Etop eke First Presidency, eke Akpa Ofiong ke isua 2014
Ata Eti Ini Ndi-to Eto
Ke Rome ke eset Janus ekedi ndem abasi eke ntongo nkpo. Ekesisio enye ewut ye iso iba — iso kiet esede edem ke se ima ikebe, iso eken esede iso ono ini-iso. Ubak mme usem esiak enying akpa Ofiong isua edian enye koro ntongo isua esidi ini ndifiak nkere nkpo nko ye ini ndibenge idem.
Ke mme tosin isua eketienede, ediwak ukpebnkpo edu uwem ke ofuri ererimbot ema etongo ido ndinam mkpe mbiere mbanga obufa isua. Ke ntre, ndinam mkpe mbiere emem — ndinim mmo edi ata isio-isio nkpo efen.
Erenowo kiet emi ama akanam ata ediwak ibat mkpe mbiere eke Obufa Isua ama okop inem kabanga nkaiso esie. Enye edikere ke idemesie, “Nte etiede mi, Ami mmedia nsio-nsio udia mi nte odotde, ami nsopke ndiyat esit, Ami mmekpeme nte mbiatde okuk, ndien Ami mfinake idem kabanga ebua mboho idung mi. Edi mfin emi edi oyoho usen iba ke Akpa Ofiong isua ndien nkanika ama amia ono ntot ndien ini ekem Ami ndiworo mkpong bed. Eyeyom utibenkpo man ami nkaiso ke mme ubiere mi emi.”
Nditongo Obufa
Odu nkpo idorenyin kiet se owo mikemeke ndinim ke akpaniko kabanga nditongo obufa nkpo. Ami mmekere nte ke ini kiet mme eken kpukpru nnyin imesiyom ndifiak ntongo nkpo ke eti ndaha.
Ami mmema ndinyene obufa computer emi asangade ye hard drive. Ke esesit ini hard drive ama anam utom ofon. Edi ke nte mme usen ye urua ebede ndien efiak edian mme ediwak nkpo utom (ubak efefiok edian, ubak owo itimke ifefiok idian), ke akpatre computer oro esitongo ndidop nda, ndien mme nkpo emi enye ekesisopde anam ofon akabare ofu ifu. Ubak ini computer oro isinamke nnam uto ndomo kiet. Ndien ndinam enye otongo utom ekeme ndikabare ndi okposong nkpo koro hard drive ama akabare abuaha ye nsio-nsio ndutime ye nkenge nsuho nkpo electronic. Odu mme ini emi edide nkukure se ekeme ndinam edi ndifiak ntum ubono nkpo computer oro nnyung mfiak ntongo obufa.
Owo ke ukem usung oro ekeme ndikabare mbuaha ye ndik, eyihi ye mbiomo idioknkpo. Mme ndudue eke nnyin ikenamde (enye eke ifefiok ye eke mifiokke) ekeme ndibiongo nnyin tutu osong ekpere ndinam nnyin itre ndinam nkpo emi nnyin idiongoke ndinam.
Kabanga idioknkpo, odu eti usung nditum emi ekotde nditua mkpofiok emi edinamde nnyin iyet mme mbuaha idioknkpo ke esit idem nnyin nsio emi esifikde esit nnyin. Iko Abasi, oto ke utibe ye mbom Uwa Usio Isop eke Jesus Christ, owut nnyin usung ndiyet ukpong nnyin nsio ke ntoi idioknkpo ndien ifiak ikabare obufa, isana, inyung inana ndudue nte ekpri eyen.
Edi ke ubak ini mme nkpo efen esikpak onyung anam nnyin ida edem esin idiok ekikere ye edinam emi anamde nnyin ndifiak ntongo edi okposong nkpo.
Ndisio Ata Eti ke Idem Nnyin Nworo Ndi.
Ndinam utit uduak edi nkpo eke odotde Nnyin imediongo ete ke Ete nnyin ke Enyong enyene mme uduak koro Enye ama odoho nnyin ete ke utom ye ubong Esie edi “ndinam owo okukpa ke nsinsi man enyene nsinsi uwem” ( Moses 1:39 ).
Mme utit uduak eke idem nnyin ekeme ndida ata eti ke idem nnyin nworo ndi. Nte ededi, nkpo kiet emi esibiongoke ukeme nnyin ke ndinam ye ndinim mme mkpe mbiere edi ndibebet ini. Nnyin ke ubak ini imesinam ubighi ke nditongo, ibebet eti ini man itongo — akpa usen ke obufa isua, ntongo ndaeyo, ini emi ekotde nnyin nte bishop mme president eke Relief Society, ke nkpri ndito ema eduk ufoknwed, ke ini nnyin ima inam utom ikure ibo nduok odudu inyong ufok.
