the Love,” Hymns,nampa 195.

4. Dieter F. Uchtdorf, “Happiness, Your Heritage,” Ensign are Liahona, Nov. 2008, 120.

Met Ua Tongeni Fori?

1. Pwata me ifa usun Jises Kraist I ai we nenien appiru?

2. Ifa usun ai afanafan ngeni ekkewe fefin ua churi epwe anisiei ne tapweno mwirin ewe Chon Amanau?