Inaha nte mbufo eyom ikoot mbemiso mbufo etongo ndisanga ke usung utit uduak edinen ido mbufo. Inaha nte mbufo ebet eyom unyime man akabare edi owo emi obot ekenimde mbufo ndidi. Inaha nte mbufo ebebet man ekoot mbufo ete edinwam ke ufok Abasi.
Nnyin imesibiat ediwak ini ke mme isua uwem nnyin ndibebet man edimemek nnyin (Kese D&C 121:43 – 36). Edi oro edi nsunsu mbemiso iko. Ema ebebem iso emek mbufo!
Ubak ini ke uwem mi Ami mmesitaba idap ke ndikere mbanga nte ediwak nkpo etiede, mme mfina ye mfuho eke idem mi. Edi ekim eke okoneyo ekpekim se ekim, kpukpru ini Ami mmenyene nsongonda ke ekikere emi: ke usenubok utin eyesiaha.
Ke kpukpru obufa usen, obufa usiere eyedi — idige ino ererimbot kpot oro edi ono nnyin nko. Ndien ke obufa usen asanga ye obufa eritongo — ufang ndifiak ntongo.
Edi Edieke Nnyin Ikpeduo?
Ubakini nkpo eke esikpakde nnyin edi ndik. Nnyin imekeme ndikop ndik ete ke nnyin idikutke unen, ke nnyin iyekut unen, ke nnyin imekeme ndibo esuene, ke ndikut unen ekeme ndikpuho nnyin, mme ke ndikut unen ekeme ndikpuho mbio owo eke nnyin imade.
Ke ntre nnyin ibebet. Mme ndikpong idem nyak.
Nkpo efen eke nnyin inyenede nditi kini nnyin inamde uduak edi emi: ke akpaniko nnyin iyeduo — esesit ke itongode ke ata akpa ini. Edi mbak nnyin idinana nsongonda, nnyin imekeme ndibo osongo koro ifiok emi eyebin okposong ekikere ke nnyin imefon ima ata idahaemi osio. Oro emem owut tongo ke akpa ini ete ini kiet mme eken, ke nnyin imekeme ndinam ndudue. Ndidiongo emi ke akpa ini eyebin ediwak nkpo mkpaidem ye unana nsongonda eke ndudue osio efeb.
Ke ini eke nnyin inamde mme uduak nnyin ke usung ntem, ndudue inaha nte edi ubiongo nnyin. Ti, edieke nnyin mikemeke ndisim akpatre ndaha nnyin, ebiet emi nnyin iyomde ke ata idaha oro, nnyin imesuk inam nkori ke usung isang eke edidade ikesim ndaha oro.
Ndien oro enyene ufon — oro edi akamba nkpo.
Okposuk edi nte nnyin ima itre ndisim akpatre ndaha nnyin, ndikaka iso nsanga ke usung isang oro eyenam nnyin ifon ikan nte ikedide ke akpa ntongo.
Ata Eti Ini Nditongo Edi Idahaemi.
Akani nke kiet odoho ete, “Ata eti ini ndito eto edi isua Edip ke edem. Udiana-eti ini edi idahaemi.”
Odu nkpo emi ofonde onyung onode idorenyin kabanga iko emi emi idahaemi.Odu nkpo emi onode owo odudu kabanga se idi akpaniko ete edieke nnyin imekde ndibiere idahaemi, nnyin imekeme ndika iso tongo ke ata ini emi.
Idahaemi edi ata eti ini nditongo ndikabare ndi uto owo eke nnyin ikpeyomde ndidi — idige ke isua Edip tongo ke idahaemi kpot oro edi ke ofuri nsinsi nko.
(c) 2014 eketode Intellectual Reserve, Inc. Emenim kpukpru unen. Ekeming ke USA. Enyimme eming ke Iko Mbakara:6/13. Enyimme Ndikabare: 6/13. Edikabare ekeFirst Presidency Message, January 2014. Efik. 10861 553
Ukpeb nkpo eketode Etop Emi
President Uchtdorf anam anwanga ete ke ini nnyin mikemeke ndisim mme utit uduak nnyin, “nnyin imekeme ndibo nsongo nda. …Okposuk edi nte nnyin ima itre ndisim akpatre ndaha nnyin, ndikaka iso nsanga ke usung isang oro eyenam nnyin ifon ikan nte ikedide ke akpa ntongo.“ Bup mbio ufok idung ete ebuana ukpebnkpo emi mmo ekekpebde eto usung nte mmo ekenamde nkpo idige se mmo ekekpeb eto utit nkpo oro, nkpo nte ndikure mbe nworo ke ufoknwed mme ndibo eno.